༄༅།། ཨུ་རུ་སུའི་སྲིད་འཛིན་ཕུ་ཊིན་གྱིས་སློབ་གྲྭ་ཁག་ཏུ་གཞུང་གི་ཆོག་མཆན་བཀོད་པའི་འགྲེལ་ཚུལ་གྱི་ལོ་རྒྱུས་རྣམས་སློབ་ཁྲིད་བྱ་རྒྱུ་གཙིགས་སུ་འཛིན་དགོས། ཡུཀ་རེན་གྱི་ཤར་ཕྱོགས་ས་གནས་ཁག་གི་ཕྲུ་གུ་ཚོས་སྔོན་ཆད་ཨུ་རུ་སུ་དང་ཡུཀ་རེན་གཉིས་རྒྱལ་ཁབ་གཅིག་ཡིན་པ་ཤེས་ཀྱི་མེད་པར་ང་ཧང་སང་སོང་ཞེས་དགེ་སློབ་ཁག་ཅིག་ལ་གཏམ་བཤད་བྱས་འདུག ཕྱི་ཟླ་༩་པའི་ཚེས་༡་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཕུ་ཊིན་གྱིས་ཨུ་རུ་སུ་རྒྱལ་ཡོངས་ཀྱི་སློབ་གྲྭ་ཁག་ནས་བདམས་པའི་སློབ་ཕྲུག་ཁག་ཅིག་ཀ་ལིན་ནིང་གྷ་རེ་ཌི་ས་གནས་ཀྱི་སློབ་གྲྭ་ཞིག་ལ་བསྐོངས་ཏེ་ཐུག་འཕྲད་བྱས་ཤིང་། ཁོང་གིས་དགེ་སློབ་ཚོས་ཅི་ཞིག་གལ་འགངས་ཆེན་པོ་ཡིན་པ་ངོས་ཟིན་ནས་སློབ་གྲྭ་འགོ་ཚུགས་པའི་སྐབས་འདིར་ཨུ་རུ་སུ་རྒྱལ་ཡོངས་ཀྱི་སློབ་གྲྭ་ཁག་ཏུ་སློབ་ཚན་ཅི་ཞིག་འཁྲིད་དགོས་མིན་ཤེས་དགོས་ཞེས་ནན་གྱིས་བསྐུལ། ཡུཀ་རེན་ཤར་ཕྱོགས་ཀྱི་ཨུ་རུ་སུའི་སྐད་ཡིག་སྨྲ་བའི་མི་དམངས་རྣམས་སྲུང་སྐྱོབ་བྱེད་པར་དམག་དཔུང་མ་བཏང་ཀ་མེད་དུ་གྱུར་སོང་ཞེས་བཤད། དུས་ཡུན་ཆུ་ཚོད་གཅིག་གི་དྲི་བ་དྲིས་ལན་རིང་ཕུ་ཊིན་ནས་ཡུཀ་རེན་ཤར་ཕྱོགས་ཀྱི་ས་གནས་ཁག་གི་ཕྲུ་གུ་ཚོས་རང་གི་རྒྱལ་ཁབ་དེ་སྔོན་མར་ཨུ་རུ་སུ་དང་མཉམ་དུ་རྒྱལ་ཁབ་གཅིག་ཡིན་པ་ཤེས་ཀྱི་མི་འདུག ལོ་རྒྱུས་ལ་ཡོ་བསྲང་བྱ་རྒྱུ་ནི་གནད་འགག་ཆེ། ༢༠༡༤་ལོར་ཡུཀ་རེན་བ་ཉུང་ཤས་ཀྱིས་ངོ་རྒོལ་བྱས་ནས་ཨུ་རུ་སུའི་ཕྱོགས་གཏོགས་སྲིད་འཛིན་ཡ་ནུ་ཀོ་ཝི་ཆིའི་སྲིད་གཞུང་མགོ་རྟིང་སློག་པ་དེ་སྲིད་འགྱུར་རེད། དེང་སྐབས་མི་ཚང་མས་ཨུ་རུ་སུས་བཙན་འཛུལ་བྱེད་ཀྱི་འདུག་བསམ་གྱི་ཡོད་པ་འདྲ། ཡིན་ནའང་༢༠༡༤་ལོར་སྲིད་འགྱུར་བྱུང་བའི་རྗེས་སུ་ཌོ་ནེ་ཛིཀ་དང་ལུ་ཧན་སིཀ ཁེ་རེ་མཱི་ཡ་བཅས་ས་གནས་ཕལ་ཆེ་བའི་མི་མང་གིས་སྲིད་འགྱུར་དེར་མོས་མཐུན་བྱས་མེད་པ་ཀུན་གྱིས་སྣང་མེད་དུ་འཇོག་གི་འདུག ས་ཁུལ་དེ་དག་ལ་གྱེན་ལོག་དམག་འཁྲུག་ལངས་ནས་ལོ་༨་ཕྱིན་པ་རེད་ཅེས་བཀྲལ།།
༢༠༡༤་ལོར་ཡུཀ་རེན་གྱི་སྲིད་འཛིན་ཡ་ནུ་ཀོ་ཝི་ཆི་ཨུ་རུ་སུར་བཙན་བྱོལ་དུ་བྲོས་པའི་རྗེས་སུ་ཕུ་ཊིན་གྱིས་འཕྲལ་དུ་དམག་བཏང་ནས་ཁེ་རེ་མཱི་ཡ་དང་ཌོ་ནེ་ཛིཀ ལུ་ཧན་ཛིཀ་སོགས་ཡུ་རེན་ཤར་ཕྱོགས་ཀྱི་ས་གནས་ཁག་བཙན་གྱིས་ཕྲོགས། ཕུ་ཊིན་གྱིས་ཨུ་རུ་སུ་དང་ཨུ་རུ་སུའི་བཙན་བཟུང་བྱས་པའི་ཡུཀ་རེན་གྱི་ས་གནས་ཁག་ཏུ་ཨུ་རུ་སུའི་གཞུང་གིས་ཆོག་མཆན་བཀོད་པའི་སློབ་ཚན་འཁྲིད་རྒྱུ་གལ་གནད་ཆེན་པོ་ཡིན་ཞེས་བསྟན། ཨུ་རུ་སུའི་གཞུང་གིས་ཆོག་མཆན་བཀོད་པའི་ལོ་རྒྱུས་ཀྱི་སློབ་དེབ་ནང་དུ་༡༩༩༡་ནས་ཡུཀ་རེན་བདག་དབང་ལྡན་པ་དང་ལོ་རྒྱུས་ཅན་གྱི་རང་བཙན་རྒྱལ་ཁབ་ཅིག་ཡིན་པ་ཁས་མི་ལེན། ད་ལོའི་ཕྱི་ཟླ་༢་པའི་ཚེས་༢༤་ཉིན་ཨུ་རུ་སུས་ཡུཀ་རེན་ལ་བཙན་འཛུལ་བྱས་ནས་བཟུང་། ཕུ་ཊིན་གྱིས་ཨུ་རུ་སུའི་སློབ་གྲྭ་ཁག་ཏུ་རྒྱལ་གཅེས་རིང་ལུགས་ཀྱི་སློབ་གསོ་གཏོང་དགོས། ཕྱི་ཟླ་༩་པའི་ཚེས་༡་ནས་བདུན་ཕྲག་གཅིག་གི་རིང་སློབ་ཕྲུག་ཚོས་རྒྱལ་དར་བསྒྲེངས་ཏེ་རྒྱལ་གླུ་ལེན་པའི་ལས་འགུལ་ཞིག་སྤེལ་དགོས་ཞེས་བཀའ་ཕབ། སྔོན་ཆད་ཨུ་རུ་སུར་དམར་ཤོག་གི་དུས་སུ་ལེ་ནིན་རིང་ལུགས་ཀྱི་དམར་ཤོག་གཞོན་ནུ་ཚོགས་པ་དང་ན་གཞོན་མདུན་སྐྱོད་ཚོགས་པ་ཞེས་སྒྲིག་འཛུགས་སྣ་ཚོགས་ཤིག་ཡོད་པ་དེ་དག་ལ་ཕུ་ཊིན་གྱིས་