༄༅།། ཀྱེ་ན་ཌའི་གཞུང་གིས་དེ་སྔོན་ཕྱི་ལོ་༡༩༥༠ང་གྲངས་དང་༦༠རེ་གྲངས་ཀྱི་ནང་ཡུལ་དེའི་མངའ་སྡེ་ཀྱུ་བྷེག་གི་བྱང་ཕྱོཌ་ཀྱི་གདོད་མའི་མི་རིགས་ཨི་ནུད་ཀྱི་དྲུད་འཐེན་གྱི་ཁྱི་སྡེབ་གསོད་བྱས་ཡོད་པར་དབུས་གཞུང་གིས་གཟའ་སྤེན་པའི་ཉིན་དགོངས་སེལ་ཞུས་པ་དང་སྦྲགས། མི་རིགས་དེར་ནོར་སྲིད་དཔལ་འབྱོར་གྱི་གུན་སྲབ་རོགས་རམ་སྤྲད་རྒྱུའི་གསལ་སྒྲཌ་གནང་འདུག མངའ་སྡེའི་ཉེན་རྟོག་པ་ཚོས་ཨི་ནུད་མི་རིགས་ཀྱི་དྲུད་འཐེན་གྱི་ཁྱི་སྡེབ་གསོད་བཏང་བར་ཁོང་ཚོས་ཁྱི་ར་བརྒྱབ་རྒྱུ་དང་། ཕར་ཚུར་འགྲུལ་བཞུད་བྱ་རྒྱུར་ཁོང་ཚོས་བེད་སྤྱོད་བྱས་པའི་རྒྱུན་སྲོལ་གྱི་མཐུན་རྐྱེན་རྩ་བརླག་ཏུ་ཕྱིན་ཡོད་པ་རེད།
དབུས་གཞུང་གིས་མི་རིགས་དེར་གུན་སྲབ་ཀྱེ་ན་ཌའི་ཌོ་ལར་ས་ཡ་༤༥སྤྲད་རྒྱུའི་གསལ་བསྒྲགས་གནང་རྒྱུར་དབུས་གཞུང་གི་གདོད་མའི་མི་རིགས་ཀྱི་བདེ་དོན་ལྷན་ཁང་གི་བློན་ཆེན་སྐུ་ཞབས་ཨ་ནནྡ་སང་གྷ་རི་ཆེད་མངགས་གདོད་མའི་མི་རིགས་དེའི་ས་གནས་ཀང་ཀིག་ལ་ཆེད་མངགས་ཕེབས་བསྐྱོད་གནང་འདུག
ད་རེས་ཀྱི་དགོངས་སེལ་དེ་ནི་ཡུལ་དེའི་དབུས་གཞུང་གིས་དེ་སྔོན་ཕྱི་ལོ་༢༠༡༩འི་ལོར་ཀི་ཀིག་ས་གནས་ཀྱི་ཨི་ནུད་མི་རིགས་ཚོར་དགོང་སེལ་ཞུས་ཡོད་པའི་རྗེས་སུ་ཞུས་པ་ཞིག་ཡིན་པ་དང་། སྐུ་ཞབ་ས་ཨ་ནནྡ་སང་གྷ་རི་ཡིས་རེས་གཟའ་སྤེན་པའི་ཉིན་ཀང་གིག་གི་ཨི་ནུད་མི་རིགས་ཚོར་གསུང་བཤད་གནང་བའི་སྐབས་ ང་ཚོ་ཀྱེ་ན་ཌའི་དབུས་གཞུང་གིས་ཁྱེད་ཚོའི་དྲུད་འཐེན་གྱི་ཁྱི་སྡེབ་གསོད་བཏང་སྟེ་ཁྱེད་ཚོར་དཀའ་ངལ་ཆེན་པོ་བཟོས་ཡོད་པར་གཞུང་གིས་ད་ཆ་སྙིང་ཐག་པ་ནས་དགོངས་སེལ་ཞུ་གི་ཡོད། ང་ཚོས་ཁྱེད་ཚོར་དགོངས་སེལ་ཞུ་རྒྱུར་འགོར་གཞི་ཆེན་པོ་བྱུང་ཡོད་པ་དེར་ཡང་དགོངས་སེལ་ཞུ་གི་ཡོད་ཅེས་གསུངས་འདུག
ཀྱེ་ན་ཌའི་ཀྱུ་བྷེག་མངའ་སྡེའི་ཨི་ནུད་མི་རིགས་ཀྱི་བདེ་དོན་ཚོཌ་པའི་ཚོགས་གཙོ་པི་ཊ་ཨ་ཏ་མི་ཡིས་གསར་འགོད་པ་ཚོར་བཀའ་མོལ་གནང་བའི་སྐབས་ ཀྱེ་ན་ཌའི་རྟ་ཐོག་གི་ཉེན་ཟློག་པ་ཚོས་དེ་སྔོན་ཕྱི་ལོ་༡༩༥༠ང་གྲངས་དང་༦༠རེ་གྲངས་ཀྱི་ནང་ང་ཚོའི་མི་མང་གི་དྲུད་འཐེན་ཁྱི་སྟོང་ཕྲག་མང་པོར་མེ་མདའ་བརྒྱབས་ཏེ་དམར་བསད་བཏང་ཡོད་རེད་ཅེས་གསུངས་འདུག
