ཨ་རིའི་སྲིད་འཛིན་ཇཱ་བྷ་ཌན་མཆོག་གཟའ་ཕུར་བུའི་ཉིན་མོ་གླིང་ཆེན་ཨ་མ་རི་ཀ་ལྷོ་མའི་རྒྱལ་ཁབ་ཕཱུ་རུའི་ནང་དུ་ཕེབས་འབྱོར་གྱིས་ཨེ་ཤི་ཡ་དང་ཞི་བའི་རྒྱ་མཚོའི་ཁུལ་གྱི་དཔལ་འབྱོར་མཉམ་འབྲེལ་མཐུན་ཚོགས་ཀྱི་ཚོགས་ཆེན་ལ་མཉམ་བཞུག་གནང་རྒྱུ་ཡིན་པ་རེད།
དབྱེ་ཞིབ་པ་ཚོས་གལ་སྲིད་ཨ་རིའི་འོས་འདེམས་ཀྱི་གྲུབ་འབྲས་མི་འདྲ་བ་ཞིག་བྱུང་ཡོད་ཚེ་སྲིད་འཛིན་བྷ་ཌན་ནས་གདེང་ཚོད་ལྡན་པའི་ཐོག་ནས་ཁོང་གི་རྗེས་འཛིན་པས་མུ་མཐུད་དེ་མངའ་ཁུལ་འདིའི་རྒྱལ་ཁབ་ཁག་དང་མཉམ་འབྲེལ་ཤུགས་ཆེ་རུ་གཏོང་རྒྱུའི་འགན་ལེན་གནང་རྩིས་ཡོད་ནའང་ཨ་རིའི་འོས་འདེམས་ཀྱི་གྲུབ་འབྲས་ལ་སྐུ་ཞབས་ཌོ་ནར་ཌམ་ལ་རྒྱལ་ཁ་ཐོབ་ཡོད་པས་གནས་སྟངས་མི་འདྲ་བ་ཞིག་ཆགས་ཡོད་པ་འགྲེལ་བརྗོད་གནང་འདུག
དེ་ཡང་དབྱེ་ཞིབ་པ་ཚོས་༢༠༡༦ལོར་ཨེ་ཤི་ཡ་དང་ཞི་བའི་རྒྱ་མཚོའི་མངའ་ཁུལ་གྱི་དཔལ་འབྱོར་མཉམ་འབྲེལ་མཐུན་ཚོགས་ཀྱི་ལྷན་ཚོགས་དེ་ཡང་ཕཱུ་རུ་ཡུལ་གྲུའི་ནང་ཚོགས་པའི་སྐབས་དང་འདྲ་བར་སྐུ་ཞབས་ཌོ་ནར་ཌམ་གྱི་ཨ་མི་རི་ཀ་ཨང་དང་པོ་ཞེས་པའི་སྲིད་ཇུས་ལ་མངའ་ཁུལ་གྱི་རྒྱལ་ཁབ་ཁག་ནས་ཨ་རི་དང་འབྲེལ་ལམ་ཐད་ལ་བློ་འཚབ་བྱེད་བཞིན་ཡོད་པས་སྲིད་འཛིན་བྷ་ཌན་གྱི་ཐེངས་འདིའི་ལྷོ་ཨ་མི་རི་ཀའི་ནང་གི་གཟིགས་སྐོར་མཐའ་མ་འདིའི་སྐབས་སུའང་རྒྱལ་ཁབ་གཞན་གྱི་དབུ་ཁྲིད་ཚོར་ཨ་རི་དང་འབྲེལ་ལམ་ཐད་བློ་དོགས་ཆེ་བའི་སྐབས་ཤིག་ཆགས་ཡོད།
དབྱེ་ཞིབ་པ་ཚོས་ལྷོ་ཨ་མི་རི་ཀའི་རྒྱལ་ཁབ་ཁག་གི་འགོ་ཁྲིད་ཚོའི་ནང་ཨ་རི་དང་མཉམ་འབྲེལ་ཐད་ལ་བློ་འཚབ་ཆེ་བའི་གནས་སྟངས་དེས་རྒྱ་ནག་ལ་ཁེ་ཕན་ཡོང་སྲིད་པ་དང་རྒྱ་ནག་གི་འགོ་ཁྲིད་ཞི་ཅིན་ཕིང་གིས་གོ་སྐབས་དེ་དང་བསྟུན་ནས་གླིང་ཆེན་ཨ་མི་རི་ཀའི་རྒྱལ་ཁབ་ཁག་ནང་མ་རྩ་འཛུགས་འཇོག་ཤུགས་ཆེ་རུ་གཏོང་བཞིན་ཡོད་པ་དང་། དཔེ་ན་ཕཱེ་རུ་ཡུལ་གྲུའི་ནང་ཨ་སྒོར་ཐེར་འབུམ་༡དང་གྲངས་ཆུང་༣གི་མ་རྩ་འཛུགས་འཇོག་བྱེད་རྒྱུའི་གསལ་བསྒྲགས་ཤིག་བྱས་ཡོད་པ་དང་མ་འོངས་ལོ་བཅུ་ཕྲག་ཁ་ཤས་རིང་ཁྱོན་ཨ་སྒོར་ཐེར་འབུམ་༣དང་ཕྱེད་ཀ་ཙམ་གྱི་མ་རྩ་འཛུགས་འཇོག་དང་ཚོང་འབྲེལ་བྱེད་རྒྱུའི་འཆར་གཞི་ཡོད་པས་ཨ་མི་རི་ཀ་དང་ས་ཐག་ཉེ་བའི་རྒྱལ་ཁབ་འདིའི་ནང་རྒྱ་ནག