པེ་རུའི་སྲིད་འཛིན་ཟུར་པ་ཕུ་ཇི་མོ་རི་འདས་གྲོངས།

ལོ་ན་༨༦ ཡིན་པའི་ལྷོ་ཨ་མི་རི་ཀའི་རྒྱལ་ཁབ་པེ་རུའི་སྲིད་འཛིན་ཟུར་པ་ཨལ་བྷར་ཏོ་ ཕུ་ཇི་མོ་རི་ཡུལ་དེའི་རྒྱལ་ས་ལི་མའི་ནང་འདས་གྲོངས་སུ་གྱུར་ཡོད་སྐོར་ཁོང་གི་བུ་མོ་ཀེའི་ཀོ་ ཕུ་ཇོ་མོ་རིས་ཨེཀྶ་སྤྱི་ཚོགས་དྲ་ལམ་ནང་གསལ་བསྒྲགས་སྤེལ་འདུག

ཕྱི་ལོ་༡༩༩༠ ནས་༢༠༠༠ བར་པེ་རུའི་ནང་སྲིད་དབང་གཅིག་སྡུད་ཀྱིས་དབང་བསྒྱུར་བྱས་ཡོད་པ་དང་། འདི་ལོའི་ཟླ་བ་བདུན་པར་ཁོང་གི་བུ་མོས་གསལ་བསྒྲགས་སྤེལ་བའི་ནང་ཕྱི་ལོ་༢༠༢༦ ལོའི་ཡུལ་དེའི་སྲིད་འཛིན་འོས་སྡུར་ཁོང་གིས་སླར་ཡང་ཐེངས་བཞི་པ་འགྲན་བརྩོད་བྱ་རྒྱུའི་འཆར་གཞི་ཡོད་པ་རེད།

སྐུ་ཞབས་ཕུ་ཇི་མོ་རི་ནི་ཡུལ་དེའི་གཙུག་ལག་སློབ་ཁང་གི་སློབ་དཔོན་གནང་མྱོང་ཡོད་པ་དང། དེ་ནས་ཕྱི་ལོ་༡༩༩༠ ལོའི་ཡུལ་དེའི་སྲིད་འཛིན་འོས་སྡུར་འགྲན་རྩོད་བྱས་ཏེ་འོས་སྡུའི་རྒྱལ་ཁ་སོན་ཐུབ་པ་བྱུང་ཡོད་པ་རེད། ཡུལ་དེའི་སྲིད་འཛིན་གནང་རྒྱུན་ཧ་ཅང་ཡ་ཡུད་ཆེ་བའི་སྲིད་བྱུས་མང་པོ་ལག་བསྟར་བྱས་སྐབས་ཡུལ་དེའི་མི་མང་ཚོའི་ཁོངས་ནས་ཁོང་ལ་དགའ་མོས་བྱེད་མཁན་མང་པོ་བྱུང་ཡོད་ཀྱང་། མང་པོས་ཁོང་ལ་མི་དགའ་བ་བྱས་ཡོད་པ་རེད།

ཁོང་གིས་ཡུལ་དེའི་སྲིད་འཛིན་གནང་འགོ་ཚུགས་སྐབས་ཡུལ་དེའི་ནང་དཔལ་འབྱོར་གནས་སྟངས་ཧ་ཅང་ཞན་པོ་ཡོད་པ་མ་ཟད། ཡུལ་དེའི་ནང་དྲག་སྤྱོད་ལས་འགུལ་མང་པོ་ཞིག་འགྲོ་བཞིན་ཡོད་ཅིང། ཁོང་གིས་ཡུལ་དེའི་གཞུང་གཉེར་ཚོང་གཉེར་ཁང་ཡོངས་རྫོགས་སྒེར་བདག་ཅན་ལ་བསྒྱུར་བ་སོགས་ཧ་ཅང་སྙིང་སྟོབས་ཆེ་བའི་སྲིད་བྱུས་མང་པོ་ལག་བསྟར་བྱས་ཡོད། དེ་བཞིན་ཡུལ་དེའི་ནང་གི་གྱེན་ལོག་ཚོགས་པ་ཤི་ནིང་ལམ་ཞེས་པ་དེ་ཡང་རྩ་གཏོར་བཏང་ཐུབ་པ་བྱུང་ཡོད་ཅིང་། ལས་དོན་དེ་བསྒྲུབས་པར་དུས་ཡུན་གང་ཙམ་རིང་པོ་འགོར་ཡོད།

འོན་ཀྱང་ཁོང་སྲིད་འཛིན་གྱི་གོ་གནས་ནས་དེ་ནས་མགྱོགས་པ་མར་ལྷུང་ཡོད། དེ་ཡང་ཕྱི་ལོ་༢༠༠༠ ལོར་ཁོང་གིས་ཡུལ་དེའི་གྲོས་ཚོགས་ལ་ཤུགས་རྐྱེན་གཏོང་ཐབས་བྱས་ཏེ་ཡུལ་དེའི་སྲིད་འཛིན་ལས་དུས་གསུམ་པ་བྱ་རྒྱུའི་ཐབས་ཤེས་བྱས་སྐབས་ཁོང་གློ་བུར་རྒྱལ་ཁབ་གཞན་ལ་བྲོས་དགོས་པ་བྱུང་ཡོད། ཁོང་གི་འགོ་ཁྲིད་པའི་གཞུང་གི་གསང་བའི་ལྷན་ཁང་གི་འགན་འཛིན་ཝི་ལ་ཌི་མི་རོས་ཡུལ་དེའི་གྲོས་ཚོགས་འཐུས་མི་ལ་ལྐོག་ངན་སྤྲད་པའི་བརྙན་པར་ཞིག་ཡོངས་གྲགས་ཆགས་རྗེས་ཁོང་རྒྱལ་ཁབ་གཞན་ལ་བྲོས་བྱོལ་བྱ་དགོས་པ་བྱུང་བ་དང་། ཉེ་ཧོང་ལ་བྲོས་བྱོལ་སོང་ནས་ཉེ་ཧོང་ནས་ཡུལ་དེའི་སྲིད་འཛིན་གྱི་གོ་གནས་ནས་རྩ་དགོངས་ཞུ་རྒྱུའི་ཡི་གེ་བཏང་ཡོད་པ་རེད།

དེ་ནས་ལོ་ངོ་ལྔ་སོང་རྗེས་ཁོང་ཁྱིམ་མཚེས་རྒྱལ་ཁབ་ཆི་ལི་ལ་འབྱོར་འདུག་པ་དང་། སྐབས་དེར་ཁོང་འཛིན་བཟུང་བྱས་ཏེ་པེ་རུ་ལ་རྩིས་སྤྲོད་བྱས་ཡོད་པ་རེད། ཕྱི་ལོ་༢༠༠༦ ལོའི་པེ་རུ་ཡི་སྲིད་འཛིན་འོས་སྡུར་སླར་ཡང་འགྲན་རྩོད་བྱ་རྒྱུའི་འཆར་གཞི་བྱས་ཡོད་མོད། ཁོང་ལ་ཆབ་སྲིད་དབང་ཆ་བེད་སྦྱོད་ལོག་པ་བྱས་པའི་གྱོད་འཛུགས་མང་པོ་བྱས་པར་བརྟེན་སྐབས་དེར་ཁོང་སྲིད་འཛིན་ལ་འགྲན་བརྩོད་བྱེད་ཐུབ་མེད།

ཕུ་ཇི་མོ་རི་ནི་འཛམ་གླིང་ནང་འགྲོ་བ་མིའི་ཐོབ་ཐང་རྩ་འགལ་བཏང་བའི་གྱོད་འཛུགས་ཐོག་ནས་ཁྲིམས་འཆད་བཏང་བའི་སྲིད་འཛིན་ཐོག་མ་དེ་ཆགས་ཡོད་པ་དང་། ཡུལ་དེའི་ནང་གི་མི་སྣ་༢༥ དམར་བསད་བཏང་བའི་དོན་རྐྱེན་ལ་ཁོང་ཐད་ཀར་འབྲེལ་བ་མེད་ལུགས་ཁྲིམས་ཁང་གི་ཐག་གཅོད་བྱས་ཡོད་ཀྱང་། དམར་བསད་ཀྱི་དོན་རྐྱེན་དེ་ཁོང་སྲིད་གཞུང་གི་མིང་ཐོག་ནས་བྱུང་བར་བརྟེན་ཁོང་ལ་ཡང་འགན་ཡོད་པ་ཁྲིམས་ཁང་གིས་ཐག་གཅོད་བྱས་ཡོད་པ་རེད།

ཁོང་ལ་ལོ་ངོ་༢༥ ཡི་བཙོན་མཇུག་གི་ཉེས་ཆད་བཏང་བར་ལྟོས་མེད་ཀྱིས་ཁོང་གིས་བཙོན་ཁང་ནས་ཆབ་སྲིད་དབང་ཆ་བཟུང་རྒྱུའི་འཆར་གཞི་བྱས་ཡོད། ཕྱི་ལོ་༢༠༡༡ ལོར་ཁོང་གི་བུ་མོས་ཡུལ་དེའི་སྲིད་འཛིན་འོས་སྡུར་འགྲན་བཞུགས་བྱས་ཡོད་ཀྱང་། ཁོང་ལ་རྒྱལ་ཁ་ཐོབ་མེད། ཕྱི་ལོ་༢༠༡༦ དང་༢༠༢༡ ལོ་སོ་སོར་སླར་ཡང་ཁོ་མོས་སྲིད་འཛིན་འོས་སྡུར་འགྲན་རྩོད་བྱས་འདུག་ཀྱང་རྒྱལ་ཁ་སོན་ཐུབ་མེད། གལ་ཏེ་ཁོང་ལ་འོས་བསྡུའི་རྒྱལ་ཁ་སོན་པ་ཡིན་ན། ཁོང་གི་ཕ་བཙོན་ཁང་ནས་གློད་དཀྲོལ་གཏང་རྒྱུའི་ཁས་ལེན་བྱས་ཡོད་པ་རེད།

རེས་གཟའ་ལྷག་པའི་ཉིན་ཨེཀྶ་སྤྱི་ཚོགས་དྲ་ལམ་ཐོག་བཀོད་གསལ་ལ། དུས་ཡུན་རིང་པོར་ངའི་པ་ལགས་ལ་འབྲས་ནད་ཀྱིས་ནད་མནར་བྱུང་རྗེས་ཁོང་འདས་གྲོངས་སུ་གྱུར་སོང། ཁོང་ལ་དགའ་ཞེན་བྱེད་མཁན་ཡོངས་ཀྱིས་ཁོང་ལ་སྨོན་ལམ་གསུངས་འདོན་གནང་དགོས་པར་ངས་འབོད་སྐུལ་བྱེད་ཀྱི་ཡོད་ཅེས་བཀོད་འདུག

ཨེ་པི་དང་རུའི་ཌར་སོགས་ནས་བཏུས།

གསར་འགོད་པ། ཀུན་བཟང་རིག་འཛིན།

ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།