དྲུད་འཐེན་གྱི་ཁྱི་དེ་ཚོ་ནི། ཨི་ནུད་མི་རིགས་ཚོས་ཀྱེ་ན་ཌ་བྱང་ཕྱོཌ་ཀྱི་ཁྱག་རོམ་གྱི་ཐོག་འགྲུལ་ཞུད་བྱ་རྒྱུར་བེད་སྤྱོད་བྱེད་པ་དང་། ཁྱི་ར་བརྒྱབས་རྒྱུར་བེད་སྤྱོད་ཆེན་པོ་ཡོད་པའི་མི་རིགས་དེའི་རིག་གཞུང་གི་ཆ་ཤས་ཤིག་ཡིན་པ་དང་། གཞུང་གིས་བསམ་མེད་ཀྱི་ཐོག་ནས་དྲུད་འཐེན་གྱི་ཁྱི་དེ་ཚོ་བསད་པ་དེས་ནུ་ན་ཝིག་ཟེར་བའི་ཨི་ནུད་མི་རིགས་ཐེ་བས་ཨི་ནུད་མི་རིགས་སྤྱི་ཡོངས་ལ་བཟའ་ཆས་དང་། དཔལ་འབྱོར་གྱི་ཐོག་དཀའ་ངལ་ཆེན་པོ་བཟོས་ཏེ་མི་རིགས་དེར་བསམ་བློའི་ཐོག་རྨ་ཁ་ཆེན་པོ་ཞིག་བཟོས་ཡོད་པ་རེད།
ཨི་ནུད་མི་རིགས་ཀྱི་འགོ་འཁྲིད་ཨ་ཏ་མི་ཡིས་གསར་འགོད་པ་ཚོར་སྐད་ཆ་ཤོད་པའི་སྐབས་ གཞུང་གིས་ང་ཚོའི་དྲུད་འཐེན་གྱི་ཁྱི་དེ་ཚོ་བསད་པ་དེས་ཁོང་ཚོས་ང་ཚོའི་འགྲོ་འདུག་སྤྱོད་གསུམ་གྱི་རང་དབང་བཙན་འཕྲོག་བྱས་ཡོད་པས་ཁོང་ཚོིས་ང་ཚོར་དགོངས་སེལ་ཞུ་རྒྱུ་ཕྱིས་དྲག་པ་ཞིག་རེད། གཞུང་གིས་ང་ཚོ་ཨི་ནུད་མི་རིགས་ཚོས་མི་རབས་མང་པོར་མྱང་དགོས་པའི་དཀའ་ངལ་ཆེན་པོ་བཟོས་ཡོད་རེད་ཅེས་གསུངས་འདུག
ཀྱེ་ན་ཌའི་ཉེན་ཟློག་སྐོར་སྲུང་བ་ཚོས་དེ་སྔོན་ཕྱི་ལོ་༢༠༠༦གི་ལོར་ཉེན་ཟློག་སྐོར་སྲུང་ལས་ཁང་ནང་ཁུལ་དུ་དྲི་ཞིབ་ཞིག་བྱེད་པའི་སྐབས་ཁོང་ཚོས་སྤྱི་མང་གི་བདེ་འཇགས་སྲུང་སྐྱོབ་ཀྱི་ཆེད་དུ་ཨི་ནུད་མི་རིགས་ཀྱི་དྲུད་འཐེན་གྱི་ཁྱི་དེ་ཚོ་བསད་དགོས་བྱུང་ཡོད་ལུགས་བཤད་དེ་ཉེས་མེད་དག་འབུད་བྱས་ཡོད་པ་རེད།
ཀྱུ་བྷེག་མངའ་སྡེའི་ཉེན་རྟོག་པ་ཚོས་དེ་སྔོན་ཕྱི་ལོ་༡༩༥༠ང་གྲངས་དང་༦༠རེ་གྲངས་ཀྱི་ནང་ཨི་ནུད་མི་རིགས་ཀྱི་དྲུད་འཐེན་གྱི་ཁྱི་ཆིག་སྟོང་ལྷག་ཙམ་སྡེབ་གསོད་བཏང་ཡོད་པར་མངའ་སྡེའི་གཞུང་གིས་ཕྱི་ལོ་༢༠༡༡གི་ལོར་ཨི་ནུད་མི་རིགས་ཚོར་དགོངས་སེལ་ཞུས་པའི་ཐོག་དྲུད་འཐེན་གྱི་ཁྱི་དེ་ཚོའི་བདག་པར་གུན་སྲབ་ཌོ་ལར་ས་ཡ་སྤྲད་ཡོད་པའི་གནས་ཚུལ་ཐོན་འདུག
གླེང་སྟེགས།