༄༅།། སྲིད་བློན་ནེ་ཐན་ཡ་ཧུས་ཨི་སི་རལ་གྱི་གསང་བའི་ལས་ཁུངས་ཁག་གི་འགོ་ཁྲིད་ཚོས་ལས་འགན་འཐུས་ཤོར་བཏང་སྟེ་ཧ་མ་སི་ཤོག་ཁག་གིས་གཏོར་རྒོལ་བྱས་པ་རེད་ཅེས་སྐྱོན་བཙུགས། ཡིན་ནའང་ཆུ་ཚོད་འགའ་ཤས་ཀྱི་རྗེས་སུ་སྲིད་བློན་ནེ་ཐན་ཡ་ཧུས་གསང་བའི་ལས་ཁུངས་ཁག་ལ་སྐྱོན་འཛུགས་བྱས་པ་འགྲིག་མི་འདུག་ཅེས་བཟོད་གསོལ་ཞུས། ཕྱི་ཟླ་༡༠་པའི་ཚེས་༢༩་ཉིན་ཧིལ་གསར་ཁང་གིས་གནས་ཚུལ་སྤེལ་བ་ལྟར་ན། སྲིད་བློན་ནེ་ཐན་ཡ་ཧུས་ངས་གསར་འགོད་ལྷན་ཚོགས་ཐོག་ཏུ་བཤད་པའི་སྐད་ཆ་དེ་རྣམས་བཤད་མི་དགོས་པ་ཞིག་རེད། ང་འཕྱུགས་ཡོད་པ་དང་ངས་བཟོད་གསོལ་ཞུ་རྒྱུ་ཡིན། ངས་གསང་བའི་ལས་ཁུངས་ཁག་གི་འགོ་ཁྲིད་ཚོར་རྒྱབ་སྐྱོར་ཆ་ཚང་བྱེད་ཀྱི་ཡོད་པ་དང་ཨི་སི་རལ་གྱི་དམག་དཔུང་སྤྱི་ཁྱབ་བཀོད་འདོམས་པ། དེ་བཞིན་ཨི་སི་རལ་གྱི་རྒྱལ་སྲུང་དཔུང་སྡེ་ཁག་གི་འགོ་ཁྲིད་ཚོའི་དབང་ཚད་ཆེ་རུ་གཏོང་གི་ཡོད། ང་ཚོས་མཉམ་དུ་འཐབ་རྒོལ་བྱས་ན་རྒྱལ་ཁ་འཐོབ་ངེས་རེད་ཅེས་ཨེག་སི་དྲྭ་ཚིགས་སུ་འཕྲིན་ཐུང་ཞིག་སྤེལ།།
སྲིད་བློན་ནེ་ཐན་ཡ་ཧུས་བཟོད་གསོལ་མ་ཞུས་པའི་སྔོན་དེར་ང་ལ་ཨི་སི་རལ་གྱི་གསང་བའི་ལས་ཁུངས་ཁག་གི་འགོ་ཁྲིད་ཚོས་ཕྱི་ཟླ་༡༠་པའི་ཚེས་༧་ཉིན་ཧ་མ་སི་ཤོག་ཁག་གིས་གཏོར་རྒོལ་བྱ་རྒྱུའི་ཉེན་ཁ་འདུག་ཅེས་སྔོན་བརྡ་གང་ཡང་བཏང་མ་བྱུང་། དེ་ལས་ལྡོག་སྟེ་ཨི་སི་རལ་གྱི་དམག་དོན་གསང་བའི་ལས་ཁུངས་དང་ཤིན་བྷེ་ཏ་ནང་སོ་ལས་ཁུངས་ཀྱི་འགོ་ཁྲིད་གཉིས་ཚུད་པའི་གསང་བའི་ལས་ཁུངས་ཁག་གི་འགོ་ཁྲིད་ཚང་མས་ཧ་མ་སི་ཤོག་ཁག་སྟོབས་ཤུགས་ཉམས། ཁོ་ཚོར་ཞི་འགྲིག་བྱ་རྒྱུའི་འདོད་པ་ཡོད་པའི་ཚོད་དཔག་བྱེད་ཀྱི་འདུག་ཅེས་ཉེས་སྐྱོན་མཐའ་དག་གསང་བའི་ལས་ཁུངས་ཀྱི་འགོ་ཁྲིད་ཚོའི་སྟེང་དུ་གཡོགས། སྲིད་བློན་ནེ་ཐན་ཡ་ཧུས་རང་ལ་ཉེས་སྐྱོན་ཅི་ཡང་མེད་པའི་དཀར་འདོན་བྱ་ཐབས་སུ་འབད། ཧ་མ་སི་ཤོག་ཁག་གི་གཏོར་རྒོལ་བྱུང་བའི་རྗེས་སུ་ཨི་སི་རལ་རྒྱལ་ཡོངས་སུ་ཆག་སྒོ་ཚབས་ཆེན་དེའི་ལན་ཁག་དེ་སྲིད་བློན་ནེ་ཐན་ཡ་ཧུ་དང་ཁོ་པས་འགོ་ཁྲིད་པའི་མཉམ་སྐྱོང་སྲིད་གཞུང་ལ་ཡོད། ཁོ་ཚོས་མི་དམངས་ཀྱི་བདེ་འཇགས་སྲུང་སྐྱོབ་བྱ་རྒྱུ་འཐུས་ཤོང་བཏང་བ་རེད་ཅེས་བསྡིགས།།
ཕྱི་ཟླ་༡༠་པའི་ཚེས་༢༩་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཨི་སི་རལ་གྱིས་ཧ་མ་སི་ཤོག་ཁག་ལ་རྒོལ་ལན་སློག་རྒྱུ་འགོ་བཙུགས་ནས་བཟུང་སྟེ་གྷ་ཟ་ཐང་གཤོང་ནར་མོར་འཚོ་གནས་བྱེད་བཞིན་པའི་པ་ལི་སི་ཐན་བ་༨༠༠༠་ལྷག་ལ་སྲོག་སྐྱོན་ཕོག གྷ་ཟའི་འཕྲོད་བསྟེན་ལྷན་ཁང་གིས་སྲོག་སྐྱོན་ཕོག་ཡུལ་མང་ཆེ་བ་ནི་བྱིས་པ་དང་བུད་མེད། རྒན་རྒོན་རྣམས་རེད་ཅེས་གསལ་བསྒྲགས་སྤེལ། ཨི་སི་རལ་གྱི་ལྕགས་ཁྲབ་འཁོར་ལོའི་དཔུང་སྡེ་དང་སྐམ་དམག་གིས་ས་གྷ་ཟའི་མཚམས་ནས་དཔུང་འཇུག་བྱ་རྒྱུ་འགོ་ཚུགས། སྲིད་བློན་ནེ་ཐན་ཡ་ཧུས་གཏོར་རྒོལ་རིམ་པ་གཉིས་པའི་སྐབས་སུ་གྷ་ཟ་ཐང་གཤོང་དུ་སྐུང་ཡོད་པའི་ཧ་མ་སི་ཤོག་ཁག་གི་འཐབ་མོ་བ་རྣམས་རྩ་མེད་གཏོང་རྒྱུ་ཡིན། གྷ་ཟའི་དམག་འཁྲུག་འདི་ཟླ་བ་མང་པོ་འགོར་ཤས་ཆེ་ཞེས་བཀྲལ། ཨི་རི་ལ་གྱི་གནམ་དམག་གིས་གྷ་ཟ་ཐང་གཤོང་ནར་མོར་གཏོར་རྒོལ་རིམ་པ་དང་པོ་བྱས་ནས་ཁ་པར་འབྲེལ་མཐུད་ཀྱི་ལྕགས་སྡོང་ཡོད་ཚད་གཏོར་ནས་