༄༅།། ཕྱི་ཟླ་༤་པའི་ཚེས་༣༠་ཉིན་རྒྱ་གར་གྱི་འཕྲོད་བསྟེན་ལྷན་ཁང་གིས་གནས་ཚུལ་སྤེལ་བ་ལྟར་ན། འདས་པའི་ཉིན་ཞག་གཅིག་གི་རིང་དེར་རྒྱ་གར་བ་༣༨༦༤༥༢་ལ་ཏོག་དབྱིབས་ནད་དུག་གསར་དུ་འགོས་པ་དང་མི་༣༤༩༨་ལ་འཆི་སྐྱོན་བྱུང་སོང་། རྒྱ་གར་ལ་ཏོག་དབྱིབས་ནད་དུག་ཁྱབ་ནས་བཟུང་སྟེ་མི་གྲངས་ས་ཡ་༡༩་མ་ཟིན་ཙམ་ལ་ནད་དུག་འགོས་པ་དང་མི་༢༠༨༠༠༠་འཆི་སྐྱོན་བྱུང་སོང་ཞེས་བསྒྲགས། རྒྱ་གར་གྱི་གསར་འགྱུར་ལས་ཁང་ཁག་དང་རྒྱལ་སྤྱིའི་གསར་འགྱུར་ལས་ཁང་ཁག་གིས་སྲིད་བློན་མོ་དྷིའི་གཞུང་གིས་ཕྱིར་བསྒྲགས་བྱས་པའི་གྲངས་འབོར་ལས་ཀྱང་རྒྱ་གར་ལ་ཏོག་དབྱིབས་ནད་དུག་གིས་ནད་མནར་དང་འཆི་སྐྱོན་བྱུང་བའི་མིའི་གྲངས་འབོར་ལྡབ་མང་པོ་མང་བ་བྱུང་ཡོད་པའི་གནས་ཚུལ་སྤེལ་འདུག དེ་རིང་གཟའ་པ་སངས་ནས་རྒྱ་གར་གྱི་དམག་གི་སྨན་ཁང་ཁག་ཀྱང་སྒོ་ཕྱེ་ནས་ནད་པ་མང་དྲགས་ཏེ་ཉལ་ས་མེད་པ་དང་འཚོ་རླུང་འདང་ངེས་མེད་པའི་དཀའ་ངལ་སེལ་ཐུབ་བྱ་རྒྱུ་འགོ་བཙུགས། རྒྱ་གར་གྱི་དུར་ཁྲོད་ཁག་ཏུ་སྔར་བཞིན་བེམ་པོ་མེར་སྲེག་གཏོང་ས་མེད་པ་དང་དུར་ཁུང་རྐོ་ས་མེད་པར་དུར་ས་རྒྱ་བསྐྱེད་དགོས་པ། རྒྱ་གར་གྱི་སྨན་བཅོས་དང་འཕྲོད་བསྟེན་ལྟ་སྐྱོང་གི་ལམ་ལུགས་རྣམས་སྦོ་ལུག་སྟེ་མང་ཚོགས་རྣམས་སྲིད་བློན་མོ་དྷིའི་སྟེང་དུ་ཁོང་ཁྲོ་ཇེ་ཆེར་སོང་། ལྷག་པར་དུ་སྲིད་བློན་མོ་དྷིས་རྒྱ་གར་རྒྱལ་ཡོངས་སུ་ནད་ཡམས་ཚབས་ཆེན་ཞིག་ཁྱབ་གདལ་འགྲོ་བཞིན་པའི་དུས་འདིར་འོས་འདེམས་ཀྱི་དྲིལ་བསྒྲགས་ལས་འགུལ་སྤེལ་ཆོག་པའི་ཐག་གཅོད་བྱས་པ། དུས་ཡུན་ཟླ་བ་གཅིག་ལ་ཀུམ་བྷུ་མེ་ལ་ཞེས་པའི་ཆོས་ལུགས་དུས་ཆེན་ཚུགས་བཅུག་སྟེ་ཏོག་དབྱིབས་ནད་ཁྱབ་གདལ་བཏང་བར་མི་དམངས་རྣམས་ཁོང་ཁྲོས་བརྟས།།
