ཧ་མ་སིའི་མཐོ་རིམ་དཔོན་པོ་ཁཱ་ལི་ལཱ་ཧ་ཡ་Khalil al-Hayya ཡིས་སྤྱི་ཟླ་༢ པའི་ཚེས་༡༨ རེས་གཟའ་མིག་དམར་ཉིན་ལ་སྒྲ་འཇུག་བྱས་ནས་སྤེལ་བའི་གསལ་བསྒྲགས་ཤིག་གི་ནང་། ཁོ་ཚོས་ཡོང་རྒྱུའི་རེས་གཟའ་སྤེན་པ་ཉིན་ལ་སླར་ཡང་ཨི་སི་རལ་གྱི་མི་གཏའ་དྲུག་གློད་བཀྲོལ་གཏང་རྒྱུ་དང་། སང་ཉིན་རེས་གཟའ་ཕུར་བུའི་ཉིན་ལ་མི་གཏའ་བཞིའི་ཕུང་པོ་རྩིས་སྤྲོད་བྱ་རྒྱུ་ཡིན་ཞེས་བརྗོད་འདུག
སྤྱི་ཟླ་༣ པའི་ཟླ་མགོར་དུས་ཡུན་རྫོགས་རྒྱུ་ཡིན་པའི་མེ་འཕེན་མཚམས་འཇོག་གི་གྲོས་མཐུན་རིམ་པ་དང་པོ་ལྟར་དུ། ད་ལན་ཧ་མ་སིས་གློད་བཀྲོལ་གཏོང་འཆར་ཡོད་པའི་མི་གཏའ་དྲུག་པོ་ནི་གློད་བཀྲོལ་གཏོང་རྒྱུའི་མི་གཏའ་མཐའ་མའི་གྲས་དེ་ཡིན་པ་དང་། ཧ་མ་སིས་ད་དུང་མི་གཏའ་༧༠ ཙམ་བཀག་ཉར་བྱས་ཡོད་ཅིང་། དེའི་ནང་ནས་མི་གཏའ་ཕྱེད་ཀ་ད་དུང་འཚོ་བཞིན་པ་ལ་ཡིད་ཆེས་བྱེད་ཀྱི་ཡོད་པ་རེད། མེ་འཕེན་མཚམས་འཇོག་གི་དུས་ཡུན་དེའི་རིང་ལ། ད་བར་ཧ་མ་སིས་མི་གཏའ་༢༤ གློད་བཀྲོལ་བཏང་ཡོད་པ་དང་། ཨི་སི་རལ་གྱིས་པ་ལེ་སི་ཐན་གྱི་བཙོན་པ་༡༠༠༠ ལྷག་གློད་བཀྲོལ་བཏང་ཡོད་པ་རེད།
ཨི་སི་རལ་དང་ཧ་མ་སི་གཉིས་ཀྱིས་ད་དུང་མེ་འཕེན་མཚམས་འཇོག་རིམ་པ་གཉིས་པའི་སྐོར་ལ་གྲོས་མོལ་བྱེད་འགོ་ཚུགས་མེད་པ་དང་། ཧ་མ་སིས་དམག་འཁྲུག་ཡོངས་སུ་མཚམས་འཇོག་བྱས་ཏེ་ཨི་སི་རལ་གྱི་དམག་མི་ཡོངས་རྫོགས་གྷ་ཛ་ས་ཁུལ་ནས་ཕྱིར་འཐེན་མ་བྱེད་བར་དུ་མི་གཏའ་ལྷག་པ་དེ་དག་གློད་བཀྲོལ་གཏང་རྒྱུ་མིན་ཞེས་བརྗོིད་ཡོད་པ་རེད།འོན་ཏེ་ཨ་རིའི་རྒྱབ་སྐྱོར་ཡོད་པའི་ཨི་སི་རལ་གྱིས་ཧ་མ་སི་རྩ་མེད་བཟོ་རྒྱུའི་དམིགས་ཡུལ་དོར་མེད་པ་དང་། ཨི་སི་རལ་གྱི་ཕྱི་སྲིད་བློན་ཆེན་གྷི་ཌི་ཨོན་སཱར་གྱིས་གཟའ་མིག་དམར་ཉིན་ལ། ཨི་སི་རལ་གྱིས་གྲོས་མོལ་རིམ་པ་གཉིས་པ་སྐོར་ལ་གྲ་སྒྲིག་ཡོད་པ་བརྗོད་ཡོད་ཀྱང་། དེ་སྔོན་གྱི་གྲོས་མཐུན་ལྟར་ན། གྲོས་མོལ་རིམ་པ་གཉིས་པ་དེ་བདུན་ཕྲག་གཉིས་ཀྱི་སྔོན་ནས་འགོ་འཛུགས་དགོས་པ་ཞིག་རེད།
གླེང་སྟེགས།