༄༅།། རྒྱ་གར་གྱི་གྲོས་ཚོགས་གོང་མ་སྟེ། ར་ཇ་ས་བྷའི་ནང་དུ་འབྲས་ལྗོངས་མངའ་སྡེར་འཐུས་མི་གཅིག་གི་གདན་ཐོབ་ཡོད་པ་དེར་འགྲན་རྩོད་ཅི་ཡང་མེད་པར་བྷེ་ཇཱེ་པི་གཞུང་འཛིན་ཚོགས་པའི་ཚོགས་མི་ལེབ་ཅ་བ་ཚེ་རིང་རྡོ་རྗེ་ལ་ཐོབ་ཡོད་པའི་གནས་ཚུལ་ཐོན་འདུག རྒྱ་གར་གྱི་དར་འཕྲིན་ཚགས་པར་ལ་གནས་ཚུལ་ཐོན་པ་ལྟར་ན། ལེབ་ཅ་བ་ཚེ་རིང་རྡོ་རྗེར་འབྲས་ལྗོངས་ཀྱི་གཞུང་འཛིན་ཀ་རན་ཏི་ཀ་རི་མོར་ཆ་ཚོགས་པས་ཀྱང་རྒྱབ་སྐྱོར་བྱས་འདུག འབྲས་ལྗོངས་མངའ་སྡེའི་བྷི་ཇཱེ་པི་ཚོགས་པའི་གཙོ་འཛིན་འབུམ་རམས་པ་ཐ་པས་འབྲས་ལྗོངས་མངའ་སྡེའི་གཞུང་འཛིན་ཀ་རན་ཏི་ཀ་རི་མོར་ཆ་ཚོགས་པས་བྷི་ཇཱེ་པི་ཚོགས་པའི་ཚོགས་མི་ཚེ་རིིང་རྡོ་རྗེ་གྲོས་ཚོགས་གོང་མའི་འཐུས་མིར་གདམ་རྒྱུ་དེར་རྒྱབ་སྐྱོར་བྱས་པ་བདེན་པ་རེད། སྲིད་དོན་ཚོགས་པ་དེས་འོས་བསྡུའི་དྲིལ་བསྒྲགས་ལས་འགུལ་སྐབས་སུ་འབྲས་ལྗོངས་མི་དམངས་ལ་ཁས་ལེན་དམ་བཅའ་བྱས་པ་རྣམས་བསྒྲུབས་མི་འདུག ད་ལྟའི་འབྲས་ལྗོངས་མངའ་སྡེའི་གཞུང་གིས་མང་ཚོགས་ཀྱི་རེ་བ་སྟོང་ཟད་དུ་བཏང་སོང་ཞེས་སྐྱོན་བཙུགས།།
འབྲས་ལྗོངས་ཀྱི་འོས་བསྡུའི་རྟོག་ཞིབ་འགན་འཛིན་གུ་རོང་ལཱ་ལི་ཏ་ཀུ་མར་གྱིས་ལེབ་ཅ་བ་ཚེ་རིང་རྡོ་རྗེ་རྒྱ་གར་གྱི་གྲོས་ཚོགས་གོང་མའི་འཐུས་མིར་འདེམས་ཐོན་བྱུང་བའི་དཔང་ཡིག་སྤྲད། འབྲས་ལྗོངས་མངའ་སྡེའི་བྷི་ཇཱེ་པི་ཚོགས་པའི་གཙོ་འཛིན་ཐ་པས་མངའ་སྡེ་དེའི་གཞུང་འཛིན་ཚོགས་པའི་ལས་དོན་སྒྲུབ་ཕྱོགས་ལ་ནུས་པ་ཐོན་གྱི་མི་འདུག ཁོ་ཚོས་འོས་འདེམས་དུས་སུ་མི་དམངས་ལ་ལས་ཀ་བཀོད་སྒྲིག་བྱ་རྒྱུ་དང་ལྐོག་ཟ་རུལ་སུངས་མེད་པར་གཏོང་རྒྱུ་ཡིན། མངའ་སྡེའི་གྲོས་ཚོགས་སུ་ལིམ་བྷུ་བ་དང་རྟ་མང་བ་ཚོར་གདན་གྲངས་ཟུར་འཇོག་བྱ་རྒྱུ་ཡིན། ཁོ་ཚོར་ཚོ་ཤོག་ཁག་གི་ཐོབ་ཐང་འདྲ་མཉམ་སྤྲོད་རྒྱུ་ཡིན་ཞེས་ཁས་ལེན་བྱས་པ་རྣམས་ཁ་སྟོང་ཚིག་སྟོང་དུ་གྱུར་ནས་ལག་ལེན་བསྟར་མི་འདུག འདས་པའི་ལོ་བཞིའི་རིང་འབྲས་ལྗོངས་མངའ་སྡེར་ཕྱོགས་གང་ཐད་དུ་ཡར་རྒྱས་འདོད་བློ་ཚིམས་པ་ཞིག་གཏན་ནས་ཕྱིན་མེད་པ་ནི་དོན་དངོས་ཤིག་རེད་ཅེས་སྐྱོན་བརྗོད་བྱས་འདུག
༢༠༡༩་ལོར་འབྲས་ལྗོངས་ལ་མངའ་སྡེའི་གྲོས་ཚོགས་འཐུས་མི་རྣམས་འོས་བསྡུ་བྱས་པའི་སྐབས་སུ་བྷི་ཇཱེ་པི་གཞུང་འཛིན་ཚོགས་པར་འོས་བསྡུའི་རྒྱལ་ཁ་མ་ཐོབ། ད་ལྟ་འབྲས་ལྗོངས་ཀྱི་མངའ་སྡེའི་གྲོས་ཚོགས་སུ་བྷི་ཇཱེ་པི་ཚོགས་པར་འཐུས་མི་༡༢་ཡོད་མོད། དེ་ནི་འོས་བསྡུའི་རྗེས་སུ་ལེབ་ཅ་བ་སོགས་ཚུད་པའི་འབྲས་ལྗོངས་ཀྱི་དམངས་གཙོ་མདུན་སྐྱོད་ཚོགས་པའི་འཐུས་མི་༡༠་ཐམ་པ་བྷི་ཇཱེ་པི་ཚོགས་པའི་ཁོངས་སུ་ཞུགས་ནས་ཐོབ་པ་ཞིག་ཡིན་ཞིང་། དེའི་གཞུག་གི་འོས་བསྡུ་ཁག་གི་སྐབས་སུ་བྷི་ཇཱེ་པི་ཚོགས་པར་འབྲས་ལྗོངས་ཀྱི་ཀ་རན་ཏི་ཀ་རི་མོར་ཆ་ཚོགས་པས་རྒྱབ་སྐྱོར་བྱས་ནས་གནད་གྲངས་༢་གསར་དུ་ཐོབ། འབྲས་ལྗོངས་ཀྱི་མངའ་སྡེའི་གྲོས་ཚོགས་ལ་གདན་གྲངས་༣༢་ཡོད་པ་དེའི་ཁོངས་ནས་གཞུང་འཛིན་ཀ་རན་ཏི་ཀ་རི་མོར་ཆ་ཚོགས་པས་འཐུས་མི་༡༩་ཡི་གདན་གྲངས་བཟུང་། འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་ཟུར་པ་པཱ་ཝན་བྱམས་གླིང་གིས་འགོ་ཁྲིད་པའི་འབྲས་ལྗོངས་དམངས་གཙོ་མདུན་སྐྱོད་ཚོགས་པར་འཐུས་མི་༡་ལས་མེད་པའི་གནས་ཚུལ་ཐོན་འདུག