རྒྱལ་ས་ལྡི་ལིའི་བྱང་ཕྱོགས་ཀྱི་གྲོང་སྡེ་ལས་ཁུངས་ཤིག་གིས་གནས་ཚུལ་སྤེལ་བ་ལྟར་ན། འདས་པའི་གཟའ་འཁོར་དེར་རྒྱལ་ས་ལྡི་ལིའི་དུར་ས་ཁག་ཏུ་ཉིན་ལྟར་བེམ་པོ་༦༠༠་ལྷག་མེར་སྲེག་བཏང་བ་ཡིན་ཞེས་བཤད། འདི་ནི་ལྡི་ལི་མངའ་སྡེའི་གཞུང་གིས་རང་གི་མངའ་ཁོངས་སུ་མི་ཅི་ཙམ་ཏོག་དབྱིབས་ནད་དུག་གིས་འདས་གྲོངས་སུ་གྱུར་ཡོད་མེད་ཀྱི་གྲངས་འབོར་ཞིག་ཕྱིར་བསྒྲགས་པ་ལས་ལྡབ་གཅིག་མང་བ་ཡོད་ཅིང་། བདུན་ཕྲག་འདིའི་མགོ་སྟོད་དེར་ལྡི་ལི་གྲོང་ཁྱེར་གཞུང་གིས་རང་ཁྱིམ་དུ་ཏོག་དབྱིབས་ནད་དུག་འགོས་ནས་འཆི་སྐྱོན་བྱུང་བའི་མི་༡༠༠༠་ནས་༡༥༠༠་ཡས་མས་ཤིག་གཞུང་གི་གྲངས་ཐོའི་ཁོངས་སུ་བཀོད་མི་འདུག་ཅེས་རྒྱ་གར་གྱི་གསར་འགོད་པ་ཚོས་ཐེར་འདོན་བྱས་འདུག ཁ་སང་གཟའ་ཕུར་བུ་ནས་རྒྱལ་ས་ལྡི་ལིའི་ཁྱི་རོ་མེར་སྲེག་གཏོང་ཡུལ་ཞིག་ཀྱང་མིའི་ཕུང་པོ་ཞུགས་འབུལ་བྱ་ཡུལ་གྱི་དུར་ཁྲོད་དུ་བསྒྱུར་ཡོད་པའི་གནས་ཚུལ་ཐོན། ལྡི་ལིའི་དུར་ཁང་ཞིག་གི་ལས་སྣེ་སུ་མན་ཀུ་མར་གུབ་ཏ་ཞེས་པ་ཞིག་གིས་གསར་འགོད་པར་ཞོགས་པ་ནས་ཕུང་པོ་གཅིག་གི་རྗེས་སུ་གཅིག་འཁྱེར་ཡོང་རྒྱུ་མཚམས་ཆད་ཀྱི་མི་འདུག དུར་ཁང་གི་ལས་མི་རྣམས་དང་སྤྱི་ཚོགས་ཞབས་ཞུ་བ་ཚོས་ཉིན་ལྟར་ཕུང་པོ་བརྒྱ་ཕྲག་མང་པོ་ཞུགས་འབུལ་བྱ་དགོས་པས་ཨར་བརྟེན་གྱི་མི་འདུག་ཅེས་སྡུག་སྐད་བརྒྱབ། སི་མ་པུ་རི་དུར་ཁང་གི་འགོ་ཁྲིད་ཤན་ཏི་ཞེས་པ་ཞིག་གིས་ང་ཚོའི་ལས་མི་རྣམས་དང་སྤྱི་ཚོགས་ཞབས་ཞུ་བ་ཚོས་དུར་སྟེགས་གསར་བརྩིགས་དང་སེམས་སྡུག་གིས་མནར་བཞིན་པའི་ཤུལ་ལུས་བཟའ་མི་ཚོར་སེམས་གསོ། ཕུང་པོ་དུར་སྟེགས་སུ་བཞག་སྟེ་མེ་ཤིང་བརྩིགས་དགོས་པ་སོགས་ཀྱིས་ལུས་སེམས་གཉིས་ཀར་དཀའ་ངལ་ཤིན་ཏུ་ཆེ། དེང་སྐབས་གནམ་གཤིས་ཀྱང་ཚ་གདུག་ཆེ་དྲགས་པ་བཅས་ཀྱིས་རྩིག་གྱང་ལ་བསྙེན་ནས་དུས་ཡུན་སྐར་མ་འགའ་རེར་གཉིད་མ་ཁུག་པར་ལས་འཕྲོ་སྐྱོང་ཐུབ་ཀྱི་མི་འདུག འདས་པའི་ཆུ་ཚོད་ལྔའི་ནང་དུ་ང་ཚོས་ཕུང་པོ་༥༥་ཞུགས་འབུལ་བྱས་པ་ཡིན། ཉི་མ་འདི་མ་ཡོལ་བར་དུ་ཉུང་མཐར་ཡང་བེམ་པོ་བརྒྱ་ལྷག་ཞུགས་འབུལ་བྱ་དགོས་ཐུག་གི་རེད། ང་ལ་ངལ་དུབ་ཀྱིས་བཟོད་ཐབས་མེད་ཀྱང་རྒྱ་གར་མི་དམངས་དང་འགྲོ་བ་མིའི་ཚེ་སྲོག་ལ་བསམ་བློ་བཏང་ན་ངལ་གསོ་རྒྱག་པའི་དུས་ཚོད་མ་རེད་ཅེས་བཤད།།
སི་མ་པུ་རི་དུར་ཁང་གི་འགོ་ཁྲིད་ཤན་ཏིས་མུ་མཐུད་དུ་ཨ་རིའི་སེ་ཨེན་ཨེན་གསར་ཁང་གི་གསར་འགོད་པར་བཤད་པ་ལྟར་ན། དུར་ཁང་གི་ལས་མི་ཚོས་སྔོན་ཆད་མཐོང་ཐོས་བྱུང་མྱོང་མེད་པའི་འཇིགས་སུ་རུང་བའི་གནས་ཚུལ་ཞིག་མཐོང་ཐོས་འབྱུང་གི་འདུག དེ་ནི་ཏོག་དབྱིབས་ནད་དུག་གིས་འཆི་སྐྱོན་བྱུང་བ་མང་པོ་ཞིག་ན་གཞོན་རེད། ང་ཚོས་ཁྱིམ་ཚང་གཅིག་གི་བཟའ་མིའི་གྲས་ཀྱི་ན་གཞོན་གཉིས་གསུམ་རེར་ཏོག་དབྱིབས་ནད་དུག་ཕོག་ནས་འཆི་སྐྱོན་བྱུང་བ་མཐོང་ཐོས་འབྱུང་གི་འདུག ལྡི་ལིའི་སྨན་ཁང་ཁག་ལ་ནད་པ་བསྙལ་ས་དང་འཚོ་རླུང་། དབུགས་གཏོང་འཕྲུལ་ཆས་དང་སྨན་ཁབ་སོགས་འདང་ངེས་མེད་པས་མི་ལ་འཆི་སྐྱོན་འབྱུང་རྒྱུ་ཇེ་མང་དུ་འགྲོ་ས་རེད། ང་ཚོ་ཅི་བྱ་གཏོལ་མེད་ཀྱི་གནས་སུ་ལྷུང་ཡོད་པར་སེམས་སྡུག་དང་ཁོང་ཁྲོ་ཡང་ལང་གི་འདུག སྲིད་དོན་པ་ཚོས་འོས་འདེམས་ཀྱི་དུས་སུ་ཁས་ལེན་དམ་པོ་མང་དག་ཅིག་བྱས་ཀྱང་མི་དམངས་ལ་དཀའ་ངལ་འཕྲད་དུས་འཇའ་ཡལ་བ་ལྟར་མཐོང་སར་མི་འདུག