བྷུ་ལིན་ཁེན་མཆོག་པེ་ཅིང་དུ་ཕེབས་དུས་རྒྱ་ནག་ལ་བརྡ་ལན་གསལ་པོ་སྤྲད་ཐུབ་པའི་རེ་བལྟོས།

ཨ་རིའི་གཞུང་གིས་སྤྱི་ཟླ་༦ པའི་ཚེས་༡༠ ཉིན་རྒྱ་ནག་གཞུང་གིས་༢༠༡༩ ལོ་ནས་བཟུང་སྟེ་ཀུ་བྷ་རྒྱལ་ཁབ་ཏུ་གསང་མྱུལ་ལྟེ་གནས་ཤིག་གསར་འཛུགས་བྱས་ཡོད་པར་ར་འཕྲོད་བྱུང་ཡོད་ཅིང་། དེ་ནས་སྤྱི་ཟླ་༦ པའི་ཚེས་༡༤ ཉིན་ཨ་རིའི་ཕྱི་སྲིད་དྲུང་ཆེ་བྷུ་ལིན་ཁེན་མཆོག་རིང་མིན་སྤྱི་ཟླ་༦ པའི་ཚེས་༡༦ ཉིན་པེ་ཅིང་དུ་འཚམས་འདྲིར་ཕེབས་རྒྱུ་ཡིན་པ་གསལ་བསྒྲགས་གནང་འདུག། ཨ་རིའི་གྲོས་ཚོགས་ཀྱི་ཕྱི་འབྲེལ་དཔོན་རིགས་ཚོས། རྒྱ་ནག་གཞུང་གིས་ཀུ་བྷ་རྒྱལ་ཁབ་ཏུ་གསང་མྱུལ་ལྟེ་གནས་བཙུགས་ཡོད་པའི་དོན་རྐྱེན་དེས་རིང་མིན་ཕྱི་སྲིད་དྲུང་ཆེ་བྷུ་ལིན་ཁེན་མཆོག་པེ་ཅིང་དུ་ཕེབས་རྒྱུར་འགོག་རྐྱེན་མི་བཟོ་རྒྱུའི་རེ་བ་བརྒྱབ་བཞིན་ཡོད་ཀྱང་། བྷུ་ལིན་ཁེན་མཆོག་གིས་རྒྱ་ནག་གི་དཔོན་རིགས་ཚོ་དང་གནད་དོན་དེའི་ཐད་བཀའ་མོལ་ཕྱི་གསལ་ནང་གསལ་གནང་སྟེ་རྒྱ་ནག་ལ་བརྡ་ལན་གསལ་པོ་སྤྲད་ཐུབ་པའི་རེ་བ་འཆང་བཞིན་འདུག།

གྲོས་ཚོགས་གོང་མའི་ཕྱི་འབྲེལ་ལྷན་ཚོགས་ཀྱི་འགན་འཛིན་བྷོབ་མེ་ནེན་ཊེ་ཟི་Bob Menendez ལགས་ནས་རེས་གཟའ་མིག་དམར་ཉིན་ལ་གསུངས་དོན། རྒྱ་ནག་གཞུང་གིས་ཀུ་བྷ་རྒྱལ་ཁབ་ཏུ་གསང་མྱུལ་ལྟེ་གནས་བཙུགས་ཏེ་ཨ་རིར་དམིགས་ནས་གསང་མྱུལ་གྱི་ལས་དོན་ཅི་རིགས་སྤེལ་དང་སྤེལ་མུས་ཡིན་པའི་སྐོར་ཤེས་རྟོགས་བྱུང་དུས་ཁོ་རང་ཧང་སངས་ཡོད་པ་དང་། སོ་སོའི་མངའ་ཁོངས་སུ་རྒྱ་ནག་ལ་ཨ་རིའི་གསང་བའི་ཆ་འཕྲིན་བསྡུ་རུབ་བྱེད་མཁན་གྱི་ལས་ཁུངས་གསར་འཛུགས་བྱེད་དུ་འཇུག་མཁན་གྱི་ཀུ་བྷ་རྒྱལ་ཁབ་ལ་སོགས་པས་ངེས་པར་དུ་ཤེས་དགོས་པ་ཞིག་ལ། ཨ་རིས་དེ་ནི་འགྲན་སློང་དང་གནད་དོན་གཅིག་པུ་ཞིག་ལ་བརྩིས་ཀྱི་མེད་པར་ཨ་རིས་རྒྱལ་ཁབ་དེ་དག་ལ་སོ་སོས་བསགས་པའི་མཇུག་འབྲས་ལ་འགན་ཁུར་བཅུག་གི་རེད་ཅེས་དང་། ཨ་རིའི་གཞུང་འབྲེལ་ལས་ཁུངས་ཁག་གིས་དོན་རྐྱེན་དེའི་སྐོར་ལ་ཐུགས་སྣང་ཆེན་པོས་ཉན་ཞིབ་ཚོགས་འདུ་འཚོག་ཐུབ་རྒྱུའི་རེ་བ་ཡོད་ཅེས་གསུངས་འདུག།

