༄༅།། ཡུ་རོབ་མཉམ་འབྲེལ་གྱིས་འབྲུག་པའི་ཚོང་ལས་ཡར་རྒྱས་དང་འབྲུག་ཡུལ་གྱི་ཕྱིར་ཚོང་དངོས་ཟོག་གི་རྣམ་གྲངས་མང་དུ་གཏོང་བར་ཞིང་ལས་དང་འཁེལ་འཐག་གི་ལག་ཤེས་རྣམས་ཡར་རྒྱས་གཏོང་རྒྱུའི་རྒྱབ་སྐྱོར་ལས་གཞི་ཁག་ཅིག་གཉེར་གྱི་ཡོད་ཅིང་། ཕྱི་ཟླ་༡༢་པའི་ཚེས་༣་ཉིན་ཁྲོམ་ར་དཔྱད་ཞིབ་གསར་ཁང་གིས་གནས་ཚུལ་སྤེལ་བ་ལྟར་ན། ཡུ་རོབ་མཉམ་འབྲེལ་གྱིས་འབྲུག་ཡུལ་ལ་རྒྱབ་སྐྱོར་བྱེད་ཀྱི་ཡོད་པའི་ལས་གཞིའི་གྲས་ཀྱི་གཅིག་ནི་འབྲུག་ཡུལ་གྱི་ཞིང་པ་ཚོས་སེར་ཤ་འདེབས་ལས་བྱེད་པའི་ལག་རྩལ་ཡར་རྒྱས་གཏོང་བར་ཟབ་སྦྱོང་སྤྲོད་ཀྱི་ཡོད་པའི་གནས་ཚུལ་ཐོན་འདུག དཔེར་ན་སྦོང་སྒོར་རྒེད་འོག་གི་དཔག་ཤིང་ཁ་སློབ་གྲྭའི་གཞུང་གིས་ལོ་ཆུང་སློབ་ཕྲུག་ཚོར་ཟས་གོས་གནས་མལ་རིན་མེད་དུ་སྦྱོར་གྱི་ཡོད་པ་དང་སློབ་གྲྭ་དེས་ཡུན་རིང་མི་འགོར་པར་སློབ་ཕྲུག་གི་ཟས་ཐོའི་ཁོངས་སུ་ཞིམ་མངར་ལྡན་པའི་སེར་ཤ་ཁ་སྣོན་བྱེད་ཐུབ་པའི་རྩིས་རྒྱག་གི་ཡོད་པ་སྟེ། ཚེ་རིང་རྣམ་རྒྱལ་ཞེས་པའི་སློབ་གྲྭའི་མ་བྱན་ཞིག་གིས་ལོ་འདི་མཇུག་མ་བསྒྲིལ་གོང་དུ་སློབ་གྲྭ་འདིར་སྔོན་ཆད་བྱ་གསོ་ཁང་ཞིག་ཡོད་པ་དེ་སེར་ཤ་འདེབས་སར་བསྒྱུར་ཐུབ་ས་རེད། ང་ཚོས་སློབ་ཕྲུག་གི་ཟས་སྣའི་ཁོངས་སུ་སེར་ཤ་བསྣན་པའི་འཕྲོ་མ་རྣམས་སློབ་གྲྭའི་དགེ་ལས་དང་ས་གནས་མི་མང་བཅས་ལ་ཚོང་འགྲེམ་བྱེད་ཐུབ་ས་རེད་ཅེས་བཤད།།
འབྲུག་ཡུལ་གྱི་སེར་ཤ་འདེབས་ལས་པ་གཞན་རྣམས་ཀྱང་རང་རང་གི་སེར་ཤའི་ཐོན་སྐྱེད་ལ་ཡིད་རབ་ཚིམས། ལུང་གཉིས་རྒེད་འོག་གི་ན་གཞོན་མ་རྟ་མགྲིན་དབང་མོ་ཞེས་པ་ཞིག་གིས་ཁྲོམ་ར་དཔྱད་ཞིབ་གསར་ཁང་གི་གསར་འགོད་པར་ད་ལོ་ངས་དྲོད་འཇལ་འཕྲུས་ཆས་བཙུགས་ནས་ཚ་དྲོད་ལ་སྟངས་འཛིན་དང་སྔོ་བམ་རྒྱུག་རྒྱུ་འགོག་ཐུབ་སོང་ཞེས་བཤད། རྟ་མགྲིན་དབང་མོས་དྲོད་གྲང་སྟངས་འཛིན་དང་འབུ་སྨན་གཏོར་ས་ཡོད་པའི་ཁང་པ་ཞིག་བརྒྱབ་སྟེ་༢༠༡༦་ནས་སེར་ཤ་བཏབ་པ་དང་