ང་ཚོར་ནད་པ་སྐྱེལ་འདྲེན་གྱི་རླངས་འཁོར་༡༨་ལས་མེད། ང་ཚོས་ཉིན་ལྟར་བེམ་པོ་༥༠་ནས་༥༥་ཡས་མས་རེ་ལེན་དགོས་ཀྱི་འདུག འདི་ནི་མངའ་སྡེ་གཞུང་གིས་བསྒྲུབ་དགོས་པའི་ལས་དོན་ཞིག་ཡིན་རུང་ང་ཚོ་སྤྱི་ཚོགས་ཞབས་ཞུ་བ་ཚོས་བསྒྲུབ་དགོས་ཀྱི་འདུག ཐ་ན་ཤི་སྡུག་མྱོང་བཞིན་པའི་མི་མང་ལ་སེམས་གསོ་ཙམ་ཡང་བྱེད་མཁན་མེད་པ་བཅས་ལ་བསམ་བློ་བཏང་ན་ཚིག་པ་ཟ་ཡི་འདུག་ཅེས་བཤད། དེ་བཞིན་རྒྱ་གར་བ་གཞན་ཚོས་ཀྱང་སྲིད་བློན་མོ་དྷི་གང་དུ་ཕྱིན་པ་རེད། མིའི་ཚེ་སྲོག་ལས་ཀྱང་འོས་འདེམས་ཀྱི་དྲིལ་བསྒྲགས་ལས་འགུལ་དང་ཆོས་ལུགས་ཀྱི་དུས་ཆེན་སྲུང་བརྩི་ཞུ་རྒྱུ་རྩ་ཆེ་བ་རེད་དམ་ཞེས་དྲིས།།
རྒྱ་གར་གྱི་གསར་འགོད་པ་དྷ་ཏེ་ཞེས་པ་ཞིག་གིས་དེ་རིང་ངས་ཁོང་ཁྲོས་བརྟས་པའི་རྒྱ་གར་བ་ཞིག་གི་ངོས་ནས་འབྲི་རྩོམ་བྱེད་བཞིན་ཡོད། སྲིད་གཞུང་གིས་མི་དམངས་ལ་དཀའ་སྡུག་ཡོད་པ་མཐའ་གཅིག་ཏུ་བསྙོན་གྱི་ཡོད་པར་མ་ཟད། མི་དམངས་ཀྱི་བདེ་སྡུག་ལ་རྣ་བ་འོན་པ་དང་མིག་ལོང་བ་ལྟར་གཏན་ནས་ལྟ་ཉན་བྱེད་ཀྱི་མི་འདུག སྲིད་གཞུང་གི་དབང་འཛིན་པ་ཚོ་དང་སྲིད་དོན་པ་ཚོས་མི་དམངས་བློས་བཏང་སོང་། རྒྱ་གར་གཞུང་གིས་ཏོག་དབྱིབས་ནད་དུག་ཐེངས་གཉིས་པ་ཁྱབ་གདལ་འགྲོ་རྒྱུ་དེར་གྲ་སྒྲིག་མ་བྱས་པར་མི་དམངས་ཀྱི་བདེ་ཐང་ལ་དོ་ཁུར་ལེན་རྒྱུ་འཐུས་ཤོར་བཏང་སོང་། རྒྱ་གར་གྱི་འཕྲོད་བསྟེན་བློན་ཆེན་གྱིས་༢༠༢༠་ལོར་ཏོག་དབྱིབས་ནད་དུག་ཁྱབ་གདལ་ཐེངས་དང་པོ་ཕྱིན་པའི་རྗེས་སུ་ནད་ཡམས་སྔོན་འགོག་གི་གྲ་སྒྲིག་ཆ་ཚང་ཡོད་ཅེས་འུར་སྒྲོགས་བྱས་པ་རེད། སྲིད་གཞུང་གི་གྲ་སྒྲིག་ནི་འཇོན་ཐང་མེད་པ་དང་རེ་བ་སྟོང་ཟད་ཅིག་རེད། ངའི་ཕ་མ་གཉིས་ཀར་ཏོག་དབྱིབས་ནད་དུག་འགོས་ནས་ལྔ་ལམ་གཤེགས་སོང་། ད་ལྟ་ང་ནི་ད་ཕྲུག་ཏུ་ལུས་ཡོད་པ་དང་ངའི་ཨ་ཕའི་མཐའ་མཇུག་གི་སྐད་ཆ་ཚིག་འགའ་ནི་ང་དབུགས་འགག་གི་འདུག