རྒྱ་གར་གྱི་དངུལ་རྩའི་བང་ཆེན་ཚགས་པར་ལ་གནས་ཚུལ་ཐོན་པ་ལྟར་ན། ༢༠༢༤་ལོའི་ཕྱི་ཟླ་༤་པའི་སྔོན་དུ་འབྲས་ལྗོངས་སུ་མངའ་སྡེའི་གྲོས་ཚོགས་ཀྱི་འཐུས་མི་རྣམས་འོས་བསྡུ་བྱ་དགོས་ཤིང་། འབྲས་ལྗོངས་ཀྱི་གྲོས་ཚོགས་སྐབས་༡༠་པ་སྟེ། ༢༠༡༩་ལོའི་ཕྱི་ཟླ་༦་པའི་ཚེས་༣་ནས་ལས་དུས་མགོ་བརྩམས་པའི་འབྲས་ལྗོངས་མངའ་སྡེའི་གྲོས་ཚོགས་འཐུས་མི་ཚོའི་ལས་དུས་དེ་༢༠༢༤་ལོའི་ཕྱི་ཟླ་༦་པའི་ཚེས་༣་ཉིན་མཇུག་བསྒྲིལ་དགོས་པའི་དུས་ཚོད་གཏན་འབེབས་བྱུང་ཡོད་ཅིང་། བྷི་ཇཱེ་པི་ཚོགས་པའི་གཙོ་འཛིན་གྱིས་ལོ་འདིའི་འོས་བསྡུའི་སྐབས་སུ་བྷི་ཇཱེ་པི་ཚོགས་པ་དང་འབྲས་ལྗོངས་ཀྱི་ཀ་རན་ཏི་ཀ་རི་མོར་ཆ་ཚོགས་པ་མཉམ་འབྲེལ་བྱ་འཆར་ཡོད་མེད་གསལ་བསྒྲགས་མ་སྤེལ། སྲིད་དོན་ཉམས་ཞིབ་པ་ཚོས་འབྲས་ལྗོངས་ཀྱི་ཀ་རན་ཏི་ཀ་རི་མོར་ཆ་ཚོགས་པ་དང་བྷི་ཇཱེ་པི་ཚོགས་པ་གཉིས་མཉམ་འབྲེལ་བྱ་རྒྱུའི་ཚོད་དཔག་བྱེད་ཀྱི་ཡོད་པའི་གནས་ཚུལ་ཐོན་འདུག
འབྲས་ལྗོངས་ཀྱི་བྷི་ཇེ་པི་ཚོགས་པའི་གཙོ་འཛིན་ཐ་པས་ང་ཚོའི་སྲིད་དོན་ཚོགས་པར་འབྲས་ལྗོངས་གཅིག་པུ་མ་ཡིན་པར་རྒྱལ་ཡོངས་ལ་དབང་བསྒྱུར་བྱེད་ཐུབ་པའི་ནུས་པ་ཡོད། འབྲས་ལྗོངས་མི་དམངས་ཀྱིས་བྷི་ཇཱེ་པི་ཚོགས་པར་བློ་བཀལ་ནས་སྲིད་དོན་ཚོགས་པ་འདིས་མི་དམངས་ལ་ཁས་ལེན་བྱས་པ་རྣམས་སྒྲུབ་ཐུབ་ཀྱི་ཡོད་པའི་ཡིད་ཆེས་བྱེད་ཀྱི་འདུག་ཅེས་བསྟན། རྒྱ་གར་གྱི་གྲོས་ཚོགས་འོག་མའི་འཐུས་མི་འོས་བསྡུ་དང་མངའ་སྡེའི་གྲོས་ཚོགས་ཀྱི་འཐུས་མི་འོས་བསྡུ་གཉིས་མཉམ་དུ་བྱེད་ཀྱི་ཡོད་པས་འགྲན་རྩོད་ཤུགས་ཆེན་པོ་འབྱུང་རྒྱུའི་རྣམ་པ་ཞིག་ཐོན། ༢༠༡༩་ལོར་འབྲས་ལྗོངས་མངའ་སྡེར་གྲོས་ཚོགས་འཐུས་མི་འོས་བསྡུ་བྱས་པའི་སྐབས་སུ་འབྲས་ལྗོངས་ཀྱི་ཀ་རན་ཏི་ཀར་རི་མོར་ཆ་ཚོགས་པར་འཐུས་མི་གྲངས་མང་གི་རྒྱལ་ཁ་ཐོབ་སྟེ་པ་རེམ་སིང་རྟ་མངའ་སྡེའི་སྤྱི་ཁྱབ་བློན་ཆེན་ལ་བདམས། ཀ་རན་ཏི་ཀར་རི་མོར་ཆ་ཚོགས་པས་མངའ་སྡེའི་སྲིད་གཞུང་བཙུགས།།
འབྲས་ལྗོངས་ཀྱི་འོས་བསྡུ་ཁག་དྲང་སྙོམས་དང་ཕྱི་གསལ་ནང་གསལ་ཞིག་ཡོང་ཐུབ་པའི་ལས་འགན་ཆེན་པོ་ཞིག་གསར་འགོད་པ་དང་གསར་འགྱུར་ལས་ཁུངས་ཁག་ལ་ཡོད་པར་བརྟེན། ཕྱི་ཟླ་དང་པོའི་ཚེས་༡༤་ཉིན་དེ་རིང་གི་རྒྱ་གར་བྱང་ཤར་གསར་ཁང་གིས་གནས་ཚུལ་སྤེལ་བ་ལྟར་ན། འབྲས་ལྗོངས་དང་མོན་ཡུལ་གྱི་གསར་འགྱུར་ལས་ཁུངས་ཁག་གི་གསར་འགོད་པ་༧་ལས་གྲུབ་པའི་རུ་ཁག་ཅིག་ལྡི་ལི་གསར་པར་ཉིན་ལྔའི་ཟབ་སྦྱོང་དུ་བསྐྱོད། ༢༠༢༣་ལོའི་ཕྱི་ཟླ་༡༡་པའི་ཚེས་༡༥་ཉིན་རྒྱ་གར་དབུས་གཞུང་གིས་འབྲས་ལྗོངས་དང་མོན་ཡུལ་གྱི་གསར་འགོད་པ་ཚོར་ལྡི་ལི་གསར་པར་ཟབ་སྦྱོང་སྤྲོད་རྒྱུའི་འཆར་གཞི་བཏོན། རྒྱ་གར་དབུས་གཞུང་གིས་གསར་འགོད་པ་ཚོ་བརྒྱུད་ནས་གཞུང་གི་སྲིད་ཇུས་གལ་འགངས་ཆེ་ཤོས་རྣམས་རྒྱལ་ཡོངས་སུ་ལག་ལེན་བསྟར་ཐབས་དང་གོ་རྟོགས་སྤེལ་ཐུབ་རྒྱུའི་དམིགས་ཡུལ་བཅངས་། དབུས་གཞུང་གི་ཆ་འཕྲིན་དང་རྒྱང་སྲིང་ལས་ཁུངས་ཀྱིས་མངའ་སྡེ་ཁག་གི་གསར་འགོད་པ་ཚོར་གཞུང་གི་སྲིད་ཇུས་དང་འཆར་གཞི། ལས་གཞི་རྣམས་མཚམས་སྦྱོར་ཐུབ་པའི་འབད་འབུངས་བྱེད་བཞིན་པའི་གནས་ཚུལ་ཐོན་འདུག
