༢༠༢༥ ལོའི་སྤྱི་ཟླ་༢ པའི་ཚེས་༡༢ ཉིན་གྱི་སྔ་དྲོར། བྱེས་ཀྱི་གདན་ས་ཆེན་མོ་བཀྲ་ཤིས་ལྷུན་པོའི་དགེ་འདུན་འདུས་མང་ཡོངས་ནས་གདན་ས་བཀྲ་ཤིས་ལྷུན་པོའི་གཙུག་ལག་ཁང་དུ་༸ གོང་ས་སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་འདི་ལོ་དགུང་གྲངས་༩༠ ཕེབས་པའི་གོ་སྟོན་གྱི་ཆེད་གནས་བརྟན་ཕྱག་མཆོད་ཀྱི་ཆོ་ག་དང་འབྲེལ་བའི་མདོ་ལུགས་ཀྱི་བརྟན་བཞུགས་བསྟར་འབུལ་ཞུས་ཡོད་ཅིང་། བརྟན་བཞུགས་དེའི་ཐོག་གོང་ས་སྐྱབས་མགོན་ཆེན་པོ་མཆོག་སྐུ་ཁམས་གསལ་ཐང་དང་བསྟན་པ་དང་འགྲོ་བ་སྤྱིའི་དོན་དང་བྱེ་བྲག་ཏུ་བོད་གངས་ཅན་པ་རྣམས་ཀྱི་མགོན་སྐྱབས་ཏུ་སྐུ་ཚེ་ཡུན་ནས་ནས་ཡུན་དུ་བརྟན་ཅིང་རླབས་ཆེན་ཐུགས་ཀྱི་བཞེད་དགོངས་ཐ་དག་བགེགས་མེད་ལྷུན་གྱིས་འགྲུབ་པའི་གསོལ་འདེབས་ཞུས་ཡོད་པ་རེད། གདན་ས་བཀྲ་ཤིས་ལྷུན་པོའི་མཁན་པོ་གཟི་རྒྱབ་སྤྲུལ་སྐུ་བསྟན་འཛིན་ཐུབ་བསྟན་རབ་རྒྱས་རིན་པོ་ཆེ་མཆོག་གིས་གནས་བཞུགས་ཀྱིི་རྡོ་རྗེ་སློབ་དཔོན་གནང་ཡོད་པ་དང་། བརྟན་བཞུགས་ཀྱི་ཆོ་གའི་འགྲོས་དང་བསྟུན་ནས་མཎྜལ་སྐུ་གསུང་ཐུགས་རྟེན་དང་སྐུ་ཆོས་གོས་རྣམ་གསུམ་བཀྲ་ཤིས་རྟགས་བརྒྱད་དང་རྫས་བརྒྱད། པཎ་ཆེན་སྐུ་ཕྲེང་བཞི་པ་བློ་བཟང་ཆོས་རྒྱལ་གྱི་དབུ་ཞཱ་བཀྲ་ཤིས་རྩེ་དགུ་སོགས་བརྟན་བཞུགས་ཀྱི་རྫས་རྣམས་རེ་རེ་བཞིན་ཕུལ་གནང་འདུག
བརྟན་བཞུགས་སྐབས་སུ་༸གོང་ས་སྐྱབས་མགོན་ཆེན་པོ་མཆོག་ནས་སེར་སྐྱ་མང་ཚོགས་ལ་མགོན་པོ་གང་ཉིད་ནི་རྒྱལ་དབང་དགེ་འདུན་གྲུབ་ཀྱི་སྐུ་ཕྲེང་ཞིག་ཡིན་པའི་ཆ་ནས་མགོན་པོ་གང་ཉིད་དང་གདན་ས་བཀྲ་ཤིས་ལྷུན་པོའི་དབར་ཐུན་མོང་མ་ཡིན་པའི་དམིགས་བསལ་ལས་དང་སྨོན་ལམ་གྱི་འབྲེལ་བ་དམ་ཟབ་ཡོད་པ་མ་ཟད། རྨི་ལམ་དང་བསམ་བློའི་ནང་དུ་ཡང་རྒྱལ་བ་སྐུ་ཕྲེང་རིམ་བྱོན་དེ་དག་གི་བྱིན་རླབས་ཀྱི་རྒྱུན་ཡོད་པའི་ཚོར་བ་ཡོང་གི་འདུག་ཅེས་བཀའ་སློབ་བསྩལ་གནང་འདུག གཞན་ཡང་བཀྲ་ཤིས་ལྷུན་པོའི་མཁན་རིན་པོ་ཆེ་དང་དཀྱིལ་ཁང་རིན་པོ་ཆེ་ནས་གདན་ས་བཀྲ་ཤིས་ལྷུན་པོ་ཐོག་མར་ཕྱག་བཏབ་གནང་མཁན་རྒྱལ་དབང་དགེ་འདུན་གྲུབ་པའི་སྐུ་བརྙན་ཞིག་ཕུལ་གནང་བ་མ་ཟད། རྒྱལ་བའི་མཛད་རྣམ་གྱི་དེབ་ཕྲེང་༢༩ ཅན་ཞིག་ཀྱང་དབུ་འབྱེད་གནང་འདུག
གདན་ས་བཀྲ་ཤིས་ལྷུན་པོ་ནི་བོད་ནང་གཙང་ཁུལ་གྱི་དགེ་ལུགས་པའི་གདན་ས་ཆེ་ཤོས་ཤིག་ཡིན་པ་དང་དེ་ནི་རྗེ་ཙོང་ཁ་པ་ཆེན་པོའི་ཞལ་སློབ་རྒྱལ་དབང་སྐུ་ཕྲེང་དང་པོ་རྗེ་དགེ་འདུན་གྲུབ་པས་ཕྱི་ལོ་༡༤༤༧ ལོར་ཕྱག་བཏབ་པ་དང་པན་ཆེན་སྐུ་ཕྲེང་བཞི་པ་བློ་བཟང་ཆོས་ཀྱི་རྒྱལ་མཚན་མཆོག་གིས་ཉམས་གསོ་དང་རྒྱས་སྐྲུན་མཛད་དེ་རིམ་པས་པན་ཆེན་སྐུ་ཕྲེང་རིམ་བྱོན་གྱི་གདན་སར་གྱུར་ཡོད་པ་རེད།
གླེང་སྟེགས།