རྒྱ་ནག་གཞུང་གིས་གོ་ལ་ཁྱོན་ཡོངས་ཀྱི་བརྡ་འཕྲིན་ཁོར་ཡུག་གི་གནས་ཚུལ་ལ་ཇི་ལྟར་འགྱུར་བ་གཏོང་གི་ཡོད་པ་ཟླ་༩་ཚེས་༢༨་ཉིན་ལ་ཨ་རིའི་ཕྱི་སྲིད་ལྷན་ཁང་གིས་སྙན་ཐོ་ཞིག་འདོན་སྤེལ་གནང་སོང་། དེའི་ནང་དུ་རྒྱ་ནག་གཞུང་གིས་ཨ་སྒོར་ཐེར་འབུམ་མང་པོ་བཏང་ནས་འཐབ་ཇུས་ལྡན་པའི་ངང་རྒྱལ་སྤྱིའི་བརྡ་འཕྲིན་རྒྱུད་ལམ་གྱི་གནས་ཚུལ་ལ་ཤུགས་རྐྱེན་ཐེབས་ཐབས་བྱེད་བཞིན་པ་རེད་ལ། མངོན་ལྐོག་གཉིས་ནས་རྒྱལ་སྤྱིའི་བརྡ་འཕྲིན་རྒྱུད་ལམ་གྱི་གནད་འགག་ཁག་ལ་དོ་དམ་སྟངས་འཛིན་བྱེད་པའི་ལམ་ཀ་ཞིག་བཟོས་ཏེ་ད་ལྟ་རྒྱ་ནག་ལ་གོ་ལ་ཧྲིལ་བོའི་གནས་ཚུལ་ལ་དབང་བསྒྱུར་བར་གདེང་ཚོད་ཆེན་པོ་ཞིག་རྙེད་ཡོད་པ་ཨ་རིའི་གཞུང་གིས་ཉེན་བརྡ་བཏང་འདུག
རྒྱལ་སྤྱིའི་གསར་ཁང་སྐད་གྲགས་ཅན་རྣམས་ཀྱིས་རྒྱ་ནག་གིས་གཡོ་སྒྱུའི་ཐབས་ལམ་སྤྱད་དེ་རྒྱལ་སྤྱིའི་ནང་གི་བརྡ་འཕྲིན་རྒྱུད་ལམ་གྱི་གནས་ཚུལ་ལ་དབང་བསྒྱུར་བཞིན་པ་ཞེས་དང་། ཡང་རྒྱ་ནག་གིས་གནས་ཚུལ་རྫུན་མ་དང་ལོག་པ་སྤེལ་བཞིན་པར་ཨ་རིས་བསྐྱར་དུ་ཉེན་བརྡ་བཏང་འདུག་ཞེས་ལ་སོགས་པའི་གསར་འགྱུར་སྤེལ་བཞིན་འདུག
རྒྱ་ནག་གཞུང་གིས་རྒྱལ་སྤྱིའི་ནང་དུ་གནས་ཚུལ་རྫུན་མ་དང་ལོག་པ་ཁྱབ་སྤེལ་བྱེད་པ། ཡང་ན་གནས་ཚུལ་ལ་སྟངས་འཛིན་དང་གནས་ཚུལ་གྱི་ཁ་ཕྱོགས་བསྒྱུར་བཞིན་པ། རྒྱལ་སྤྱིའི་ནང་གཏམ་བརྗོད་དབང་ཐང་ཆེ་རུ་གཏོང་ཐབས་ལ་འཐབ་ཇུས་སྣ་ཚོགས་དང་འགྲོ་གྲོན་ཕོན་ཆེན་གཏོང་བཞིན་པ་བཅས་ཀྱི་སྐོར་ལ་ཨ་རིའི་གཞུང་འབྲེལ་མི་སྣས་ཉེན་བརྡ་བཏང་བ་ཐེངས་དང་བོ་དེ་མ་ཡིན་པར། ཏོག་དབྱིབས་ནད་ཡམས་ཐོག་མ་ཁྱབ་བཞིན་པའི་སྐབས་སུ་ནད་ཡམས་ཀྱི་སྐོར་ལ་སྤྱི་ཚོགས་དྲ་ལམ་ཁག་ཏུ་རྒྱ་ནག་གིས་གནས་ཚུལ་ལོག་པ་ཁྱབ་སྤེལ་བྱེད་བཞིན་པའི་ཉེན་བརྡ་བཏང་མྱོང་ལ། དེའི་རྗེས་ཨ་རིའི་རྒྱལ་ཡོངས་གསང་བའི་ལས་ཁུངས་ཀྱིས་གཞུང་འབྲེལ་ཡིག་ཆ་ཤོག་གྲངས་༢༧་ཅན་ཞིག་བཏོན་པ་དེའི་ནང་དུ་ཡང་རྒྱ་ནག་གཞུང་གིས་རྒྱལ་སྤྱིའི་ནང་རྒྱ་ནག་གི་ཤུགས་རྐྱེན་ཇེ་ཆེར་གཏོང་ཐབས་ལ་ཐབས་ཤེས་ཡོད་རྒུ་འདོན་བཞིན་པའི་ཉེན་བརྡ་བཏང་ཡོད། ད་དུང་ཨ་རིའི་གཞུང་འབྲེལ་མི་སྣ་ཁ་ཤས་ཀྱིས་རྒྱ་ནག་གཞུང་གིས་ཨ་མེ་རི་ཀའི་འོས་བསྡུ་ལ་ཤུགས་རྐྱེན་ཐེབས་རྒྱུའི་དམིགས་ཡུལ་འཛིན་བཞིན་པའི་ཉེན་བརྡ་ཡང་བཏང་མྱོང་། ཡིན་ན་ཡང་ཐེངས་འདིའི་ཨ་རིའི་ཕྱི་སྲིད་ལྷན་ཁང་གི་སྙན་ཐོའི་ནང་གསལ་བ་དེ་སྙན་ཐོ་གོང་མ་དེ་ཚོ་དང་མི་འདྲ་བར། རྒྱ་ནག་གིས་རྒྱལ་སྤྱིའི་ནང་གི་སྒྲིག་འཛུགས་དང་ཚོགས་པ། བརྗོད་གཞི་བྱེ་བྲག་པ་གཅིག་ལ་གམིགས་ནས་ཤུགས་རྐྱེན་ཙམ་ཐེབས་རྒྱུ་ཙམ་མ་ཡིན་པར། ཁྱབ་ཆེ་ཞིང་ཚད་བཀག་མེད་པའི་ངང་གོ་ལ་ཧྲིལ་བོའི་གནས་ཚུལ་ལ་དབང་བསྒྱུར་རྒྱུའི་གདེང་ཚོད་ཅིག་རྙེད་ཡོད་པ་ངོས་འཛིན་བྱེད་འདུག
ཡང་སྙན་ཐོ་འདིའི་ནང་བསྟན་དོན་ལྟར་ན་རྒྱ་ནག་གི་དམིགས་ཡུལ་ནི་ཤུགས་རྐྱེན་ཐེབས་ཐབས་ཁོ་ན་མ་ཡིན་པར་དེ་ལས་རྒྱ་ཆེ་བའི་དམིགས་ཡུལ་ཡོད་པ་སྟེ། རྒྱ་ནག་ལ་ཁེ་ཕན་ལྡན་པའི་གནས་ཚུལ་དེ་ཚོ་འཛམ་གླིང་སྐྱེས་བོ་ཡོངས་ཀྱིས་མཐོང་བ་དང་ཐོས་པར་བྱེད་དེ། འབྱུང་འགྱུར་རྒྱལ་སྤྱིའི་མི་མང་དང་གསར་ཁང་ཁག ཤེས་ཡོན་པ། སྲིད་གཞུང་ཁག་བཅས་ཁྱོན་ཡོངས་ནསརྒྱ་ནག་གི་བཟང་ཕྱོགས་ཁོ་ནའི་གནས་ཚུལ་གོ་ཐུབ་རྒྱུའི་དམིགས་ཡུལ་བཟུང་ཡོད་འདུག