འབྲེལ་ལམ་བཅད། ཁ་སང་གཟའ་ཉི་མ་ནས་ཁ་པར་དང་དྲྭ་རྒྱའི་འབྲེལ་ལམ་བསྐྱར་གསོ་བྱུང་། གྷ་ཟའི་པ་ལི་སི་ཐན་མི་དམངས་ལ་འཐུང་ཆུ་དང་བཟའ་ཆས། སྨན་སོགས་ཉེར་མཁོའི་དངོས་ཟོག་དོས་སྐྱེལ་རླངས་འཁོར་༣༣་ཨི་ཇེབ་ནས་སྐྱེལ་འདྲེན་བྱེད་དུ་བཅུག་པའི་གནས་ཚུལ་ཐོན་འདུག
རྒྱལ་སྤྱིའི་ཉེས་དོན་ཁྲིམས་འགན་ཁང་གི་སྤྱི་ཁྱབ་ཁྲིམས་སྦྱོར་བ་ཀ་རིམ་ཁན་ཨི་ཇེབ་དང་གྷ་ཟའི་ས་མཚམས་སུ་ཕེབས་ནས་པ་ལི་སི་ཐན་མི་དམངས་ཀྱིས་སྡུག་བསྔལ་མྱོང་གི་ཡོད་པ་ནི་ཡ་ང་བ་ཞིག་རེད། ང་རཱ་ཧྥའི་འགག་སྒོ་བརྒལ་ནས་གྷ་ཟ་ཐོང་གཤོང་དུ་བསྐྱོད་ཐུབ་མ་སོང་། ད་ལྟའི་དུས་སྐབས་འདི་ནི་ཧ་ཅང་གི་དུས་ངན་ཞིག་རེད། ཕྱི་ཟླ་༡༠་པའི་ཚེས་༧་ཉིན་ཧ་མ་སི་ཤོག་ཁག་གིས་ཨི་རལ་ལ་གཏོར་རྒོལ་བྱས་ནས་རྒྱལ་སྤྱིའི་ཁྲིམས་ལ་འགལ་འཛོལ་བྱུང་བ་དང་ཨི་སི་རལ་གྱིས་ཀྱང་རྒྱལ་སྤྱིའི་ཁྲིམས་ལ་བརྩི་སྲུང་བྱ་དགོས་ཞེས་ནན་གྱིས་བསྐུལ། ཀ་རིམ་ཁན་ནས་ཨི་སི་རལ་གྱིས་དམག་འཁྲུག་གི་ནག་ཉེས་བསགས་འདུག་ཅེས་སྐྱོན་འཛུགས་བྱ་མ་ཕོད། ༢༠༡༤་ནས་རྒྱལ་སྤྱིའི་ཉེས་དོན་ཁྲིམས་ཁང་གིས་ཨི་སི་རལ་དང་པ་ལི་སི་ཐན་གྱི་འགོ་ཁྲིད་ཁག་ཅིག་ལ་ཞིབ་འཇུག་བྱེད་ཀྱི་ཡོད་ཅིང་། གྷ་ཟ་ཐོང་གཤོང་ནར་མོ་ནི་ཨ་རིའི་རྒྱལ་ས་ཝ་ཤིང་ཊོན་ལས་ལྡབ་གཉིས་ཀྱི་ཆེ་ཆུང་ལས་མེད་ཀྱང་ས་གནས་དེར་པ་ལི་སི་ཐན་བ་ས་ཡ་༢་དང་ཕྱེད་ཀ་ཙམ་འདུས་ཡོད་པས་འཛམ་གླིང་གི་འཚང་ཁ་ཆེ་བའི་གནས་ཤིག་ཏུ་གྱུར།།
