རྒྱ་ནག་གི་ཕྷོ་ཅན་ཞིང་ཆེན་གྱི་ཕཱིང་ཐན་ས་ཁུལ་ནི་ཐེ་ཝན་དང་ཁ་སྤྲོད་དུ་གནས་པ་ཞིག་ཡིན་པས་འདི་ཁུལ་དུ་ཕྱི་ཟླ་༡༠པའི་ཚེས་༢༢རེ་གཟའ་མིག་དམར་ཉིན་རྒྱ་ནག་གི་བཅིངས་བཀྲོལ་དམག་མིས་གོ་མཚོན་དངོས་བེད་སྤྱོད་ཀྱི་དངོས་གཞིའི་དམག་སྦྱོང་བྱས་ཡོད་པ་དང་དེ་ཉིན་ཞོགས་པའི་ཚོུད་༩་པ་ནས་ཉིན་དགུང་ཚོུད་༡་པོའི་བར་དུ་འགྲོ་འོང་བཀག་འགོག་གིས་ཚོུད་བཞིའི་རིང་དངོས་གཞིའི་དམག་སྦྱོང་བྱས་ཡོད་པ་དང་དམག་སྦྱོང་དེའི་དམིགས་ཡུལ་གང་ཡིན་སོགས་འགྲེལ་བརྗོད་གང་ཡང་བྱས་མེད་པ་རེད།
ཡིན་ནའང་དེའི་ཉིན་གཉིས་ཀྱི་གོང་སྟེ་ཕྱི་ཚེས་༢༠ཉིན་མོ་ཨ་རི་དང་ཁེ་ན་ཌའི་དམག་གི་གྲུ་གཟེངས་གཉིས་ནས་ཐེ་ཝན་གྱི་མཚོ་ཐོག་ཏུ་སྐོར་གཡེང་བྱས་ཡོད་པ་དང་ཐེ་ཝན་གྱི་རྒྱལ་སྲུང་ལྷན་ཁང་ནས་ཨ་རི་དང་ཁེ་ན་ཌའི་དམག་གི་གྲུ་གཟེངས་ཀྱི་སྐོར་གཡེང་དེ་ནི་དམངས་གཙོ་སྲུང་སྐྱོབ་ཆེད་ཀྱི་མནའ་མཐུན་རྒྱལ་ཁབ་ཚོས་ལག་ལེན་དངོས་ཀྱི་ཐོག་ནས་ཐེ་ཝན་གྱི་བདེ་འཇགས་སྲུང་སྐྱོབ་ཀྱི་ཆོད་སེམས་བརྟན་པོ་མཚོན་ཐབས་རེད་ཅེས་དང་ཡང་ཨ་རིའི་མཚོ་དམག་དམག་སྤྱི་ཁང་ནས་དེའི་ཐད་གསལ་བསྒྲགས་སྤེལ་བའི་ནང་ཨ་རི་དང་ཁཱེ་ན་ཌའི་མཚོ་དམག་གྲུ་གཟེངས་ཆེ་ཤོས་གཉིས་ཀྱི་སྐོར་གཡེང་དེ་ནི་འདི་ཁུལ་གྱི་རྒྱལ་སྤྱིའི་མཚོ་ལམ་གྱི་འགྲུལ་སྐྱོད་ཁག་ཁྲིམས་དང་མཐུན་པའི་ཐོག་ནས་བྱེད་རྒྱུའི་རང་དབང་སྲུང་སྐྱོབ་ཆེད་དུ་ཡིན་པ་དང་།ཨ་རིའི་མཚོ་དམག་གྲུ་གཟེངས་ནས་ལོ་ལྟར་སྐོར་གཡེང་དེ་ལྟ་བུ་བྱེད་ཀྱི་ཡོད་པ་དང་སྐབས་རེ་མནའ་མཐུན་རྒྱལ་ཁབ་གཞན་དང་མཉམ་འབྲེལ་ཐོག་ནས་བྱེད་ཀྱི་ཡོད་ཅེས་བཀོད་ཡོད་པ་རེད།
རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པ་ལིང་ཅའན་གྱིས་ཚེས་༢༡་ཉིན་མོ་དེའི་ཐད་ལ་ལན་འདེབས་ཤིག་བྱེད་སྐབས་ཐེ་ཝན་གྱི་གནད་དོན་དེ་ནི་མཚོ་ཐོག་གི་འགྲུལ་སྐྱོད་རང་དབང་གི་གནས་ཚུལ་ཞིག་མ་ཡིན་པར་རྒྱ་ནག་གི་བདག་དབང་དང་མེས་རྒྱལ་གོང་བུ་གཅིག་འགྱུར་གྱི་གནད་དོན་ཞིག་ཡིན་པས་རྒྱལ་ཁབ་སུ་རུང་ཞིག་གིས་འགྲུལ་སྐྱོད་རང་དབང་སྐོར་བརྗོད་དེ་རྒྱ་ནག་གི་བདག་དབང་དང་བདེ་འཇགས་ལ་གནོད་འཚེ་བཟོ་རྒྱུར་ངོ་རྒོལ་ཡོད་ཅེས་ལན་འདེབས་བྱས་ཡོད་པ་རེད།
རྒྱ་ནག་གཞུང་ནས་ཐེ་ཝན་མཚོ་གླིང་ཁུལ་གྱི་རྒྱ་མཚོའི་ས་ཐིག་ཁག་ནི་རྒྱལ་སྤྱིའི་མཚོ་ཐོག་གི་ས་ཐིག་ཁོངས་མིན་པ་དང་ཐེ་ཝན་ནི་རྒྱ་ནག་གི་མངའ་ཁུངས་ཡིན་ལུགས་སོགས་བརྗོད་ཀྱི་ཡོད་ནའང་ཐེ་ཝན་དང་ཨ་མི་རི་ཀ་སོགས་ནས་རྒྱ་ནག་གི་བཤད་སྲོལ་དེར་ངོས་ལེན་གནང་གི་ཡོད་པ་རེད།
ཐེ་ཝན་གྱི་རྒྱལ་སྲུང་ལྷན་ཁང་ནས་གཟའ་མིག་དམར་ཉིན་མོའི་རྒྱ་ནག་གི་དངོས་གཞིའི་དམག་སྦྱོང་དེ་ནི་ལོ་རེའི་རྒྱུན་ལྡན་གྱི་དམག་སྦྱོང་གི་ཆ་ཤས་ཤིག་ཡིན་སྲིད་ཀྱང་རྒྱ་ནག་ནས་ཐེ་ཝན་ཐོག་ལ་སྡིག་སྐུལ་ཤུགས་ཆེ་རུ་གཏོང་བཞིན་པ་མཚོན་གྱི་ཡོད་ཅེས་གསལ་བསྒྲགས་སྤེལ་ཡོད་པ་རེད།
རྒྱ་ནག་ནས་འདས་པའི་ལོ་གཉིས་ལྷག་ཙམ་ནང་ཐེ་ཝན་ལ་དམིགས་ནས་གཞི་རྒྱ་ཆེ་བའི་དམག་སྦྱོང་ཐེངས་བཞི་ཙམ་བྱས་ཡོད་པས་ཐེ་ཝན་ཐོག་ལ་དམག་བརྒྱབ་རྒྱུའི་གྲ་སྒྲིག་ཡིན་སྲིད་པ་མི་མང་པོར་དོགས་པ་ཡོང་གི་ཡོད་པ་རེད།
རྒྱ་ནག་གི་གཞི་རྒྱ་ཆེ་བའི་དམག་སྦྱོང་གསར་ཤོས་དེ་ཕྱི་ཟླ་༡༠པའི་ཚེས་༡༤ཉིན་མོ་བྱས་ཡོད་པ་དང་ཉིན་གཅིག་གི་དམག་སྦྱོང་དེའི་སྐབས་སུ་དམག་གི་གནམ་གྲུ་༡༥༣དང་མཚོ་དམག་གྲུ་གཟེངས་༡༤ཙམ་ཞིག་ཡོད་པ་དང་དམག་སྦྱོང་དེ་ནི་ཐེ་ཝན་གྱི་ཁ་འབྲལ་བར་དམིགས་པ་ཞིག་ཡིན་པའི་སྐོར་རྒྱ་ནག་གི་གཞུང་འབྲེལ་ཚགས་ཤོག་ཁག་གིས་གནས་ཚུལ་སྤེལ་ཡོད་པ་རེད།
དེ་ཡང་ཐེ་ཝན་གྱི་སྲིད་འཛིན་ལེའེ་ཆིན་དཱ་ཡིས་རྒྱལ་སྟོན་དུས་ཆེན་གྱི་གསུང་བཤད་ནང་རྒྱ་ནག་དང་ཐེ་ཝན་གཉིས་ཁག་ཁག་ཡིན་པ་དང་རྒྱ་ནག་ལ་ཐེ་ཝན་གྱི་ཚབ་བྱེད་པའི་དབང་ཆ་མེད་པ་སོགས་གཏམ་བཤད་གནང་བ་དེར་རྒྱ་ནག་གཞུང་ནས་ཁོང་ཁྲོ་ཆེན་པོ་བྱེད་བཞིན་ཡོད་པ་རེད།
གླེང་སྟེགས།