ཨ་རིའི་རླུང་འཕྲིན་ཁང་གི་རྒྱ་ནག་གཞུང་ཚབ་ཁང་ལ་འབྲེལ་བ་ཞུས་པར་རྒྱ་ནག་གཞུང་ཚབ་ཀྱི་མགྲིན་ཚབ་པ་ལེའུ་ཕིན་ཡུ་ཡིས་ཨ་རིའི་རླུང་འཕྲིན་ཁང་ལ་གློག་འཕྲིན་རྒྱུད་ལན་འདེབས་བྱེད་པའི་ནང་ལ། སྙན་ཐོ་དེ་ནི་ཨ་མེ་རི་ཀས་རང་ཉིད་ལ་མཐོང་ཆེན་དང་རྒྱ་ནག་ལ་མཐོང་ཆུང་བྱེད་སྟངས་ཙམ་རེད། སྙན་ཐོ་དེའི་བརྗོད་སྙིང་མདོར་བསྡུས་དེར་ལྟས་རྗེས་ལམ་སེང་ཧ་གོ་ཡོང་གི་འདུག ངོ་རྒོལ་གྱི་ལྟ་བ་གསལ་སྟོན་དང་གནས་ཚུལ་རྫུན་མ་སྤེལ་བ། རྒྱ་ནག་རྒྱལ་ནང་དང་ཕྱི་འབྲེལ་སྲིད་ཇུས་ནག་པོ་བཟོ་འདོད་པ་རེད། རྒྱ་ནག་གིས་གནས་ཚུལ་ཁྱབ་སྤེལ་ལ་སྟངས་འཛིན་བྱེད་བཞིན་འདུག་ཅེས་ཨ་རིའི་སྐྱོན་བརྗོད་བྱེད་རྒྱུ་མཚམས་འཇོག་བྱ་དགོས་ཞེས་བྲིས་འདུག
ཨ་རིའི་ཕྱི་སྲིད་ལྷན་ཁང་གི་སྙན་ཐོ་དེ་ནི་ཡོངས་གྲགས་ཀྱི་གནས་ཚུལ་ཁག་དང་ཡང་དམིགས་བསལ་ཡོངས་ཁུངས་ཀྱི་གནས་ཚུལ་ཁག་བཅས་གཞི་ལ་བཞག་ཡོད་པ་གསལ་བཤད་བྱེད་འདུག
ཨ་རིའི་ཕྱི་སྲིད་ལྷན་ཁང་གི་སྙན་ཐོ་དེའི་བརྗོད་སྙིང་ཕྱོགས་སྒྲིག་གི་ནང་དུ་ཤོག་གྲངས་༥༨་ཅན་གྱི་སྙན་ཐོ་དེ་ས་བཅད་གསུམ་གྱི་ནང་ལ་བསྡུས་འདུག
༡ རྒྱ་ནག་གིས་རྒྱལ་སྤྱིའི་ཁྱོན་ཡོངས་ཀྱི་གནས་ཚུལ་རྒྱུད་ལམ་དང་གནས་ཚུལ་ནང་དོན་གཉིས་ཀར་མངོན་ལྐོག་གཉིས་ནས་ཤུགས་རྐྱེན་ཐེབས་བཞིན་པ།
རྒྱ་ནག་དབུས་གཞུང་གཉེར་གསར་ཁང་གིས་ཕྱི་རྒྱལ་གྱི་གསར་ཁང་དང་གསར་འགྱུར་ཚོགས་པ་༡༧༠༠་ལྷག་ལ་བརྙན་དང་དེའི་འགྲེལ་བརྗོད་ཡི་གེ་རིན་མེད་ཐོག་མཁོ་སྤྲོད་བྱེད་བཞིན་པ་མ་ཟད། རྒྱ་ནག་གཞུང་གི་སྤེལ་ཟིན་པའི་གནས་ཚུལ་རྣམས་ཀྱི་མགོ་བརྗོད་བརྗེ་ཙམ་དང་། བརྙན་དང་གནས་ཚུལ་གྱི་བདག་དབང་ཆ་ཚང་སྤྲོད་བཞིན་པ་ལས། དེའུ་ཕུགས་སུ་ཕྱི་རྒྱལ་བས་རྒྱ་ནག་སྐོར་ལ་བཟོས་པའི་གནས་ཚུལ་ཡིན་པའི་ངོ་བོ་ཐོན་ཡོད་འདུག