ཨ་རིའི་སྲིད་འཛིན་ཇཱོ་བྷ་ཌན་གྱིས་ཨི་སི་རལ་གྱི་སྲིད་བློན་དང་ཨ་རབ་རྒྱལ་ཁབ་ཁག་གི་འགོ་ཁྲིད་ཚོར་ཁ་པར་བཏང་ནས་ཨི་སི་རལ་དང་ཧ་མ་སི་ཤོག་ཁག་གི་དམག་འཁྲུག་ལངས་ནས་བདུན་ཕྲག་༣་འགྲོ་བཞིན་འདུག ནམ་ཞིག་དམག་འཁྲུག་འདི་མཚམས་འཇོག་དགོས་ཐུག་ངེས་རེད། ད་ལྟའི་དམག་འཁྲུག་གི་རྗེས་སུ་ཨི་སི་རལ་དང་པ་ལི་སི་ཐན་རང་བཙན་རྒྱལ་ཁབ་གཉིས་ཞི་བདེ་མཉམ་གནས་བྱས་ནས་དཀྱིལ་ཤར་ས་ཁུལ་དུ་ཞི་བདེ་བསྐྲུན་རྒྱུ་ཤིན་ཏུ་གལ་གནད་ཆེ། ཕྱི་ཟླ་༡༠་པའི་ཚེས་༦་གི་སྔོན་གྱི་གནས་སྟངས་དེ་ཕྱིར་ལོག་བྱ་རྒྱུ་ཐབས་ལམ་ཞིག་མ་རེད་ཅེས་བསྟན། སྲིད་འཛིན་བྷ་ཌན་གྱིས་པ་ལི་སི་ཐན་རང་བཙན་རྒྱལ་ཁབ་ཅིག་འཛུགས་རྒྱུར་གླེང་སློང་དེ་ཙམ་བྱས་མྱོང་མེད་ཀྱང་སྔ་ལོ་ཨི་སི་རལ་དང་ནུབ་འགྲམ་གྱི་པ་ལི་སི་ཐན་རང་སྐྱོང་ས་ཁུལ་དུ་ཕེབས་ཤིང་། སྐབས་དེར་སྲིད་འཛིན་བྷ་ཌན་གྱིས་ཨ་མི་རི་ཀས་པ་ལི་སི་ཐན་རང་བཙན་རྒྱལ་ཁབ་འཛུགས་རྒྱུར་རྒྱབ་སྐྱོང་བྱེད་པའི་དུས་ཚོད་སྨིན་མི་འདུག་ཅེས་བཤད། ད་ལྟ་ཨི་སི་རལ་དང་ཧ་མ་སི་ཤོག་ཁག་གི་དམག་འཁྲུག་འདི་དཀྱིལ་ཤར་ས་ཁུལ་གྱི་དམག་འཁྲུག་ཆེན་པོ་ཞིག་ཏུ་འགྱུར་ཉེན་ཡོད་པས་སྲིད་འཛིན་བྷ་ཌན་གྱིས་པ་ལི་སི་ཐན་རང་བཙན་རྒྱལ་ཁབ་འཛུགས་རྒྱུར་ཤུགས་སྣོན་རྒྱག་མགོ་བརྩམས།།
ཨ་མི་རི་ཀའི་སྲིད་འཛིན་རིམ་པ་ཞིག་གིས་ཨི་སི་རལ་དང་པ་ལི་སི་ཐན་གྱི་ཞི་བའི་གྲོས་མོལ་ལ་བར་འདུམ་བྱས་ཀྱང་༢༠༡༤་ལོར་ཨི་སི་རལ་གྱི་གཞིས་ཆགས་རྒྱ་སྐྱེད་དང་པ་ལི་སི་ཐན་གྱི་བཙོན་པ་གློད་གྲོལ། གཞན་ཡང་གནད་དོན་འགའ་ཞིག་གི་ཐོག་ཏུ་ཕྱོགས་གཉིས་ཀྱི་ཞི་བའི་གྲོས་མོལ་མཚམས་ཆད། ཌེ་ནི་སི་རོ་སི་ནི་སྲིད་འཛིན་ཁེ་ལིན་ཊོན་དང་འཇོར་ཇཱི་ཌབ་ལུ་བྷུ་ཤཱིའི་དུས་སུ་དཀྱིལ་ཤར་ས་ཁུལ་གྱི་དམིགས་བསལ་སྐུ་ཚབ་ཡིན་ཞིང་། ཁོང་གིས་འཐབ་འཁྲུག་མཚམས་ཆད་རྒྱུའི་རྟགས་མཚན་མེད་ཀྱང་ཕུགས་རྒྱང་རིང་པོའི་གྲ་སྒྲིག་བྱ་རྒྱུ་གནད་འགག་ཆེན་པོ་རེད། ང་ཚོས་པ་ལི་སི་ཐན་གྱི་གནད་དོན་འདི་གནད་དོན་ཞིག་ཏུ་མ་བརྩིས་པར་སྣང་མེད་བྱས་ནས་འཇོག་ཐབས་བྲལ། དེ་ནི་རེ་བ་མེད་པ་ཞིག་མ་རེད། འཐབ་འཁྲུག་འཇམ་པའི་རྗེས་སུ་རེ་བ་མེད་པ་ཞིག་མ་རེད་ཅེས་ནན་བརྗོད་བྱས་འདུག ཕོ་བྲང་དཀར་པོའི་རྒྱལ་སྲུང་སློབ་སྟོན་པ་ཇཱོན་ཀིར་བྷིས་འཐབ་འཁྲུག་འདི་ཆོས་དད་ཀྱི་གནད་དོན་ཞིག་མ་རེད། འདི་ནི་དཀྱིལ་ཤར་ས་ཁུལ་གྱི་མདུན་ལམ་དང་ཨི་སི་རལ་གྱི་བདེ་འཇགས་ལ་འབྲེལ་བ་ཡོད་པས་ང་ཚོས་འབད་བརྩོན་བྱ་རྒྱུ་མཚམས་འཇོག་བྱེད་མི་སྲིད་ཅེས་གསར་འགོད་པ་ཚོར་གླེང་མོལ་བྱས་འདུག
ཉེ་ཆར་ཕྱི་ཟླ་༡༠་པའི་ཚེས་༧་ཉིན་པ་ལི་སི་ཐན་གྱི་ཧ་མ་སི་ཤོག་ཁག་གིས་སྐམ་མཚོ་གནམ་གསུམ་ནས་གློ་བུར་དུ་ཨི་སི་རལ་ལ་གཏོར་རྒོལ་བྱས་ནས་མི་༡༤༠༠་ལྷག་བསད་པ་དང་མི་༢༥༠་ཡས་མས་བཙན་གྱིས་ཁྲིད། ད་ལྟའི་བར་དུ་ཨ་རི་བ་མ་སྨད་གཉིས་དང་ཨི་སི་རལ་གྱི་རྒན་མོ་གཉིས་བཅས་མི་༤་མ་གཏོགས་གློད་གྲོལ་མ་ཐོབ། ཕྱི་ཟླ་༡༠་པའི་ཚེས་༢༩་ཉིན་འཇར་མན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཧ་མ་སི་ཤོག་ཁག་གིས་མི་༢༥༠་ཡས་མས་ཤིག་བཙན་ཁྲིད་བྱས་པ་དེ་དག་གི་གྲས་ཀྱི་མི་༥༦་ཐེ་ལན་པ་ཡིན་པར་མ་ཟད། གཟའ་སྤེན་པའི་ཉིན་ཐེ་ལན་ཌིའི་ཕྱི་སྲིད་ལྷན་ཁང་གིས་ཐེ་ལན་པ་༡༢་ཧ་མ་སི་ཤོག་ཁག་གིས་གཏོར་རྒོལ་བྱས་ནས་བསད་འདུག