མིག་དཔེ་བལྟས་ནས་གཞུང་གི་ན་གཞོན་སྒྲིག་འཛུགས་གསར་པ་ཁག་ཅིག་བཙུགས། ཕུ་ཊིན་གྱི་སྒྲིག་འཛུགས་དེའི་འགན་འཛིན་ལྷན་ཚོགས་གི་གཙོ་འཛིན་བྱས་ནས་ཨུ་རུ་སུ་རྒྱལ་ཡོངས་སུ་སྲིད་གཞུང་ལ་དགའ་མོས་དང་རྒྱབ་སྐྱོར། ཨུ་རུ་སུའི་གཞུང་གི་ཕྱོགས་སུ་གཏོགས་པའི་གཞོན་ནུའི་ཚོགས་པ་ཁག་འཛུགས་ཐབས་སུ་འབད། ང་ཚོའི་མི་དམངས་ཞེས་པའི་ཚོགས་པ་ཞིག་བཙུགས་ཀྱང་ཕྱིས་སུ་ཁུངས་མ་འཁྱོལ། ཕྱི་ལོ་༢༠༠༠་ཡས་མས་སུ་ཚོགས་པ་དེར་ཚོགས་མི་འབུམ་༡་ཡས་མས་ཤིག་འདུས། ད་ལྟ་ཕུ་ཊིན་གྱིས་ཨུ་རུ་སུའི་ན་གཞོན་ཚོའི་ཀླད་པ་བཀྲུ་ཐབས་བྱེད་ཀྱི་ཡོད་པའི་གནས་ཚུལ་ཐོན་འདུག
ཕྱི་ཟླ་༨་པའི་ཚེས་༢༥་ཉིན་ཚོང་ལས་ནང་ཚགས་གསར་ཁང་གིས་གནས་ཚུལ་སྤེལ་བ་ལྟར་ན། ཨུ་རུ་སུའི་བཙན་བཟུང་འོག་ཏུ་ཚུད་པའི་ཡུཀ་རེན་གྱི་ཤར་ཕྱོགས་ས་གནས་ཁག་གི་ཕ་མ་ཚོས་ཕྲུ་གུ་ཨུ་རུ་སུའི་གཞུང་གིས་བཙུགས་པའི་སློབ་གྲྭ་ཁག་ལ་བཏང་ཚེ། ཡུཀ་རེན་གྱི་ཕ་མ་ཚོར་ཨུ་རུ་སུའི་གཞུང་གིས་ཨ་སྒོར་༡༦༧་རེ་སྤྲོད་ཆོག ཌོ་ནེ་ཛིཀ་དང་ལུ་ཧན་ཛིཀ ཛ་པ་རི་ཤི་ཡ་དང་ཁར་ཀིབ། ཁར་སན་བཅས་ཀྱི་ས་གནས་ཁག་གི་ཕ་མ་ཚོས་ཕྱི་ཟླ་༩་པའི་ཚེས་༡༥་མི་འགྱངས་པར་ཕྲུ་གུ་རྣམས་སློབ་གྲྭར་བཏང་ན་ཨུ་རུ་སུའི་དངུལ་ལོར་རུ་བྷུལ་ཁྲི་ཚོ་༡་རེ་སྤྲོད་རྒྱུ་ཡིན་ཞེས་བསྒྲགས། ཨུ་རུ་སུས་བཙན་བཟུང་བྱས་པའི་ཡུཀ་རེན་གྱི་ས་གནས་ཁག་ཏུ་ཨུ་རུ་སུའི་དངུལ་ལོར་རུ་བྷུལ་བཀོལ་སྤྱོད་བྱེད་དུ་འཇུག་གི་ཡོད་པར་མ་ཟད། ཡུཀ་རེན་ཤར་ཕྱོགས་ཀྱི་ས་གནས་ཁག་གི་སློབ་གྲྭའི་ཤེས་ཡོན་སློབ་གསོའི་ལམ་ལུགས་ཀྱང་ཨུ་རུ་སུའི་ལམ་ལུགས་སུ་བསྒྱུར། ལམ་ལུགས་དེའི་ནང་དུ་ཨུ་རུ་སུ་འཇིག་རྟེན་གྱི་ལྟེ་བར་འཛིན་དགོས་པའི་སློབ་ཚན་རྣམས་བསྒྲིགས། ཕུ་ཊིན་གྱི་སློབ་གསོའི་སྲིད་ཇུས་ལ་མོས་མཐུན་མི་བྱེད་མཁན་ཕ་མ་ཚོར་ཉེས་ཆད་བཅད། ས་གནས་དེ་དག་གི་ཡུཀ་རེན་གྱི་དགེ་རྒན་ཚོར་འཇིགས་སྐུལ་བྱེད་ཀྱི་ཡོད་པའི་གནས་ཚུལ་ཐོན། ཕྱི་ཟླ་༧་པའི་ནང་དུ་ཁར་ཀིབ་གྲོང་ཁྱེར་གྱི་སློབ་གྲྭ་ཁག་ཏུ་ཨུ་རུ་སུའི་གཞུང་གིས་གཏན་འབེབས་བྱས་པའི་ལོ་རྒྱུས་དང་ས་ཁམས། སྐད་ཡིག་བཅས་ཀྱི་སློབ་ཚན་རྣམས་འཁྲིད་དགོས་ཞེས་བཙན་བཀའ་བཏང་ཞིང་། ས་གནས་དེའི་དགེ་རྒན་ཞིག་གིས་ཨུ་རུ་སུའི་སྐད་ཡིག་གི་རྩིས་རིག་དང་དངོས་ཁམས། སྐྱེ་དངོས་རིག་པ་དང་རྫས་འགྱུར་སོགས་ལ་ཆབ་སྲིད་ཀྱི་དྲིལ་བསྒྲགས་ངན་པའི་ཤུགས་རྐྱེན་ཐེབས་མེད་པས་ཁྱད་པར་མི་འདུག ལོ་རྒྱུས་དང་ས་ཁམས་གཉིས་ཨུ་རུ་སུའི་གཞུང་གི་འགྲེལ་ཚུལ་ལྟར་སློབ་ཁྲིད་བྱ་དགོས་ཟེར་གྱི་ཡོད་པ་དང་སློབ་ཚན་ཐམས་ཅད་ཨུ་རུ་སུའི་སྐད་ཡིག་ཏུ་འཁྲིད་དགོས་ཟེར་གྱི་འདུག་ཅེས་གསར་འགོད་པར་ནང་མོལ་བྱས་འདུག
ནེའུ་ཡོཀ་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། ཛ་པོ་རི་ཤི་ཡ་ས་གནས་ཀྱི་མེ་ལི་ཊོ་པོལ་གྲོང་ཁྱེར་ནི་ཕྱི་ཟླ་༣་པའི་ནང་དུ་ཨུ་རུ་སུའི་དབང་བསྒྱུར་འོག་དུ་ཚུད། གྲོང་ཁྱེར་དེའི་དགེ་རྒན་ཁག་ཅིག་བཙན་འཛུལ་གྱི་མགོ་སྟོད་ནས་བྲོས་བྱོལ་དུ་སོང་། དགེ་རྒན་ཁག་ཅིག་ཨུ་རུ་སུའི་གཞུང་གིས་གཏན་འབེབས་བྱས་པའི་སློབ་དེབ་རྣམས་སློབ་ཁྲིད་བྱ་རྒྱུར་འཐད་པ་མ་བྱུང་བར་ལས་མཚམས་བཞག