ཡང་ཐེ་ལན་ཌིར་ཕྱི་རྒྱལ་བས་གསར་ཁང་འཛུགས་མི་ཆོག་པའི་ཁྲིམས་ཡོད་ན་ཡང་། ཐེ་ལན་ཌིར་ཡོད་པའི་རྒྱ་ནག་གི་བརྡ་འཕྲིན་བཟོ་ཆོང་ཁང་ཆེ་གྲས་ཤིག་གིས་ཐེ་ལན་ཌིའི་མི་སེར་ཡིན་པའི་མིའི་མིང་ཐོག་ལ་གསར་འགྱུར་དྲ་ཚིགས་སྐད་གྲགས་ཆེ་ཤོས་ཏེ་ཟླ་བ་རེར་གསར་འགྱུར་དྲ་ཚིགས་དེ་བེད་སྤྱོད་གཏོང་མཁན་མི་གྲངས་ས་ཡ་༣༠་ལྷག་ཡོད་པ་དེ་ཉོས་ཏེ་དོ་དམ་བྱེད་བཞིན་པ་ལྟ་བུའི་ཐབས་ལན་སྤྱོད་བཞིན་པ། ཡང་ཨ་ཧྥེ་རི་ཀར་སྐར་མའི་དུས་རབས་ཞེས་པའི་རྒྱ་ནག་གི་བརྡ་འཕྲིན་ཚོང་ལས་ཁང་ཡོད་པ་དེ་རྒྱུད་ནས་བརྙན་འཕྲིན་རྒྱུད་ལམ་མཁོ་སྤྲོད་བྱེད་མཁན་བཟོ་ཚོང་ཁང་ཕལ་ཆེ་ཤོས་ལ་མཉམ་ལས་ཀྱིས་མི་མང་གིས་བརྙན་འཕྲིན་རྒྱུད་ལམ་གང་དང་གང་ལ་ལྟ་མིན་རྒྱ་ནག་གི་སྐར་མའི་དུས་རབས་ཞེས་པ་དེ་ཡིས་སྟངས་འཛིན་བྱེད་ཐུབ་ཀི་ཡོད་འདུག ཡང་སྤྱི་ལོ་༢༠༢༡་ལོར་དྲ་ལམ་དུ་སྐད་གྲགས་ཡོད་པའི་མི་སྣ་བརྒྱ་ཙམ་གྱིས་རྒྱུད་ལམ་མ་འདྲ་བ་མང་པོར་མ་མཐར་ཡང་སྐད་ཡིག་མི་འདྲ་བ་༢༠་ཡི་ནང་ལ་རྒྱ་ནག་གཞུང་འབྲེལ་གྱི་གནས་ཚུལ་སྤེལ་ཏེ་རྒྱལ་ཁབ་མང་པོའི་ནང་ནས་མ་མཐར་ཡང་བརྗེད་འདེད་པ་ས་ཡ་༡༡་རེ་འགུག་ཐུབ་ཡོད་འདུག
༢ རྒྱ་ནག་གིས་རྒྱལ་སྤྱིའི་སྨྲ་བརྗོད་རང་དབང་ལ་ཚོད་འཛིན་བྱེད་བཞིན་པ།
སི་པན་དུ་རྟེན་གཞི་བྱེད་ཡོད་པའི་Safeguard