༢༠༡༩་ལོ་ནས་ཉ་ཕྱིས་ཤ་མོ་གདབ་རྒྱུའང་འགོ་བཙུགས། ན་གཞོན་མ་ཚེ་རིང་དང་རྟ་མགྲིན། པདྨ་སོགས་འབྲུག་པ་༡༧༢་ལྷག་གིས་སེར་ཤ་བཏབ་ནས་རྒྱལ་སྤྱིའི་ཚོང་ལས་ཀྱི་ཁེ་ཕན་ཆེན་པོ་ཐོབ། ཡུ་རོབ་མཉམ་འབྲེལ་གྱི་རྒྱབ་སྐྱོར་འོག་འབྲུག་རྒྱལ་ཡོངས་ཀྱི་ས་གནས་ཁག་༡༤་ལ་ཤ་མོ་འདེབས་ལས་ཀྱི་ཟབ་སྦྱོང་ཚོགས་ཏེ་འབྲུག་གི་རྫོང་ཁག་༡༤་ཡི་ཞིང་ལས་འགོ་ཁྲིད་ཚོ་ཟབ་སྦྱོང་ལ་མཉམ་ཞུགས་བྱས་ཤིང་། འབྲུག་པ་ཟབ་སྦྱོང་ཐོབ་པའི་སོ་ནམ་པ་མང་ཆེ་བས་ས་ཞིང་ཆུང་ཆུང་རེའི་སྟེང་དུ་ཉ་ཕྱིས་ཤ་མོ་གདབ་རྒྱུ་མགོ་བརྩམས་ཡོད་པར་མ་ཟད། ཁོ་ཚོས་ཟབ་སྦྱོང་གི་ཉམས་མྱོང་ལ་བརྟེན་ནས་ས་ཞིང་འདེབས་ལས་ཀྱི་ལག་རྩལ་ཡར་རྒྱས་དང་སྟོན་འབྲས་བསྡུས་པའི་རྗེས་སུ་ཉར་འཇོག་ཇི་ལྟར་བྱེད་དགོས་པ། ཤ་མོ་དང་སེར་ཤ་ཁག་གི་སྤུས་ཚད་ལ་གཞིགས་ནས་རབ་འབྲིང་དབྱེ་སྟེ་གོང་ཚད་མཐོ་དམའ་གཏན་འབེབས་བྱེད་ཀྱི་ཡོད་པས་ཁྱིམ་ཚང་གི་དཔལ་འབྱོར་ཡོང་འབབ་མང་དུ་སོང་ཡོད་པའི་གནས་ཚུལ་ཐོན།།
དེང་སྐབས་འཛམ་གླིང་ཡོངས་སུ་གཤམ་གཤིས་འགྱུར་ལྡོག་ཐེབས་ཀྱི་ཡོད་པའི་དཀའ་ངལ་ནི་འབྲུག་ཡུལ་ལའང་གཡོལ་ཐབས་བྲལ། ཕྱི་ཟླ་༡༢་པའི་ཚེས་༣་ཉིན་འབྲུག་ཡུལ་གྱི་ཀུན་གསལ་ཚགས་པར་ལ་གནས་ཚུལ་ཐོན་པ་ལྟར་ན། འབྲུག་པའི་སོ་ནམ་བློན་ཆེན་ཡེ་ཤེས་དཔལ་འབྱོར་གྱིས་འཛམ་གླིང་ཡོངས་ལ་གནམ་གཤིས་འགྱུར་ལྡོག་ཐེབས་ནས་འབྲུག་པའི་ཞིང་ལས་ཐོན་སྐྱེད་ཉམས་ཆག་གཏོང་རྒྱུའི་ཉེན་ཁ་ཆེན་པོ་འདུག་ཅེས་གྲོས་ཚོགས་ལ་གཏམ་བཤད་བྱས་འདུག ཕུ་ན་ཁའི་གྲོས་ཚོགས་འཐུས་མི་ལྷ་སྐྱིད་སྒྲོལ་མས་གནམ་གཤིས་འགྱུར་ལྡོག་གི་དབང་གིས་ཞིང་པ་ཚོར་ལོ་ལྟར་སྟོན་འབྲས་བསྡུ་རྒྱུ་ཇེ་ཉུང་དང་རི་དྭགས་སོགས་ཀྱིས་སྟོན་འབྲས་བཟས་ནས་གྱོང་གུད་ཆེན་པོ་འཕོག་གི་འདུག