ང་ལ་སྨན་བཅོས་ཤིག་བྱ་ཐབས་བྱོས་ཞེས་ཞུ་བ་འཐེན་སོང། ངས་གང་ཐུབ་ཅིག་བྱས་ཀྱང་ཕ་མ་གཉིས་སྐྱོབ་ཐུབ་མ་སོང་། ད་ནས་ང་ལ་ཆགས་ས་བརྟེན་ས་སུ་ཡང་མེད་ཅེས་སེམས་ལ་ན་ཟུག་ལྡང་བའི་སྡུག་གཏམ་རྣམས་བཤད་འདུག རྒྱ་གར་གྱི་སྤྱི་དམངས་འཕྲོད་བསྟེན་ཐེབས་རྩ་ཁང་གི་ཚོགས་གཙོ་རེ་ཌི་ཞེས་པ་ཞིག་གིས་ལོ་འདིའི་ཕྱི་ཟླ་དང་པོ་ནས་རྒྱ་གར་གཞུང་གིས་ནད་ཡམས་རྦད་དེ་འཇོམས་འདུག་ཅེས་འཐུས་ཤོར་བཏང་སོང་། རྒྱ་གར་མི་དམངས་ཀྱིས་དགའ་སྟོན་ལྟ་བུ་ཞིག་བྱས་ཀྱང་ང་ཚོས་མང་ཚོགས་ཀྱི་འགྲིམ་འགྲུལ་ཞོར་དུ་ནད་དུག་ཁྱབ་ཀྱི་ཡོད་པའི་དོགས་པ་བྱས་པ་ཡིན་ཞེས་བཤད། ཨ་ཤོ་ཀ་སློབ་གྲྭ་ཆེན་མོའི་ནད་དུག་བརྟག་དཔྱད་པ་ཇཱ་མིལ་ཞེས་པ་ཞིག་གིས་ཀྱང་རྒྱ་གར་གྱི་གཞུང་འབྲེལ་མི་སྣ་ཁག་དང་ཚན་རིག་པ་ཁག་ཅིག་གིས་ནད་དུག་ལ་འཐབ་རྒོལ་བྱས་ནས་གྲུབ་འབྲས་ཐོན་སོང་ཞེས་ལོག་འགྲེལ་བྱས་པའམ། ཡང་ན་རྒྱ་གར་བ་ཚོར་ནད་དུག་གིས་གནོད་མི་ཐུབ་པའི་འདུ་ཤེས་ཤིག་བཅངས་ནས་གླེན་རྟགས་བསྟན་པ་རེད། ད་ལྟ་རྒྱ་གར་གཞུང་གིས་ནད་དུག་ལ་འཐབ་རྒོལ་བྱས་ནས་གྲུབ་འབྲས་ཐོན་མེད་པ་དང་རྒྱ་གར་བ་ཚོ་ནད་དུག་གིས་གནོད་མི་ཐུབ་པའི་དམིགས་བསལ་བ་ཞིག་མིན་པ་ར་འཕྲོད་པ་ཅེས་བཤད་འདུག
རྒྱ་གར་དབུས་གཞུང་གིས་ཏོག་དབྱིབས་ནད་དུག་ཐེངས་དང་པོ་ཁྱབ་པའི་དུས་སྐབས་དང་ཐེངས་གཉིས་པ་ཁྱབ་པའི་དུས་སུ་ན་གཞོན་ལ་ནད་དུག་འགོས་ནས་ནད་མནར་དང་འཆི་སྐྱོན་བྱུང་བའི་གྲངས་འབོར་ལ་ཁྱད་པར་མེད་ཟེར་གྱི་ཡོད་མོད། འོན་ཀྱང་རྒྱ་གར་གྱི་དུར་ཁང་ཁག་གི་ལས་སྣེ་ཚོ་དང་འཕྲོད་བསྟེན་ལས་སྣེ། སྲིད་དོན་པ་ཚོས་རྒྱ་གར་ལ་ཏོག་དབྱིབས་ནད་དུག་ཁྱབ་གདལ་ཐེངས་གཉིས་པའི་སྐབས་སུ་ན་གཞོན་མང་པོ་ཞིག་ལ་ནད་མནར་དང་འཆི་སྐྱོན་འབྱུང་གི་འདུག