འོན་ཏེ་རྒྱ་ནག་དང་ཀུ་བྷ་རྒྱལ་ཁབ་གཉིས་ནས་ཨ་རིའི་ཉེས་འཛུགས་དེ་ལ་ངོས་ལེན་རྩ་བ་ནས་བྱས་མེད་ཅིང་། ཀུ་བྷ་རྒྱལ་ཁབ་ཀྱི་ཕྱི་སྲིད་དཔོན་པོ་བྷུ་རུ་ནོ་རོ་ཊྲི་ཀེ་སི་Bruno Rodriguez ཡིས་རེས་གཟའ་ཟླ་བའི་ཉིན་ཨ་རིའི་ཉེས་འཛུགས་དེ་ནི་ཁུངས་མེད་ལུང་མེད་རེད་ཅེས་བསྐྱར་དུ་ནན་བརྗོད་བྱས་ཡོད་པར་མ་ཟད། དེ་ནི་ཝ་ཤིན་ཊོན་གྱིས་ཀུ་བྷ་ལ་ལོ་བཅུ་གྲངས་རིང་ལ་དཔལ་འབྱོར་བཀག་སྡོམ་བྱས་ཡོད་པ་དེ་ད་ཆ་ཁྲིམས་མཐུན་ལུགས་མཐུན་ཆགས་རྒྱུར་ཆེད་དམིགས་ཀྱིས་གཞི་མེད་བསྙད་འདོགས་བྱས་པ་ཞིག་རེད་ཅེས་སྐྱོན་བརྗོད་བྱས་འདུག།

གྲོས་ཚོགས་གོང་མའི་ཕྱི་འབྲེལ་ལྷན་ཚོགས་ཀྱིས་སྤྱི་ཟླ་༦ པའི་ཚེས་༡༤ ཉིན་རྒྱ་ནག་ཏུ་གནས་སྡོད་ཨ་རིའི་གཞུང་ཚབ་ནཱི་ཀུ་ལ་སི་བྷེན་སིNicholas Burns ལགས་དང་ཨ་རྒྱ་གཉིས་དབར་ད་ཡོད་ཀྱི་གནས་སྟངས་སྐོར་ནས་གསང་བའི་ཚོགས་འདུ་ཞིག་སྐོང་འཚོགས་གནང་འཆར་ཡོད་ཅིང་། ཚོད་དཔག་བྱས་པ་ལྟར་ན་ད་རེས་ཚོགས་འདུའི་ཐོག་རྒྱ་ནག་གིས་དབུས་ལྷོ་ཨ་མེ་རི་ཁའི་གླིང་ཆེན་དུ་སྟོབས་ཤུགས་རྒྱ་བསྐྱེད་བྱེད་བཞིན་པའི་གནད་དོན་ཐད་གླེང་སློང་བྱ་སྲིད་པ་རེད་འདུག།

གྲོས་ཚོགས་གོང་མའི་ཕྱི་འབྲེལ་ལྷན་ཚོགས་ཀྱི་འགན་འཛིན་བྷོབ་མེ་ནེན་ཊེ་ཟི་Bob Menendez ལགས་ནས་རིང་མིན་ཕྱི་སྲིད་དྲུང་ཆེ་བྷུ་ལིན་ཁེན་མཆོག་པེ་ཅིང་དུ་འཚམས་འདྲིར་ཕེབས་རྒྱུ་ལམ་ལྷོང་ཡོང་བའི་རེ་བ་ཡོད་པ་དང་། བྷུ་ལིན་ཁེན་མཆོག་གིས་གོ་སྐབས་དེ་བརྒྱུད་ནས་རྒྱ་ནག་གི་དཔོན་རིགས་ཚོ་ལ་རྒྱ་ནག་གིས་ཀུ་བྷ་རྒྱལ་ཁབ་ཏུ་གསང་མྱུལ་ལྟེ་གནས་བཙུགས་པ་ནི་ཨ་རིའི་མངའ་ཁོངས་བདག་དབང་དང་རྒྱལ་ཁབ་བདེ་འཇགས་ལ་ཕོག་ཐུག་བཏང་བའི་བྱ་སྤྱོད་ཅིག་རེད་ཅེས་བརྡ་ལན་གསལ་པོ་སྤྲད་ཐུབ་རྒྱུའི་རེ་བ་ཡོད་ཅེས་གསུངས་འདུག།

དེ་བཞིན་དུ་ཨིན་ཌི་ཨན་ནཱ་མངའ་སྡེ་ནས་ཡིན་པའི་གྲོས་ཚོགས་གོང་མའི་སྤྱི་མཐུན་ཚོགས་པའི་འཐུས་མི་སྐུ་ཞབས་ཐོ་ཌི་དབྱང་Todd Young ལགས་ནས་ཀྱང་ད་རེས་བྷུ་ལིན་ཁེན་མཆོག་གིས་པེ་ཅིང་ལ་གོང་འཁོད་གནད་དོན་སྐོར་ནས་ཨ་རིའི་ལངས་ཕྱོགས་གསལ་པོ་འཛིན་ཐུབ་རྒྱུ་ནི་ཧ་ཅང་གལ་འགངས་ཆེན་པོ་ཡིན་པར་འདོད་དེ། ཨ་རིའི་གཞུང་དམངས་གཉིས་ནས་རྒྱལ་ཁབ་གཞན་གྱིས་བཙན་འཛུལ་རང་བཞིན་དང་གསང་མྱུལ་ལྟ་སྐུལ་གྱི་བྱ་སྤྱོད་སྤེལ་བ་ལ་འགོག་སྲུང་ནན་མོ་བྱ་རྒྱུའི་ལངས་ཕྱོགས་བརྟན་པོ་ཡོད་པའི་སྐོར་ནན་བརྗོད་གནང་དགོས་ཤིང་། ལྷག་པར་དུ་བདུན་ཕྲག་འགའ་ཤས་སྔོན་ཙམ་ལ་རྒྱ་ནག་གིས་ཨ་རིའི་མངའ་ཁོངས་སུ་གསང་མྱུལ་ལྒང་བུ་མངགས་གཏོང་བྱས་པ་དེ་ལ་ཡང་བརྡ་ལན་ནུས་ཤུགས་དང་ལྡན་པ་ཞིག་སྤྲད་དགོས་ཀྱི་འདུག་ཅེས་གསུངས་འདུག།

གཞན་ཡང་ཨ་རིའི་གྲོས་ཚོགས་ཀྱི་སྲིད་དོན་ཚོགས་པ་གཉིས་ཆ་ནས་ཡིན་པའི་འཐུས་མི་ཚོས་རྒྱ་ནག་དང་གྲོས་མོལ་བྱ་རྒྱུ་ནི་དགོས་ངེས་ཤིག་ཡིན་པར་འདོད་ཀྱང་། གྲོས་མོལ་བྱས་ན་གྲུབ་འབྲས་དོན་ཕན་ལྡན་པ་ཞིག་ཐོབ་ཐུབ་རྒྱུར་སེམས་ཤུགས་དེ་ཙམ་ཆེན་པོ་མེད་པ་རེད། གྲོས་ཚོགས་གོང་མའི་ཕྱི་འབྲེལ་ལྷན་ཚོགས་ཀྱི་ཨེ་ཤེ་ཡ་ཞི་བདེ་རྒྱ་མཚོ་མངའ་ཁུལ་གྱི་ལས་དོན་ཚོགས་ཆུང་གི་འགན་འཛིན་ཁི་ཨི་སི་ཝེན་ཧོ་ལེན་Chris Van Hollen ལགས་ནས་རེས་གཟའ་མིག་དམར་ཉིན་ཨ་རིའི་རླུང་འཕྲིན་ཁང་ལ་གསུངས་དོན་ལ། ཉེ་ཆར་རྒྱ་ནག་གིས་ཨ་རིའི་རྒྱལ་སྲུང་དཔོན་པོ་ལོའེ་ཊེ་ཨོ་སི་ཐིང་ལགས་དང་གྲོས་མོལ་བྱས་མེད་པ་དེས་རྒྱ་ནག་གི་ལངས་ཕྱོགས་གསལ་པོ་མངོན་ཡོད། གྲོས་མོལ་རིགས་དེ་བསམ་ཡུལ་ལས་འདས་པ་དང་བཀྲ་མ་ཤིས་པའི་དོན་རྐྱེན་སྔོན་འགོག་བྱ་རྒྱུར་མཚོན་ན་ཧ་ལས་པ་གལ་ཆེན་པོ་རེད། དེ་བས་ད་རེས་བྷུ་ལིན་ཁེན་མཆོག་པེ་ཅིང་དུ་ཕེབས་དུས་གནད་དོན་དེ་དག་ཐག་གཅོད་ཡག་པོ་ཞིག་གནང་ཐུབ་པའི་རེ་བ་ཡོད་ཅེས་གསུངས་འདུག།

ཕོ་བྲང་དཀར་པོའི་རྒྱལ་ཁབ་བདེ་འཇགས་ལྷན་ཚོགས་ཀྱི་ཨིན་རྡུལ་ཞི་བདེ་རྒྱ་མཚོའི་མངའ་ཁུལ་གྱི་ལས་དོན་མཐུན་སྦྱོར་བ་ཁེར་ཊི་ཁམ་བྷེལ་Kurt Campbell ལགས་ནས་ཀྱང་བདུན་ཕྲག་གོང་མའི་ཧྭ་ཌི་སོན་ཉམས་ཞིབ་ཁང་Hudson Institute གིས་བགྲོ་གླེང་ཚོགས་འདུ་ཞིག་གི་ཐོག ཨ་རིས་གྲང་དམག་སྐབས་དང་འདྲ་བའི་ཉམས་ཉེས་ལ་འགོག་སྲུང་བྱ་ཆེད་རྒྱ་ནག་དང་གྲོས་མོལ་གྱི་ལམ་ཁ་ཞིག་འཚོལ་བཞིན་ཡོད་ཅེས་གསུངས་འདུག།

