༄༅། སྐབས་འདིའི་ཨ་རིའི་སྲིད་འཛིན་གྱི་འོས་བསྡུ་གྲུབ་སྟེ་ སྤྱི་མཐུན་ཚོགས་པའི་ཚོགས་ཁོངས་དེ་སྔའི་སྲིད་འཛིན་ཌོ་ནལ་ཁྲམ་ལ་འོས་བསྡུའི་རྒྱལ་ཁ་ཤུགས་ཆེ་ཐོབ་སྟེ་འདེམས་ཐོན་བྱུང་བའི་རྗེས་ ཁ་ས་གཟའ་ཕུར་བུའི་ཉིན་ལས་ཐོག་སྲིད་འཛིན་འཇཱོ་བྷ་ཌན་གྱིས་ ཕོ་བྲང་དཀར་པོའི་མདུན་ཐང་དུ་ཁོང་གི་ལས་བྱེད་དང་ཚོགས་པའི་གནད་ཡོད་མི་སྣ་ཁག་ཅིག་འདུ་འཛོམས་ཐོག་ཧ་ཅང་གལ་གནད་ཆེ་བའི་གཏམ་བཤད་ཤིག་གནང་ཡོད་པ་དེའི་ནང་ ད་ཆ་ནི་འོས་བསྡུ་གྲུབ་པར་ང་ཚོ་ཚང་མས་འོས་བསྡུའི་གྲུབ་འབྲས་ལ་གུས་བརྩི་དང་ངོས་འཛིན་ཡོངས་སུ་བྱེད་བ་དང་ཆབ་ཅིག་ དགའ་བ་སྒོམ་དགོས་པ་དེ་ནི་ང་ཚོའི་འོས་བསྡུའི་ལམ་ལུགས་འདི་བཞིན་ཚུལ་དང་ལྡན་ལ་ཚགས་ཚུད་ཡོད་པ་དེ་ཡིན།
ང་ཚོའི་ཚོགས་པར་ད་རེས་ཕམ་ཉེས་བྱུང་པ་རེད། ཡིན་ནའི་དེ་ནི་ཕམ་ཁར་ངོས་འཛིན་བྱ་རྒྱུ་མེད།་དེ་ཡིས་ང་ཚོའི་རྒྱལ་ཁབ་འདི་དམངས་གཙོ་སྲ་བརྟན་ཡོད་པ་མངོན་དུ་བསྒྲུབ་ཡོད་པ་རེད་ལ་ ང་རང་ཚོ་ནང་ཁུལ་ལ་དགྲ་ཁ་གཏད་མིན་པར་རྒྱལ་ཁབ་ཀྱི་ཆབ་འབངས་མཐུན་རོགས་ཡིན་པར་ངོས་འཛིན་བྱས་ཏེ་བཟོད་བསྲན་བྱེད་དགོས་ཀྱི་རེད། ཚང་མས་ཆབ་སྲིད་དང་འབྲེལ་བའི་ཐོག་ནས་ཚོར་བའི་ངར་ཤུགས་མར་བཅག་སྟེ་ཞི་འཇམ་དང་མཉམ་ལས་བྱས་ཏེ་རྒྱལ་ཁབ་ཀྱི་མདུན་བསྐྱོད་ཐོག་མུ་མཐུད་དེ་འཐབ་རྩོད་དང་འབད་བརྩོན་བྱེད་བའི་ནང་ལྷོད་ཡང་གཏོང་རྒྱུ་མེད་ཅེས་དང་ ཡང་ཁོང་ནས་སྲིད་འཛིན་འདེམས་ཐོན་པ་ཁྲམ་ལ་རིང་མིན་ཕོ་བྲང་དཀར་པོའི་ནང་ཕེབས་རྒྱུར་མགྲོན་འབོད་གནང་ཡོད་གསུངས་པའི་ཐོག་ལ་ ཁོང་གིས་འབྱུང་འགྱུར་ཕྱི་ལོ་༢༠༢༥འི་ཕྱི་ཟླ་དང་པོའི་ཚེས་༢༠འི་ཉིན་སྲིད་དབང་རྩིས་སྤྲོད་དེ་བཞིན་ཞི་བདེའི་ངང་དང་འབང་སྒྲིག་པོའི་སྒོ་ནས་བྱ་རྒྱུ་ཡིན་ཞེས་ངེས་རྟེན་གསུངས་ཡོད་པ་རེད། དེའི་ཐད་ཁོང་ནས་སྐུ་ཞབས་ཁྲམ་ལ་ད་རེས་འོས་བསྡུའི་རྒྱལ་ཁ་ཐོབ་པའི་ཐོག་ཁ་པར་ཐོག་ནས་དགའ་བསུའི་འཚམས་འདྲི་ཞུས་པའི་སྐབས་སུའང་གསལ་སྟོན་གནང་པ་ཡིན་ཞེས་གསུངས་འདུག