ས་གནས་དེའི་སློབ་ཕྲུག་ཚོ་དངོས་སུ་འཛིན་གྲྭའི་ནང་དུ་ཚོགས་མཁན་ཇེ་ཉུང་དུ་སོང་། ཡུཀ་རེན་གྱི་གཞུང་གིས་དྲྭ་ལམ་སློབ་གྲྭ་བཙུགས་ཏེ་ཨུ་རུ་སུའི་དབང་བསྒྱུར་འོག་ཏུ་ཚུད་པའི་ས་གནས་ཁག་ཏུ་ཡུཀ་རེན་གྱི་སློབ་ཚན་རྣམས་སློབ་ཁྲིད་བྱ་རྒྱུར་ཤུགས་སྣོན་བརྒྱབ། ཨུ་རུ་སུར་མཉམ་འབྲེལ་བྱེད་མཁན་སློབ་གྲྭ་ཞིག་གིས་ཕ་མ་ཚོས་ཕྲུ་གུ་སློབ་གྲྭར་མ་བཏང་ན་རུ་བྷུལ་ཁྲི་ཚོ་༤་ལྷག་ཉེས་ཆད་གཅོད་རྒྱུ་ཡིན། ཕ་མ་དེ་ཚོར་བུ་ཕྲུག་བདག་སྐྱོང་བྱེད་ཆོག་པའི་ཐོབ་ཐང་མེད་པར་གཏོང་རྒྱུ་ཡིན་ཞེས་སྡིགས་ར་བསྐུལ། ཕྱི་ཟླ་༧་པའི་ནང་དུ་ཁར་སན་ས་ཁུལ་གྱི་ལོ་རྒྱུས་དགེ་རྒན་ཞིག་གིས་ས་གནས་མི་མང་ལ་ཕྲུ་གུ་རྣམས་ཨུ་རུ་སུའི་གཞུང་གིས་བཙུགས་པའི་སློབ་གྲྭ་ཁག་ཏུ་གཏོང་འདོད་མེད་ཀྱང་ཁྲིམས་གཅོད་ལ་སྐྲག་གི་འདུག་ཅེས་ཡུ་རོབ་རང་དབང་རླུང་འཕྲིན་ཁང་ལ་བཤད། ཛ་པོ་རི་ཤི་ཡ་ས་གནས་ཀྱི་ཨེ་ནར་ཧོ་དྷར་གྲོང་ཁྱེར་གྱི་དགེ་རྒན་ཞིག་གིས་ཀྱང་ཁར་ཀིབ་ས་གནས་སུ་འབྱུང་བཞིན་པའི་དཀའ་ངལ་གཅིག་མཚུངས་ཤིག་ཨེ་ནར་ཧོ་དྷར་གྲོང་ཁྱེར་དུའང་འབྱུང་གི་འདུག་ཅེས་ཡུ་རོབ་རང་དབང་རླུང་འཕྲིན་ཁང་ལ་བཤད། ཕུ་ཊིན་གྱིས་ཕྱོགས་གཅིག་ནས་ཡུཀ་རེན་གྱི་ཤར་ཕྱོགས་ས་གནས་ཁག་བཙན་འཕྲོག ཕྱོགས་གཞན་ཞིག་ནས་ས་གནས་དེ་དག་གི་ཡུཀ་རེན་གྱི་ཕྲུ་གུ་ཚོར་ཨུ་རུ་སུའི་མི་རིགས་ཀྱི་འདུ་ཤེས་སྐྲུན་ཐབས་དང་བག་ཆགས་འཇོག་ཐབས་བྱེད་ཀྱི་ཡོད་པའི་གནས་ཚུལ་ཐོན་འདུག
ཕྱི་ཟླ་༨་པའི་ཚེས་༣༡་ཉིན་ཨ་རིའི་པོ་ལི་ཊི་ཀོ་གསར་ཁང་གིས་ཨུ་རུ་སུ་དམར་ཤོག་གསར་འཛུགས་པ་ལེ་ནིང་གིས་སྔོན་ཆད་ང་ལ་ཕྲུ་གུ་ཚོར་སློབ་གསོ་སྤྲོད་པའི་ལོ་བཞིའི་དུས་ཚོད་སྤྲོད། དེ་ནས་ངས་བཏབ་པའི་ས་བོན་ནི་ནམ་ཡང་རྩ་བཀོག་བྱེད་མི་ཐུབ་པ་ཞིག་ལ་བསྒྱུར་ཐུབ་ཅེས་འུད་ཤོབ་བཤད་པ་ལྟར་ཕུ་ཊིན་གྱིས་ཨུ་རུ་སུ་དམར་ཤོག་གསར་འཛུགས་པ་ལེ་ནིང་ལ་མིག་དཔེ་བལྟས་ནས་ལད་ཟློས་བྱེད་ཀྱི་འདུག་ཅེས་གནས་ཚུལ་སྤེལ། ཨུ་རུ་སུའི་ཕྱི་སྲིད་ལྷན་ཁང་གི་མགྲིན་ཚབ་པ་མ་རི་ཡ་ཛ་ཀ་རོབ་ཀྱིས་མོ་སི་ཀོའི་སློབ་གྲྭ་ཁག་གི་ལོ་རྒྱུས་དང་སྤྱི་ཚོགས་ཚན་རིག་གི་དགེ་རྒན་ཁག་ཅིག་ལ་ཁྱོད་ཚོ་དྲིལ་བསྒྲགས་དམག་འཁྲུག་གི་མདུན་སྐྱོད་པ་རེད། ཕུ་ཊིན་གྱིས་ཌོ་ནེ་ཛིཀ་དང་ལུ་ཧན་ཛིཀ་ས་གནས་གཉིས་སུ་ཞི་བདེ་སྲུང་དམག་བཏང་སྟེ་ཨུ་རུ་སུའི་མི་རིགས་ལ་སྲུང་སྐྱོབ་བྱེད་ཀྱི་ཡོད་པ་རེད། ནུབ་ཕྱོགས་པ་ཚོས་མི་འགའ་ཞིག་གི་མངོན་འདོད་དེ་ཡུཀ་རེན་མི་དམངས་ཀྱི་སྟེང་དུ་བཙན་འགེལ་བྱེད་ཀྱི་འདུག ཤར་ཡུ་རོབ་ཀྱི་རྒྱལ་ཁབ་པོ་ལན་ཌིའི་དམག་སྒར་ཁག་ཏུ་སྦྱོང་བརྡར་ཐོབ་པའི་དྲག་སྤྱོད་པ་ཚོས་༢༠༡༤་ལོར་ཡུཀ་རེན་གྱི་སྲིད་འཛིན་ཡ་ནུ་ཀོ་ཝི་ཆིའི་སྲིད་གཞུང་མགོ་རྟིང་སློག་པ་རེད་ཅེས་གཏམ་བཤད་བྱས་འདུག ཨུ་རུ་སུའི་གཞུང་གིས་གཏན་འབེབས་བྱས་པའི་ངའི་རྒྱལ་ཁབ་ཟེར་བའི་སློབ་ཚན་ནང་དུ་ཡུཀ་རེན་དང་ཨུ་རུ་སུ་གཉིས་ཆོས་ལུགས་དང་རིག་གཞུང་། ལོ་རྒྱུས་རྣམས་གཅིག་པ་རེད་ཅེས་མཐའ་སྡོམ་བརྒྱབ། དེ་བཞིན་ཨུ་རུ་སུའི་སློབ་ཕྲུག་ཚོར་མེས་རྒྱལ་གྱི་ཆེད་དུ་འཆི་དགོས་ཀྱང་སྐྲག་མི་འཚལ། མེས་རྒྱལ་གྱི་བདེ་སྐྱིད་ནི་སྒེར་གྱི་ཚེ་སྲོག་ལས་ཀྱང་རྩ་ཆེན་ཡིན། མེས་རྒྱལ་ལ་དགའ་དགོས་པ་དང་མེས་རྒྱལ་ལ་ཞབས་འདེགས་ཞུ་དགོས། ཡུཀ་རེན་གྱི་ཧྥ་ཤི་སི་རིང་ལུགས་པའི་དབང་བསྒྱུར་འོག་ཏུ་ཚུད་པའི་ཌོན་བྷ་སི་མངའ་ཁུལ་གྱི་མི་དམངས་ལ་སྲུང་སྐྱོབ་བྱ་དགོས། ཡུཀ་རེན་གྱི་ས་ཐོག་ཏུ་ནུབ་ཆིངས་དམག་དོན་སྒྲིག་འཛུགས་ཀྱི་དམག་སྒར་ཚུགས་ཀྱི་འདུག་ཅེས་སློབ་གསོ་གཏོང་གི་ཡོད་པའི་གནས་ཚུལ་ཐོན་འདུག