སོ་ནམ་ལྷན་ཁང་གིས་ཞིང་པ་ཚོར་རོགས་སྐྱོར་གྱི་སྲིད་ཇུས་ཅི་ཞིག་ལག་ལེན་བསྟར་གྱི་ཡོད་ཅེས་དྲིས། ཡུ་རོབ་མཉམ་འབྲེལ་གྱིས་རྒྱབ་སྐྱོར་དང་ཟབ་སྦྱོང་སྤྲད་ནས་འབྲུག་ཡུལ་གྱི་ཞིང་པ་ཁག་ཅིག་གི་འཚོ་བ་ཡར་རྒྱས་འགྲོ་བཞིན་ཡོད་ཀྱང་ཆུ་ལོག་དང་ཐན་པ། འཛམ་གླིང་གི་སའི་གོ་ལའི་གནམ་གཤིས་འགྱུར་ལྡོག་གིས་འབྲུག་ཡུལ་གྱི་ཞིང་པ་ཕལ་མོ་ཆེར་དཀའ་ངལ་གསར་པ་ཞིག་ཕྲད་ནས་སྒོ་ང་སོགས་ཉིན་རེའི་ཟས་སོང་གི་རིན་གོང་འཕར།།
འབྲུག་ཡུལ་གྱི་སོ་ནམ་བློན་ཆེན་ཡེ་ཤེ་དཔལ་འབྱོར་གྱིས་ང་ཚོས་སྒོ་ང་ལྟ་བུའི་ཉེར་མཁོའི་ཟས་རིགས་ཁག་རང་ཁ་རང་གསོ་ཐུབ་ཀྱང་བྱ་གསོའི་ལྟོ་ཆས་རྣམས་ཕྱི་ནས་ནང་འདྲེན་བྱེད་དགོས། དེ་ནི་ཟས་སོང་གི་རིན་གོང་འཕར་གྱི་ཡོད་པའི་རྒྱུ་རྐྱེན་ཞིག་རེད། ཞིང་ལས་ཐོན་སྐྱེད་ཁག་ཅིག་བར་ཚོང་རྒྱག་མཁན་ཚོས་ཁེ་སང་འབའ་ཞིག་ལ་དམིགས་ནས་ཉོ་ཚོང་བྱེད་ཀྱི་ཡོད་པར་ཐུག་འདུག ཁོ་ཚོས་ཞིང་པའི་ལག་ནས་ཐོན་སྐྱེད་རྣམས་རིན་གོང་དམའ་མོ་སྤྲད་ནས་ཉོས་ཀྱང་ཁྲོམ་ལ་རིན་གོང་ཆེན་པོ་བྱས་ནས་འཚོང་གི་ཡོད་པ་རེད། ད་ནས་འབྲུག་གཞུང་གིས་ཞིང་ལས་ཐོན་སྐྱེད་ཀྱི་བར་ཚོང་རྒྱག་མཁན་ཚོ་མེད་པར་བཏང་ནས་ན་གཞོན་གྱི་མཐུན་ཚོགས་ཁག་ལ་ཞིང་ལས་ཐོན་སྐྱེད་ཉོ་ཚོང་གི་ལས་དོན་གཉེར་དུ་འཇུག་འཆར་ཡོད། ཞིང་པ་ཚོས་གནམ་གཤིས་ལ་བསྟུན་ནས་འཆར་འགོད་བྱེད་ཐུབ་པའི་ཆེད་དུ་འབྲུག་གཞུང་གིས་རླུང་འཕྲིན་དང་བརྙན་འཕྲིན། སྐད་འཕྲིན་དང་ཝ་འཕྲིན། དར་འཕྲིན་སོགས་སྤྱི་ཚོགས་འབྲེལ་མཐུད་དྲྭ་རྒྱ་ཁག་བརྒྱུད་ནས་ཞིང་པ་ཚོར་སྔོན་བརྡ་གཏོང་ཐུབ་པའི་འབད་བརྩོན་བྱེད་བཞིན་ཡོད་ཅེས་གྲོས་ཚོགས་འཐུས་མི་ཚོར་ལན་བཏབ། ཡིན་ནའང་འབྲུག་ཡུལ་གྱི་ས་གནས་ཁག་ཅིག་ལ་རླུང་འཕྲིན་དང་བརྙན་འཕྲིན་གྱི་མཐུན་རྐྱེན་མེད་པའམ། བརྡ་འཕྲིན་གྱི་མཐུན་རྐྱེན་དེ་དག་ཡོད་ཀྱང་ཞིང་པ་ཚོ་ལས་བྲེལ་གྱི་དབང་གིས་སྔོན་བརྡ་དེ་ཚོར་ལྟ་ཉན་བྱེད་ཁོམ་མེད་པའི་དཀའ་ངལ་ཆེ་ཞིང་། འབྲུག་པ་ཚོས་རྒྱ་ཁབ་ཏུ་སྐད་འཕྲིན་དང་ཝ་འཕྲིན། དར་འཕྲིན་རྣམས་བཀོལ་སྤྱོད་བྱེད་ཀྱི་ཡོད་པའི་གནས་ཚུལ་ཐོན་འདུག