དེ་དང་ཆབས་ཅིག་ཨ་རིའི་གྲོས་ཚོགས་གོང་མའི་གསང་བའི་ལྷན་ཚོགས་ཀྱི་ཚོགས་མི་དང་ཐ་ཁེ་ས་སི་མངའ་སྡེ་ནས་ཡིན་པའི་སྤྱི་མཐུན་ཚོགས་པའི་འཐུས་མི་ཇཱོན་ཁོར་ནི་John Cornyn ལགས་ནས་འདི་གར་ཨ་རིའི་རླུང་འཕྲིན་ཁང་ལ་གསུངས་དོན། ད་ལྟའི་བར་དུ་རྒྱ་ནག་གིས་ཨ་རི་དང་མཉམ་ལས་དོན་དང་ལྡན་པ་ཞིག་བྱ་འདོད་ཡོད་པའི་རྣམ་འགྱུར་མཐོང་མ་སོང་། རྒྱལ་ཁབ་ཕྱོགས་གཉིས་བར་དོན་མེད་ཟིང་འཁྲུག་མི་ཡོང་བའི་ཆེད་དུ་གྲོས་མོལ་གྱི་ལམ་ཁ་བརྒྱུད་ནས་ཕན་ཚུན་རྒྱུས་ལོན་དང་བསམ་ཤེས་བྱ་རྒྱུ་དེ་དོན་དག་ཡག་པོ་རེད། བྷ་ཌན་འཛིན་སྐྱོང་གཞུང་གིས་དེའི་ཐད་ལ་འབད་བརྩོན་མང་པོ་བྱེད་བཞིན་ཡོད། ཡིན་ན་ཡང་ད་ཕན་གྲུབ་འབྲས་གང་ཡང་ཐོབ་མེད་པ་རེད་ཅེས་གསུངས་འདུག།

ཝེར་ཇི་ནི་ཡ་མངའ་སྡེ་ནས་ཡིན་པའི་གྲོས་ཚོགས་གོང་མའི་དམངས་གཙོ་ཚོགས་པའི་འཐུས་མི་ཐིམ་ཁའེ་ནི་Tim Kaine ལགས་ནས་གྲུབ་འབྲས་ཐོབ་ཐུབ་མིན་ལ་མ་བལྟོས་པར་གང་ལྟར་གྲོས་མོལ་གྱི་ལམ་ཁ་འཚོལ་བཞིན་པ་དེ་བཟང་ཕྱོགས་ཀྱི་འགྱུར་ལྡོག་ཅིག་རེད། གྲོས་མོལ་བྱས་པ་ཙམ་གྱིས་དོན་དག་གྲུབ་ཐུབ་པར་མི་ཁྱབ། ཡིན་ན་ཡང་གལ་སྲིད་གྲོས་མོལ་གྱི་ལམ་ཁ་ཆད་པ་ཡིན་ན་གནད་དོན་གང་ཡང་འབྱུང་སྲིད་པ་ཞིག་རེད། དེ་བས་རྒྱ་ནག་གཞུང་གིས་ཨ་རི་དང་གྲོས་མོལ་གྱི་ལམ་ཁ་ཕྱེ་ཐུབ་རྒྱུ་ནི་ཁོའི་རེ་བ་ཡིན་ཞེས་གསུངས་འདུག།

གྲོས་ཚོགས་གོང་མའི་ཕྱི་འབྲེལ་ལྷན་ཚོགས་ཀྱི་འགན་འཛིན་བྷོབ་མེ་ནེན་ཊེ་ཟི་Bob Menendez ལགས་ནས་འདི་གར་ཨ་རིའི་རླུང་འཕྲིན་ཁང་ལ། རྒྱ་ནག་གཞུང་གིས་ད་བར་རིང་མིན་ཕྱི་སྲིད་དྲུང་ཆེ་བྷུ་ལིན་ཁེན་མཆོག་པེ་ཅིང་དུ་འཚམས་འདྲིར་ཕེབས་རྒྱུའི་སྐོར་ལ་སྣང་མེད་དང་ཁ་ཡ་མི་བྱེད་པའི་རྣམ་འགྱུར་བསྟན་པ་དེ་ནི། གལ་སྲིད་ཨ་རིས་ང་ཚོ་དང་འགྲན་རྩོད་བྱེད་པ་ཡིན་ན། ང་ཚོས་ཨ་རི་དང་མཉམ་ལས་བྱ་རྒྱུ་མིན་ཞེས་བརྡ་ལན་སྤྲད་པ་ཞིག་དང་འདྲ་པོ་ཆགས་འདུག་ཅེས་གསུངས་འདུག།