Defenders་ཞིབ་འཇུག་ཚོགས་པས་རྒྱལ་སྤྱིའི་རྒྱལ་ཁབ་༥༣་ཡི་ནང་དུ་རྒྱ་ནག་གི་ཉེན་རྟོག་ལས་ཁུངས་ཡོད་པ་དང་། དེ་ཚོ་རྒྱ་ནག་རྒྱལ་ནང་གི་ས་གནས་སྤྱི་བདེ་ལས་ཁུངས་ལ་འབྲེལ་བ་ཡོད་པའི་སྐོར་གྱི་སྙན་ཐོ་བཏོན་པར་དྲ་བྱང་༡༠༠༠ལྷག་གིས་དེ་གསང་བྱེད་ཐབས་བྱེད་ཡོད་པ། ཡང་སྤྱི་ལོ་༢༠༢༡་ལོར་ལཱི་ཐུ་ནི་ཡཱ་དྲ་ལམ་བདེ་འཇགས་ལྟེ་གནས་ཀྱིས་སྙན་ཐོ་བཏོན་ནས་རྒྱ་ནག་གིས་བཟོས་པའི་ཁ་པར་ཞཱོ་མེན་རྟགས་ཅན་དེའི་མ་ལག་ནང་ལ་མ་མཐར་ཡང་ཐ་སྙད་༤༤༩་ལ་ཚོར་བ་སྐྱེན་པོ་ཡིན་པར་ངོས་འཛིན་གྱི་ནུས་པ་ཡོད་པ་བཟོས་ཡོད་པ་གསལ་སྟོན་བྱས་ཡོད། ཡང་རྒྱ་ནག་གཞུང་གིས་སྐད་འཕྲིན་བེད་སྤྱོད་བཏང་ནས་ཕྱི་རྒྱལ་དུ་ཡོད་པ་ཚོའི་སྨྲ་བརྗོད་བཀག་སྡོམ་བྱེད་བཞིན་པ་སྟེ། ཕྱི་རྒྱལ་ནས་སྐད་འཕྲིན་བཟོས་ཏེ་སྐད་འཕྲིན་བེད་སྤྱོད་གཏོང་མཁན་ཕན་ཚུན་བར་གྱི་སྐད་ཆ་ལ་ལྐོག་ཉན་དང་ལྟ་རྟོགས་བྱེད་བཞིན་པ། སྐད་འཕྲིན་གྱི་སྒྲོམ་གཞིའི་ནང་ལ་ཐ་སྙད་སོགས་ཚོར་བ་སྐྱེན་པོའི་རིགས་ལམ་སེང་ངོས་འཛིན་ཐུབ་ཐབས་བཟོས་ཡོད་པ། ཡང་སྤྱི་ལོ་༢༠༡༩་ལོར་ཧྥ་རན་སིའི་ཞིབ་འཇུག་པ་ཞིག་གིས་ཧཱ་ཝེ་བཟོ་ཚོང་ཁང་རྒྱ་ནག་དབུས་གཞུང་གི་ལྟ་རྟོགས་དོ་དམ་འོག་ཡོད་པ་དང་། བཟོ་ཚོང་ཁང་གི་ནང་དུ་དམར་ཤོག་གཞུང་གི་ཆེད་གཏོང་མི་སྣ་ཡོད་པ་དོགས་གཞི་བྱེད་བཞིན་པར་གླེང་སློང་བྱེད་པར་ཧྥ་རན་སིར་ཡོད་པའི་ཧཱ་ཝེ་ཡན་ལག་བཟོ་ཚོང་ཁང་གིས་མཚན་ཤས་བཟོས་སོང་ཞེས་ཞིབ་འཇུག་པ་དེ་ཁྲིམས་ལ་སྦྱར།
༣ རྒྱ་ནག་གིས་ཁྱབ་བརྡལ་གཏོང་བཞིན་པའི་འཕྲུལ་རིག་ལྟ་སྲུང་གི་ཁོར་ཡུག་གསར་བ་ཞིག
རྒྱ་ནག་གི་ཆེས་ཡར་ཐོན་ཅན་གྱི་འཕྲུལ་རིག་ལག་རྩལ་ཕྱིར་ཚོང་གིས་གྲོང་ཁྱེར་བདེ་འཇགས་ལྟ་བུའི་བརྡ་ཆད་གསར་བའི་འོག་ནས་རྒྱལ་སྤྱིའི་ནང་ལ་གཞུང་གིས་མི་མང་ལ་ལྟ་སྲུང་དོ་དམ་བྱེད་རྒྱུར་སྐུལ་འདེད་གཏོང་གི་ཡོད་ཅིང་