ལྡི་ལིའི་སྤྱི་ཁྱབ་བློན་ཆེན་ཁེ་ཇཱ་རི་ཝལ་གྱིས་ཕྱི་ཟླ་༤་པའི་ཚེས་༡༥་ཉིན་རྒྱ་གར་གྱི་ན་གཞོན་ཚོས་ནད་དུག་ལ་འཛེམ་ཟོན་དང་གཟབ་ནན་བྱ་དགོས། ནད་ཡམས་ཁྱབ་གདལ་ཐེངས་གཉིས་པའི་སྐབས་སུ་ན་གཞོན་ཚོར་ནད་དུག་འགོ་སླ་བ་འདུག་ཅེས་འབོད་སྐུལ་ཞུས། སྲིད་བློན་མོ་དྷིས་རྒྱ་གར་གྱི་དཔལ་འབྱོར་ཉམས་རྒུད་དང་མི་མང་དབུལ་ཕོངས་ས་ཡ་མང་པོའི་འཚོ་རྟེན་ལ་དམིགས་ནས་ཨུ་ཐུག་ཐབས་ཟད་ཀྱི་གནས་ཚུལ་མ་ལྷུང་ཚེ། རྒྱ་གར་རྒྱལ་ཡོངས་སུ་སླར་ཡང་འགྲོ་འོང་བཀག་སྡོམ་དང་ལས་ཚོང་ལས་མཚམས་འཇོག་བྱེད་མི་དགོས་པ་གཙོ་འདོན་བྱོས་ཞེས་འབོད་སྐུལ་ཞུས། ཡིན་ནའང་རྒྱ་གར་གྱི་མངའ་སྡེ་ཁག་དང་གྲོང་ཁྱེར་ཕལ་མོ་ཆེས་རང་གི་ས་གནས་སོ་སོར་འགྲོ་འོང་བཀག་སྡོམ་དང་མི་ཚོགས་འདུ་འཛོམ་བྱེད་མི་ཆོག་པ། ཚོང་ལས་སོགས་སྒོ་རྒྱག་དགོས་པའི་སྒོ་བརྒྱ་བསྡམས། བདུན་ཕྲག་འདིའི་གཟའ་མིག་དམར་ནས་རྒྱལ་སྤྱིའི་སྤྱི་ཚོགས་ཀྱིས་རྒྱ་གར་ལ་འཚོ་རླུང་དང་དབུགས་གཏོང་ཕྲུལ་ཆས། སྨན་དང་སྨན་ཁང་གི་ཡོ་བྱད་རྣམས་སྐྱེལ་འདྲེན་བྱ་རྒྱུ་འགོ་ཚུགས། ཨ་མི་རི་ཀས་རྒྱ་གར་ལ་ཨ་སྒོར་དུང་ཕྱུར་གཅིག་གི་སྨན་བཅོས་རོགས་རམ་སྤྲོད་རྒྱུའི་ཁས་ལེན་བྱས་པའི་རོགས་སྐྱོར་དངོས་ཟོག་ཐོག་མ་སྟེ། འཚོ་རླུང་ལྕགས་མདོང་༡༡༠༠་དང་ཁ་རས་ཨེན་༩༥་རྟགས་ཅན་ས་ཡ་བཅོ་ལྔ། དབུགས་གཏོང་འཕྲུལ་ཆས་སོགས་དམག་གི་སྐྱེལ་འདྲེན་གནམ་གྲུ་ཆེན་པོ་ཞིག་ཕྱི་ཟླ་༤་པའི་ཚེས་༣༠་ཉིན་རྒྱལ་ས་ལྡི་ལིའི་གནམ་ཐང་དུ་འབྱོར་འདུག