ད་རེས་སྲིད་འཛིན་བྷ་ཌན་གྱིས་ཕོ་བྲང་དཀར་པོའི་ལས་བྱེད་དང་ཁོང་གི་ཚོགས་པའི་གནད་ཡོད་མི་སྣ་བཅས་པར་གཏམ་བཤད་གནང་སྐབས་སུ་ཚང་མས་ཁོང་ལ་ཐུགས་རྗེ་ཆེ་ཞེས་ཞུས་པ་དང་སྦྲགས་དགའ་མོས་ཀྱི་རྣམ་པ་གསལ་པོ་སྟོན་ཡོད་པ་རེད། ཡང་འདུ་འཛོམས་དེའི་ཐོག་སྐུ་ཞབས་བྷ་ཌན་གྱིས་ འབྱུང་འགྱུར་སྐུ་ཞབས་ཁྲམ་གྱིས་སྲིད་འཛིན་གྱི་འགན་དབང་བཞེས་པའི་རྗེས་ད་བར་བྷ་ཌན་གཞུང་གིས་ལག་ལྟར་དང་གཏན་འབེབ་བྱས་པའི་སྲི་ཇུས་མང་པོ་ཞིག་ལ་འཕྲུ་སློག་གཏོང་གཏན་ཡིན་ནའང་ ཚང་མས་སེམས་ཤུགས་མ་ཆག་པ་བྱས་ཏེ་སོ་སོའི་ཡུལ་དང་མི་མང་གི་བདེ་རྩའི་ཆེད་དུ་རྒྱལ་ཁབ་ལ་གཅེས་འཛིན་གྱི་ལས་དོན་མུ་མཐུད་གནང་རོགས་ཅེས་སྐུལ་མ་ཡང་གནང་གཞག། ད་རེས་ལས་ཐོག་སྲིད་འཛིན་བྷ་ཌན་གྱི་བཀའ་མོལ་དེ་ཚོ་ནི་ དེ་སྔ་ཕྱི་ལོ་༢༠༢༠ལོའི་འོས་བསྡུའི་ནང་ཕམ་ཉེས་བྱུང་དུས་སྐུ་ཞབས་ཁྲམ་གྱིས་གནང་སྟངས་དང་ཡོངས་སུ་མི་འདྲ་བ་ཡིན་ཞིང་།
སྐུ་ཞབས་ཁྲམ་གྱིས་ཁོང་ལ་འོས་བསྡུའི་ནང་ཕམ་ཉེས་བྱུང་བར་ངོས་བཞེས་གནང་མེད་པ་མ་ཟད་ འོས་བསྡུའི་ནང་དྲང་བདེན་བྱུང་མི་ལུགས་བརྗུན་གཏམ་རྒྱ་ཆེར་ཁྱབ་སྤེལ་གནང་པའི་ངན་འབྲས་སུ་ ཁོང་གི་རྒྱབ་བསྐྱོར་བ་ཚོས་ཕྱི་ལོ་༢༠༢༡ལོའི་ཕྱི་ཟླ་དང་པོའི་ཚེས་དྲུག་གི་ཉིན་ཨ་རིའི་གྲོས་ཚོགས་ཁང་གི་ཐོག་དྲག་ཟིང་སྤེལ་ཡོད་པ་དང་ ཕྱོགས་མཚུངས་ཕྱི་ལོ་༢༠༢༡ལོ་དེའི་ཟླ་བ་དང་པོའི་ཚེས་༢༠འི་ཉིན་སྐུ་ཞབས་འཇཱོ་བྷ་ཌན་གྱིས་ཨ་རིའི་སྲིད་འཛིན་༤༦པའི་ལས་འཁུར་དམ་བཅའ་འབུལ་བཞེས་ཀྱི་མཛད་སྒོའི་ཐོག་སྐུ་ཞབས་ཁྲམ་གྱིས་མཉམ་ཞུགས་མ་གནང་པར་ངོ་རྒོལ་གྱི་རྣམ་པ་སྟོན་པ་སོགས་བྱུང་བ་མ་ཚད་ ད་དུང་ཡང་ལོ་དེའི་སྲིད་འཛིན་འོས་བསྡུའི་གྲུབ་འབྲས་ལ་ཁས་ལེན་ཚུལ་དང་ལྡན་པ་ཞིག་གནང་པ་བྱུང་མེད་པ་རེད། གནས་ཚུལ་འདི་ཕྱོགས་བསྒྲིགས་དང་སྙན་སྒྲོན་ཞུ་མཁན་པདྨ་བདེ་ཆེན་ཡིན།
གླེང་སྟེགས།