། སྤྱི་ལོ་༢༠༢༡་ལོའི་སྤྱི་ཟླ་༦་པར་གྲོང་ཁྱེར་དང་སྤྱི་དམངས་བདེ་འཇགས་ཀྱི་ལས་འཆར་ཞེས་རྒྱ་ནག་གཞུང་གིས་འཕྲུལ་རིག་ལག་རྩལ་གསར་བས་མིའི་འགྲོ་འདུག་ལ་ལྟ་སྲུང་དང་བྱ་ར་བྱེད་རྒྱུར་ལས་འཆར་༡༦༣་གཉེར་བཞིན་པ་ཞིན་ཅང་དུ་ལག་བསྟར་བྱེད་མགོ་བཙུགས་པའི་གནས་ཚུལ་ཐོན་ཡོད། ཡང་སྤྱི་ལོ་༢༠༡༩་ལོར་རྒྱ་ནག་གཞུང་གིས་རྒྱལ་ཁབ་༡༠༢་ལ་བརྡ་འཕྲིན་སྟངས་འཛིན་དང་དོ་དམ་བྱེད་བཞིན་པ་རེད། དེར་བརྟེན་དེའི་ནང་གི་རྒྱལ་ཁབ་༡༡་གིས་རྒྱ་ནག་གི་བརྡ་འཕྲིན་རྒྱུད་ལམ་ལ་སྟངས་འཛིན་བྱེད་སྟངས་དང་དོ་དམ་བཀག་སྡོམ་གྱི་ཁྲིམས་ལ་དཔེ་བླངས་ཏེ་གཅིག་མཚུངས་བེད་སྤྱོད་གཏོང་མགོ་བཙུགས་ཡོད། ད་དུང་རྒྱ་ནག་གཞུང་གི་རོགས་རམ་འོག་ཕྱི་རྒྱལ་གྱི་སྲིད་གཞུང་ཁ་ཤས་ཀྱིས་ཨ་སྒོར་ས་ཡ་བརྒྱ་ཕྲག་བཏང་ནས་ཧཱ་ཝེ་བརྡ་འཕྲིན་བཟོ་ལས་ཁང་གི་འཕྲུལ་རིག་ཐོན་རྫས་དཔེར་ན་གཞུང་དང་ལྟ་བ་མི་མཐུན་པའི་མི་ཚོའི་སྐད་ཆར་ལྐོག་ཉན་དང་ས་གནས་གང་དུ་ཡོད་པ་ལྐོག་ལྟ་བྱེད་ཐུབ་སའི་བརྡ་འཕྲིན་ཐོན་རྫས་བེད་སྤྱོད་བྱེད་མགོ་བཙུགས་ཡོད་པ། ད་དུང་སྤྱི་ལོ་༢༠༢༡་ལོའི་སྤྱི་ཟླ་༡༡་ལ་མ་མཐར་ཡང་རྒྱལ་ཁབ་༡༨་ཀྱིས་ཧྭ་ཝེ་བརྡ་འཕྲིན་ཁང་གིས་བཟོས་པའི་བར་སྒམ་ཞེས་པའི་དྲ་ལམ་བཀག་སྡོམ་བྱེད་བྱད་ཅིག་བེད་སྤྱོད་གཏོང་མགོ་བཙུགས་ཡོད་འདུག དེ་བཞིན་རྒྱ་ནག་གི་བྷེ་ཌི་ཌན་སི་ལ་བདག་པའི་ཌེག་ཌིག་(TikTok) དྲ་ལམ་དུ་རྒྱ་ནག་གཞུང་ལ་སྐྱོན་བརྗོད་དམ་གནོད་པའི་གནས་ཚུལ་ཕྲ་མོ་ཞིག་ཐོན་ཚེ་་རང་བཞིན་གྱིས་མེད་པར་གཏོང་བའི་བྱེད་ནུས་སྤྱད་ཡོད་པ་མ་ཟད་ཡང་ཕྱི་རྒྱལ་ནས་སྐྱོན་བརྗོད་བྱུང་བ་ཡང་ཚུད་ཀི་ཡོད་འདུག