དེང་སྐབས་ཨི་སི་རལ་རྒྱལ་ཡོངས་སུ་ཐེ་ལན་པ་༣༠༠༠་ལྷག་གིས་ཞིང་ལས་ཀྱི་གླ་གཡོག་རྒྱུག་གི་ཡོད་ཅེས་བསྒྲགས། ཐེ་ལན་ཌིའི་ལས་རྩོལ་ལྷན་ཁང་གིས་ཐེ་ལན་པ་༥༠༠༠་ཡས་མས་ཤིག་ཨི་སི་རལ་དུ་ཕྱིན་ནས་ཞིང་ལས་ཀྱི་གླ་གཡོག་རྒྱུག་གི་ཡོད། ཐེ་ལན་པ་༡༠༩༩་རང་ཡུལ་དུ་ཕྱིར་ལོག་ཐུབ་འདུག་ཅེས་གྲངས་ཐོ་མ་འདྲ་བ་ཞིག་བཏོན། ཧ་མ་སི་ཤོག་ཁག་གིས་བསད་པ་དེ་དག་གི་གྲས་སུ་བལ་པོ་༡༠་དང་ཨ་རི་བ། དབྱིན་ཇི་བ་དང་འཇར་མན་པ་སོགས་ཚུད་ཡོད་པའི་གནས་ཚུལ་ཐོན།།
ཕྱི་ཟླ་༡༠་པའི་ཚེས་༢༩་ཉིན་ཨི་སི་རལ་གྱི་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། རྒྱལ་སྲུང་བློན་ཆེན་ཡོ་ཝ་གྷ་ལན་ཊས་ཧ་མ་སི་ཤོག་ཁག་གིས་བཙན་ཁྲིད་བྱས་པའི་མི་དེ་དག་གི་བཟའ་མི་ཚོར་ཐུག་འཕྲད་བྱས་ནས་ང་ཚོས་དམག་བརྒྱབ་ནས་གནོན་ཤུགས་ཆེ་རུ་བཏང་ཚེ། ཧ་མ་སི་ཤོག་ཁག་གིས་བཙན་ཁྲིད་བྱས་པའི་མི་དེ་དག་གློད་གྲོལ་གཏོང་བའམ། ཡང་ནས་བཙོན་པ་བརྗེ་ལེན་བྱ་རྒྱུར་མོས་མཐུན་བྱ་རྒྱུའི་རེ་བ་ཡོད་པ་རེད། གལ་སྲིད་ང་ཚོས་དམག་བཏང་ནས་དཔུང་འཇུག་མ་བྱས་ན་གྲུབ་འབྲས་ཐོན་དཀའ་ཞེས་ལྟ་ཚུལ་བརྗོད། ཧ་མ་སི་ཤོག་ཁག་གིས་ཨི་སི་རལ་གྱི་བཙོན་ཁང་ཁག་ཏུ་བཅུག་ཡོད་པའི་པ་ལི་སི་ཐན་བ་ཡོད་དོ་ཅོག་གློད་གྲོལ་བཏང་ན་མི་བཙན་ཁྲིད་བྱས་པ་རྣམས་གློད་གྲོལ་གཏོང་ཆོག་ཅེས་གྲོས་འགོ་བཏོན་པའི་གནས་ཚུལ་ཐོན་ཞིང་། ཨི་སི་རལ་གྱི་རྒྱལ་སྲུང་བློན་ཆེན་གྱིས་སྐད་ཆ་དེ་ཚོ་ཧ་མ་སི་ཤོག་ཁག་གི་གཡོ་གཏམ་རེད་ཅེས་བདེན་པར་མ་བརྩིས། ཁོང་གིས་ང་ཚོས་དམག་འཁྲུག་རྒྱག་ས་ནི་སྨྲ་ཤེས་དོན་གོའི་འགྲོ་བ་མི་ཞིག་མིན་པར་དུད་འགྲོ་ལྟ་བུའི་དཔུང་ཚོགས་ཤིག་རེད་ཅེས་གཤེས་པའི་གནས་ཚུལ་ཐོན་འདུག