ཕྱི་ཟླ་དང་པའི་ཚེས་༡༤་ཉིན་དེ་རིང་གི་རྒྱ་གར་བྱང་ཤར་གསར་ཁང་གིས་སླར་ཡང་གནས་ཚུལ་སྤེལ་བ་ལྟར་ན། འབྲས་ལྗོངས་ཀྱི་སྤྱི་ཁྱབ་བློན་ཆེན་པ་རེམ་སིང་རྟ་མང་ཉིན་གཉིས་ལ་ཇན་བྷེ་ཏ་ཀ་རི་ཡཀ་རམ་འདེམས་ཁོངས་ས་གནས་སུ་གཟིགས་ཞིབ་ཏུ་ཕེབས་ནས་ས་གནས་མང་ཚོགས་༣༠༠༠་ལྷག་ལ་ཐུག་འཕྲད་བྱས་པར་མ་ཟད། སྤྱི་ཁྱབ་བློན་ཆེན་པ་རེམ་སིང་རྟ་མང་གིས་ས་གནས་མི་དམངས་ལ་འཕྲོད་བསྟེན་ལྟ་སྐྱོང་དང་སློབ་ཡོན་རོགས་རམ། མི་མང་ལ་ཁང་པ་འཛུགས་སྐྲུན་དང་ལས་ཀའི་ས་མིག་བཀོད་སྒྲིག ས་གནས་མི་དམངས་ལ་མངའ་སྡེ་གཞུང་གིས་དངུལ་སྒོར་བུ་ལོན་བསྐྱིས་ནས་ཚོང་ལས་གཉེར་དུ་འཇུག་རྒྱུའི་ཁས་བླངས། འབྲས་ལྗོངས་ཀྱི་གཞུང་འབྲེལ་མི་སྣ་ཚོས་སྤྱི་ཁྱབ་བློན་ཆེན་པ་རེམ་སིང་རྟ་མང་གི་གཟིགས་ཞིབ་དེར་གྲུབ་འབྲས་ཆེན་པོ་ཐོན་སོང་ཞེས་བསྒྲགས།།
འབྲས་ལྗོངས་མངའ་སྡེའི་ལས་སྣ་ཚོས་སྤྱི་ཁྱབ་བློན་ཆེན་ས་གནས་ས་ཐོག་ཏུ་གཟིགས་ཞིབ་ལ་ཕེབས་ནས་ས་གནས་མང་ཚོགས་ལ་ཕར་བཤད་དང་ཚུར་ཉན་ཡག་པོ་བྱུང་ཡོད། མི་མང་གི་དཀའ་ངལ་རྣམས་སྤྱི་ཁྱབ་བློན་ཆེན་པ་རེམ་སིང་རྟ་མང་གིས་མཉན་པ་ཙམ་མིན་པར་མང་ཚོགས་ཀྱི་དཀའ་ངལ་མང་ཆེ་བ་སེལ་ཐུབ་ཡོད། མི་དམངས་རྣམས་འབྲས་ལྗོངས་ཀྱི་ཀ་རན་ཏི་ཀ་རི་མོར་ཆ་ཚོགས་པའི་འཛིན་སྐྱོང་དང་སྲིད་ཇུས་ལ་བློ་ཁ་ཚིམས་འདུག་ཅེས་བཀྲལ། ཡིན་ནའང་འབྲས་ལྗོངས་མངའ་སྡེའི་བྷི་ཇཱེ་པི་ཚོགས་པའི་གཙོ་འཛིན་སོགས་ཀྱིས་མངའ་སྡེ་དེའི་གཞུང་འཛིན་ཚོགས་པའི་སྲིད་ཇུས་དང་འཆར་གཞི་ཁག་གི་ཉེས་སྐྱོན་ཁོ་ན་བཏོན། ཁོ་ཚོས་སྤྱི་ཁྱབ་བློན་ཆེན་པ་རེམ་སིང་རྟ་མང་གིས་མ་འཇོན་པ་དང་མ་འཐུས་པ་འབག་ཞིག་བགྲངས། ད་ལོའི་འོས་བསྡུར་དམིགས་ནས་འབྲས་ལྗོངས་ཀྱི་སྲིད་དོན་ཚོགས་པ་ཁག་གིས་ཕན་ཚུན་སྐྱོན་བརྗོད་བྱ་རྒྱུ་ད་དུང་སྔར་ལས་ཤུགས་ཆེ་རུ་འགྲོ་སྲིད་པའི་རྣམ་པ་ཞིག་མངོན་ཞེས་གསར་འགྱུར་སྤེལ་འདུག
གླེང་སྟེགས།