་གི་ཤུགས་རྐྱེན་ཆེ་རུ་འགྲོ་རྒྱུའི་ཉེན་ཁ་ཡོད་པ་མ་ཟད་རྒྱ་ནག་ནས་ལྷོ་ཨ་མི་རི་ཀ་དང་ཁཱེ་རེ་ཕཱིང་རྒྱ་མཚོའི་ཁུལ་གྱི་རྒྱལ་ཁབ་ཁག་ནང་དུ་ཁྱོན་ཨ་སྒོར་ཐེར་འབུམ་༥༠༠ཙམ་གྱི་མ་རྩ་འཛུགས་འཇོག་དང་ཚོང་འབྲེལ་བྱེད་བཞིན་པ་དང་གཙོ་བོ་བསྲན་དཀར་དང་། ཟངས། ལྕགས་རིགས་སོགས་ཉོ་ཚོང་བྱེད་ཀྱི་ཡོད།
ཡང་ཕྱི་སྲིད་ཐད་ལའང་རྒྱ་ནག་ནས་མངའ་ཁུལ་འདིའི་ནང་ཤུགས་རྐྱེན་ཆེ་རུ་གཏོང་བཞིན་པ་སྟེ་ཞི་ཅིན་ཕིང་སྲིད་འཛིན་ཆགས་པའི་རྗེས་སུ་མངའ་ཁུལ་འདིའི་རྒྱལ་ཁབ་༡༡ཙམ་ནང་འཚམས་གཟིགས་སུ་བསྐྱོད་ཡོད་པའི་སྐོར་རྒྱ་ནག་གི་གཞུང་འབྲེལ་གསར་འགྱུར་ཁག་གིས་གནས་ཚུལ་སྤེལ་ཡོད།
ཕོ་བྲང་དཀར་པོས་གཟའ་ལྷག་པའི་ཉིན་མོ་ཕཱེ་རུའི་ནང་འཚོག་རྒྱུའི་ཨེ་ཤི་ཡ་དང་ཞི་བའི་རྒྱ་མཚོའི་དཔལ་འབྱོར་མཉམ་འབྲེལ་མཐུན་ཚོགས་སྐབས་ཨ་རིའི་སྲིད་འཛིན་བྷ་ཌན་དང་ཞི་ཅིན་ཕིང་དབར་ཕྱི་ཟླ་༡༡པའི་ཚེས་༡༦རེ་གཟའ་སྤེན་པའི་ཉིན་མོ་མཇལ་འཕྲད་གནང་རྒྱུའི་འཆར་གཞི་ཡོད་པ་གསལ་བསྒྲགས་གནང་ཡོད་པ་དང་གསར་འགོད་ལྷན་ཚོགས་ཐོག་ལ་སྲིད་འཛིན་བྷ་ཌན་ནས་ཞི་ཅིན་ཕིང་དང་མཇལ་འཕྲད་དེའི་སྐབས་སུ་ཡུལ་གྲུ་གཉིས་ཀྱི་འབྲེལ་ལམ་སྤྱི་དང་འཛམ་གླིང་གི་བདེ་འཇགས་དང་འབྲེལ་བའི་གནད་དོན་དང་།མིས་བཟོས་རིག་ནུས་ཀྱི་ལག་རྩལ་གསར་པའི་བདེ་འཇགས་སྐོར་སོགས་ལ་བགྲོ་གླེང་གནང་རྒྱུ་ཡིན་པ་གསུངས་ཡོད་པ་རེད།
ཡིན་ནའང་སྲིད་འཛིན་བྷ་ཌན་དང་ཞི་ཅིན་ཕིང་གི་མཇལ་འཕྲད་དེ་ནི་ཨ་རིའི་སྲིད་འཛན་འོས་འདེམས་ཀྱི་གྲུབ་འབྲས་ལས་སྐུ་ཞབས་ཌོ་ནར་ཌམ་ལ་རྒྱལ་ཁ་ཐོབ་སྟེ་བསྐྱར་དུ་སྲིད་འཛིན་གྱི་འགན་བཞེས་གནང་བར་ཟླ་བ་གཉིས་ཙམ་ལས་མེད་པས་མཇལ་འཕྲད་དེའི་སྐབས་སུ་ཡུལ་གྲུ་གཉིས་ཀྱི་འབྲེལ་ལམ་ཐད་ལ་གྲོས་མོལ་ལྷུག་པོ་ཞིག་ཡོང་ཐུབ་མིན་དང་རྒྱ་ནག་གི་བློ་འཚབ་དང་དོགས་འདྲི་ཁག་ལ་སྲིད་འཛིན་བྷ་ཌན་ནས་ལན་འདེབས་གང་གནང་མིན་དང་དེ་བཞིན་སྲིད་འཛིན་བྷ་ཌན་ནས་གཟའ་ལྷག་པའི་ཉིན་མོ་ཕོ་བྲང་དཀར་པོའི་ནང་སྐུ་ཞབས་ཌོ་ནར་ཌམ་དང་མཇལ་འཕྲད་གནང་ཡོད་པ་དེའི་སྐབས་སུ་ཨ་རི་དང་རྒྱ་ནག་གི་འབྲེལ་ལམ་སྐོར་ལ་བཀའ་བསྡུར་གནང་ཡོད་མིན་སོགས་ཕོ་བྲང་དཀར་པོས་འགྲེལ་བརྗོད་ཁ་གསལ་གནང་གི་མེད་པ་རེད།
གླེང་སྟེགས།